ސޯޝަލް މީޑިއާގައި ކުރައްވާ ޕޯސްޓްތަކާ ގުޅިގެން މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ އެސިސްޓެންޓް ޕްރޮފެސަރު ޑރ. މުހައްމަދު އިޔާޒް އަބްދުއްލަތީފް ސަސްޕެންޑްކޮށްފި އެވެ.
އެމްއެންޔޫ އިން އިޔާޒް ސަންސްޕެންޑްކޮށް އޭނާ އަށް ފޮނުވި ލިއުމުގަައި ބުނެފައި ވަނީ 14 ދުވަހަށް އޭނާ ސަސްޕެންޑްކުރީ ސޯޝަލް މީޑިއާގައި އޭނާ އާއްްމުކުރައްވާ ތަފާތު ލިއުންތަކުން ޔުނިވާސިޓީގެ އަބުރާ ކަރާމަތަށް ހުތުރުވާތީ ކަމަށެވެ. އަދި އެ އެގޮތަށް ކަންތައް ނުކުރަން ނަސޭހަތްތެރި ވުމުން ވެސް އެކަން އިސްލާހު ނުކުރުމުން އެކަން އިތުރަށް ތަހުގީގު ކުރުމަށް ކަމަށް ބުނެފައިވެ ވެ. އެ ލިއުމުގައި ބުނެފައިވާ ގޮތުގައި ތަހުގީގަށް އިޔާޒް ސަސްޕެންޑް ކުރީ އޭނާއަށް އަނގަބަހުންނާއި ލިއުމުން ވެސް ނަސޭހަތް ދިނުމުން ވެސް އޭނާ ކަންތައްތައް ބަދަލު ނުކުރެއްވުމުންނެވެ.
ޔުނިވާސީން ބުނެފައި ވަނީ ދީނީ ކަންކަމާއި އިޖުތިމާއީ ކަންކަމާ ގުޅުވައިގެން އިޔާޒް ބޭނުންކުރައްވާ ބަހުރުވަ އާއި ހާލަތާ ގުޅިގެން ނުކުންނަ މާނައާ މެދު އާއްމުންގެ ޝަކުވާ ޔުނިވާސިޓީއަށް ލިބޭ ކަމަށެވެ.
އިޔާޒް މިރޭ "މިހާރު" އަށް ވިދާޅުވީ ޔުނިވާސިޓީގައި އޭނާ އަދާކުރައްވާ މަގާމުގެ ހައިސިއްޔަތުން، އޭނާއާ މެދު ހިނގާ ތަހުގީގަކަށް އެއްވެސް ނުފޫޒެއް ނުފޯރުވޭނެ ކަަމަށާއި އެހެންވީމާ ސަސްޕެންޑް ނުކޮށް ވެސް އެ ތަހުގީގު ކުރިއަަށް ގެންދެވިދާނެ ކަމަށް ދެކެވަޑައިގަންނަވާ ކަމަށެވެ.
"އަޅުގަނޑު ދެކޭ ގޮތުގައި މިއީ ޔުނިވާސިޓީގެ ވައިސް ޗާންސެލަަރު އަޅުގަނޑާ ދޭތެރޭގައި ޒާތީ ގޮތުން އޮތް ރުޅިވެރިކަމަަކުން އަމަލުކުރައްވާ ގޮތް. އެހެން ނޫނީ އެ ތަހުގީގަކީ އަޅުގަނޑު ސަސްޕެންޑް ނުކޮށް ވެސް ކުރިއަށް ގެންދެވޭނެ ތަހުގީގެއް،" އޭނާ ވިދާޅުވި އެވެ.
އެމްއެންޔޫ އިން މީގެ ކުރިން އިޔާޒަށް ލިއުމުން ދިން ނަސޭހަތުގައި ބުނެފައި ވަނީ އޭނާ ކުރައްވާ ސިޔާސީ ޓްވީޓްތަކާ ގުޅިގެން ޔުނިވާސިޓީގެ އަބުރާއި އިއްޒަތާއި ގަދަރަށް ހީނަރުކަން ލިބެމުންދާ ކަމަށެވެ. ޔުނިވާސިޓީގެ ސިޔާސަތުތަކާ އެއްގޮތަށް އަމަލުތައް ބެހެއްޓުމަށް އިޔާޒަށް މިދިޔަ އޮކްޓޫބަރު މަހު އަނގަބަހުން ނަސޭހަތްދީފައި ވާނެ ކަމަށް ވެސް އެ ލިޔުމުގައި ބުންޏެވެ. އެމްއެންޔޫގެ ކޯޑް އޮފް ކޮންޑަކްޓާ ހަވާލާދީ ލިޔުމުގައި ބުނީ ކޮންމެ މުވައްޒަފެއްގެ ވެސް އުޅުމާއި ގުޅުން ބަހައްޓަން ވާނީ ޔުނިވާސިޓީގެ ގަދަރު ހިފެހެއްޓޭ ގޮތަށް ކަމަށެވެ.