ނަޒާހަތްތެރިކަމާ މެދު ސުވާލު އުފެދޭތީ ސާމީ އަގީލް ޕީއެސްއަކަށް ހަމަޖައްސަން ދެކޮޅު ހަދައިފި

ޓްރާންސްޕޯޓް މިނިސްޓްރީ ޕާމަނަންޓް ސެކްރެޓަރީ (ޕީއެސް) އަކަށް ވަގުތީ ގޮތުން ހުންނެވި ސާމީ އަގީލް، އެ މަގާމަށް ހަމަޖައްސައިދޭން މިނިސްޓަރު އައިޝަތު ނަހުލާ ތަކުރާރުކޮށް އެދިވަޑައިގަތުމުން ވެސް އެކަމަށް ސިވިލް ސާވިސް ކޮމިޝަން (ސީއެސްސީ) އިން ދެކޮޅު ހަދައިފި އެވެ.

ޓްރާންސްޕޯޓް މިނިސްޓްރީއަށް ޒިންމާދާރު އިސް ވެރިޔާ އައްޔަންކުރުމާ ގުޅޭ ގޮތުން ސިޓީއެއް ފޮނުވި ކަން ސީއެސްސީން ކަށަވަރުކޮށްދެ އެވެ. އެކަމަކު މުވައްޒަފަކާ ގުޅުން ހުރި ކަމަކަށް ވާތީ އެ ކޮމިޝަނުން ތަފްސީލެއް ނުދެ އެވެ.

ސާމީ ކުރިން ހުންނެވީ ޓްރާންސްޕޯޓް މިނިސްޓްރީގެ ދަށުން ހިންގި ރީޖަނަލް އެއާޕޯޓްސްގެ ޑިރެކްޓަރެއްގެ މަގާމުގަ އެވެ. ރީޖަނަލް އެއާޕޯޓްސް، ކުންފުންޏަކަށް މި ވެރިކަމުގައި ބަދަލުކުރުމާ އެކު މިނިސްޓަރު ނަހުލާ ބޭނުންވީ އެ މިނިސްޓްރީގެ އެޑްމިނިސްޓްރޭޝަން، ފައިނޭންސް އަދި އެޗްއާރު ޑިޕާޓްމެންޓުގެ ޑިރެކްޓަރު ޖެނެރަލްގެ މަގާމަށް އޭނާ ބަދަލުކުރައްވާށެވެ. އެކަމަކު އެ މަގާމަށާއި ޕީއެސްއަކަށް ސާމީ ހަމަޖައްސަން ވެސް ސީއެސްސީން އަންނަނީ އިންކާރު ކުރަމުންނެވެ.

އެޗްއާރު ޑިރެކްޓަރުގެ މަގާމު ސާމީއަށް ދޭން ބޭނުން ނުވަނީ، ސީއެސްސީން ޓްރާސްޕޯޓަށް އަންގާފައިވާ ގޮތުގައި، ޓްރާންސްޕޯޓް މިނިސްޓްރީ އާއި ޓްރާންސްޕޯޓް އޮތޯރިޓީގެ ގިނަ މައްސަލަތަކެއް ބަލަމުން އަންނާތީ އެވެ. އޭގެ ތެރޭގައި ސާމީއާ ގުޅުން ހުރި މައްސަލަތަކެއް ވެސް ހިމެނެ އެވެ.

މުވައްޒަފެއްގެ މައްސަލަތައް ބަލާ މުއްދަތުގައި ކަންކުރާ އުސޫލަކީ އެ މުވައްޒަފެއްގެ ވަޒީފާ ވަގުތީ ގޮތުން ބަދަލުކުރުން ނުވަތަ މަސްއޫލިއްޔަތުތަކުން ވަގުތީ ގޮތުން އެކަހެރިކުރުން ކަން ސީއެސްސީން ވަނީ ޓްރާންސްޕޯޓް މިނިސްޓްރީއަށް ހަނދާންކޮށްދީފަ އެވެ.

ސާމީ އަށް ތުހުމަތުކުރާ ކޮރަޕްޝަންގެ މައްސަލަތަކެއް ބަލަމުން އަންނަ ކަން އެންޓި ކޮރަޕްޝަން ކޮމިޝަނުން ވެސް އަންގާފައިވާ ކަން ސީއެސްސީން ވަނީ ޓްރާންސްޕޯޓުގައި ބުނެފަ އެވެ.

ޓްރާންސްޕޯޓުގެ ވަޒީފާއެއް ސާމީއަށް ހަމަޖައްސަން ނުފެންނަ ކަމަށް އެންގުމުގެ އިތުރުން ޕީއެސްގެ މަގާމަކީ ނަޒާހަތްތެރިކަމާ މެދު ސުވާލު އުފެދިފައިވާ ބޭފުޅަކާ ހަވާލުކުރަންވާނެ މަގާމެއް ނޫން ކަން ވެސް ސީއެސްސީން ވަނީ އަންގައިފަ އެވެ.

