ދީނީ އިލްމުވެރިޔާ އަދި މޯލްޑިވްސް ނެޝަނަލް ޔުނިވާސިޓީގެ އެސިސްޓެންޓް ޕްރޮފެސަރު ޑރ. މުހައްމަދު އިޔާޒް އަބްދުއްލަތީފް ސޯޝަލް މީޑިއާ ޓްވިޓާގައި ކުރައްވަމުން ގެންދަވާ ޕޯސްޓްތަކުގެ ސަބަބުން ޔުނިވާސިޓީގެ ގަދަރު ކުޑަވާ ކަމަށް ބެލެވިގެން އޭނާ އަށް އެ ޔުނިވާސިޓީން ލިޔުމުން ނަސޭހަތް ދީފި އެވެ.
އެމްއެންޔޫގެ ޑެޕިއުޓީ ވައިސްޗާންސެލަރު ހުސައިން ހަލީމް ސޮއިކުރައްވައި މިދިޔަ އަންގާރަދުވަހު އިޔާޒަށް ފޮނުއްވި ލިޔުމުގައި ބުނީ ކުރައްވާ ސިޔާސީ ޓްވީޓްތަކާ ހެދީ ޔުނިވާސިޓީގެ އަބުރާއި އިއްޒަތާއި ގަދަރަށް ހީނަރުކަން ލިބެމުންދާ ކަމަށެވެ. ޔުނިވާސިޓީގެ ސިޔާސަތުތަކާ އެއްގޮތަށް އަމަލުތައް ބެހެއްޓުމަށް އިޔާޒަށް މިދިޔަ އޮކްޓޫބަރު މަހު އަނގަބަހުން ނަސޭހަތްދީފައި ވާނެ ކަމަށް ވެސް އެ ލިޔުމުގައި ބުންޏެވެ. އެމްއެންޔޫގެ ކޯޑް އޮފް ކޮންޑަކްޓާ ހަވާލާދީ ލިޔުމުގައި ބުނީ ކޮންމެ މުވައްޒަފެއްގެ ވެސް އުޅުމާއި ގުޅުން ބަހައްޓަން ވާނީ ޔުނިވާސިޓީގެ ގަދަދު ހިފެހެއްޓޭ ގޮތަށް ކަމަށެވެ.
"ޑރ. މުހައްމަދު އިޔާޒްގެ ޓްވިޓާ ހޭންޑުލްގައި ޔުނިވާސިޓީގެ އެސިސްޓެންޓް ޕްރޮފެސަރެއްގެ ގޮތުގައި ޖައްސަވާފައިވާއިރު، ކުރައްވާ ސިޔާސީ ކޮމެންޓެއް ކަމަށް ބެލެވިދާނެ ކޮންމެ ޓްވީޓެއްގެ މުގައްދިމާއެއްގެ ގޮތުގައި ޓްވީޓް ކުރައްވަނީ އަމިއްލަ ހައިސިއްޔަތުން ފާހަގަ ނުކުރައްވައިފި ނަމަ އެކަން ބެލެވޭނީ ހަވާލާ ދެވުނު ސިޔާސަތާ ހިލާފުމީ ކަމަށެވެ،" ދިވެހި ގައުމީ ޔުނިވާސިޓީގެ ނަސޭހަތުގެ ސިޓީގައި ވެ އެވެ.
އެ ލިޔުމުގައި ހަވާލާދީފައި ވަނީ ޔުނިވާސިޓީ އުފެދުމުގެ ކުރިންް އަމަލުކުރަމުން އައި ސިޔާސަތަކާ އެވެ.
މޯލްޑިވްސް ކޮލެޖް އޮފް ހަޔާ އެޑިއުކޭޝަންގެ ދުވަސްވަރު 2009 ވަނަ އަހަރު ކަނޑައަޅާފައިވާ އެ ސިޔާސަަތުގައި އޮތީ ކޮލެޖްގެ މުވައްޒަފަކު ސިޔާސީ ވާހަކަ ދައްކާއިރު، އެއީ ކޮލެޖްގެ ފަރާތުން ދައްކާ ވާހަކައެއް ކަމަށް ހީވެދާނެ ކޮންމެ ހާލަތެއްގައި، އެ ވާހަކަ ދައްކަނީ އަމިއްލަ ހައިސިއްޔަތުންކަން ބުނަން ވާނެ ކަމަށެވެ. އެ ހާލަތުގައި ކޮލެޖުގެ ވަޒީފާގެ، މަގާމުގެ ނަން ބޭނުން ކުރަން ވާނީ ހަމަ އެކަނި ކާކުކަން ހާމަކުރުމަށް ކަމަށް ވެސް އެ ސިޔާސަތުގައި ވެ އެވެ.