ސީއެސްސީން ޓްރާންސްޕޯޓަށް އަންގާފައި ވަނީ ޕީއެސްއަކީ އެހެން ހުރިހާ މުވައްޒަފުންނަށް ނަމޫނާ ދައްކަވަން ޖެހޭ ބޭފުޅަކަށް ވާ އިރު ނަޒާހަތްތެރިކަމަކީ މުވައްޒަފުންނަށް މިސާލު ދައްކަން ޖެހޭ އެންމެ މުހިއްމު ސިފަ ކަމަށެވެ. ނަޒާހަތްތެރިކަމާ މެދު ސުވާލު އުފެދިފައިވާ ބޭފުޅަކު ޕީއެސްއަކަށް ހަމަޖެއްސުމަކީ ސީއެސްސީން ކަން ކުރާ ގޮތެއް ނޫން ކަން ވެސް ޓްރާންސްޕޯޓަށް ވަނީ އަންގައިފަ އެވެ.

އެއީ މުވައްޒަފުން ވެސް ބަލައިގަންނާނެ ގޮތެއް ނޫން ކަން ބުނެ ސީއެސްސީން ވަނީ ނަހުލާއަށް ނަސޭހަތްތެރިވެފަ އެވެ. ކޮމިޝަނުން އެދުނީ އެ މަގާމަށް ހަމަޖައްސަން މިނިސްޓަރަށް ފެނިވަޑައިގަންނަވާ އެހެން ނަމެއް ފޮނުއްވައި ދެއްވުމަށެވެ.

ސާމީ އަގީލް، ޕީއެސްއަކަށް ހަމަޖައްސަން ތަކުރާރުކޮށް ނަހުލާ ސީއެސްސީގައި އެދިވަޑައިގަތީ ތައުލީމީ ގޮތުންނާއި ގާބިލްކަމަށް ބަލާއިރު ވެސް އެ މަގާމަށް އޭނާއަށް ވުރެ އެކަށޭނަ ބޭފުޅުން ކުރިމަތިލައްވާފައި ވަނިކޮށެވެ. އޭގެ ތެރެއިން އެއް ބޭފުޅަކަށް ވަނީ އެހެން މިނިސްޓްރީއެއްގެ ޕާމަނަންޓް ސެކްރެޓަރީގެ މަގާމު މިހާރު ލިބިވަޑައިގެންފަ އެވެ.

ޕީއެސްގެ މަގާމަށް ސާމީ އެކަށީގެން ނުވާ ކަމުގެ ގިނަ ސަބަބުތައް ދައްކައި ޓްރާންސްޕޯޓުގެ މުވައްޒަފުން ވަނީ ސީއެސްސީއަށް ޕެޓިޝަނެއް ހުށަހަޅައިފަ އެވެ. އެކަމަކު މިނިސްޓަރު ނަހުލާއާ އަރިސް ބޭފުޅެއް ކަމަށް ބުނާ ސާމީ، ޕީއެސްއަކަށް ހަމަޖައްސަން އެދިވަޑައިގަތީ އެ ޕެޓިޝަންގެ ވެސް ފަހުންނެވެ.

ސާމީއަށް ތާއީދުކޮށް ވެސް ޓްރާސްޕޯޓް އޮތޯރިޓީގެ 41 މުވައްޒަފަކު ސޮއިކޮށްފައިވާ ޕެޓިޝަނެއް ވެސް، ސީއެސްސީގެ ރައީސް މުހައްމަދު ނާސިހުއަށް، ޖެނުއަރީ 17 ގައި ފޮނުވި އެވެ. އޭގައި ބުނެފައި އޮތީ، ސާމީއާ ދެކޮޅު ޕެޓިޝަންގައި އެ މުވައްޒަފުން ސޮއިކޮށްފައި ނުވާނެ ކަމަށެވެ.

ސާމީއާ ދެކޮޅަށް ހެދި ޕެޓިޝަންގައި ސޮއިކުރި މުވައްޒަފުން ބުނެފައި ވަނީ އޭނާ ސައްކަތް ކުރެއްވި އެކި ތަންތަނުގައި ކޮރަޕްޝަނާއި ފަސާދައިގެ އަމަލުތައް ހިންގެވި ކަމުގެ ތުހުމަތުތައް ފެންމަތިވެފައި އެބަހުރި ކަމަށެވެ. ބައެއް މައްސަލަތައް އޭސީސީން ތަހުގީގުކޮށް ޝަރީއަތަށް ފޮނުވިކަމަށް ބުނެ ތަފްސީލްތައް ވެސް އެ ޕެޓިޝަންގައި ދީފައިވެ އެވެ.