އިޔާޒް ޔުނިވާސިޓީގައި އަދާކުރައްވާ މަގާމާއި އަދާލަތު ޕާޓީގައި އަދާކުރައްވާ މަގާމު ވެސް ޓުވިޓާ ހޭންޑުލްގައި ޖައްސަވާފައި ވެ އެވެ. އެއާ އެކު ލިޔުއްވާފައި އޮތީ ފާޅުކުރައްްވާ ހިޔާލުތަކަކީ އަމިއްލަ ހިޔާލުތައް ކަމަށެވެ. އެހެން ޖެއްސެވީ މިހާރުކަމެއް ނުވަތަ ކުރިއްސުރެ އޮތީ އެހެން ކަމެއް ނޭނގެ އެވެ.
ޓްވިޓާގައި އިޔާޒް ކުރައްވާފައިވާ ޕޯސްޓްތަކުގެ ތެރޭގައި ކާކު ހިންގާ ޓްވިޓާ ހޭންޑުލްއެއްކަން ނޭނގޭ ޓްވިޓާ ހޭންޑުލް އަކުން ވެރިކަން ކުރާ ކޯލިޝަންގެ މައި ޕާޓީ، އެމްޑީޕީ އަށާއި އެ ޕާޓީގެ ލީޑަޝިޕަށް ރައްދުވާ ގޮތަށް ޖެއްސުން ކުރުން ކަމަށް ބެލެވިދާނެ ބައެއް ވާހަކަތައް ރިޓްވީޓް ކުރައްވައި އެ އަށް ޖަވާބު ދެއްވުން ވެސް ހިމެނެ އެވެ.
"ޕީޕަލް ޕަވާ" ގެ ނަމުގައި ހިންގާ އެ ހޭންޑުލް އިން ކުރި ޓްވީޓެއްގައި ބުނެފައި އޮތީ "އެމްޑީޕީ އެންމެ ކަން ބޮޑުވަނީ ރާއްްޖޭގެ އިލްމުވެރިންނަށް" ކަމަށެވެ. "އެ މީހުން [އިލްްމުވެރިން] ދައްކާ ކޮންމެ ވާހަކައަކުން ލާދީނީ އެމްޑީޕީ ބައިގަނޑު ފާޅުވޭ،" މިހެން ވެސް އެ ޓްވީޓްގައި ލިޔެފައި އޮތެވެ. އެ ޓްވީޓަށް ޖަވާބު ދެއްވަމުން އިޔާޒް ލިއުއްވާފައި އޮތީ "ބޭރުފުށަށް ވަކި އެއްޗެއް ދައްކާފައި އެތެރޭގައި އެހެން ފިލްމެއް އަޅުވާފައި އިނީމާ ނުވެ ނުދާނެ ގޮތްތައް އެވަނީ" މިހެންނެވެ.
މި ނޫނަސް ސިޔާސީ ގޮތުން އެކްޓިވިސްޓުންގެ ދަރަޖައިގައި ކުރައްވާފައިވާ ޓްވީޓްތަކާއި ރީޓްވީޓްތައް އަދި ޖަވާބުތައް ވެސް އިޔާޒްގެ ޓްވިޓާ ހޭންޑުލް އިން ފެންނަން އެބަހުއްޓެވެ.
ނަމަވެސް ޔުނިވާސިޓީން ލިޔުމުން ދިން ނަސޭހަތާ ބެހޭ ގޮތުން އިޔާޒު "މިހާރު" އަށް ވިދާޅުވީ އަނގަބަހުން ނަަސޭހަތްދިން ކަމަށް ލިޔުމުގައި އޮތް ނަަަމަވެސް އަނގަބަހުން ނަސޭހަތް ދީފައި ނުވާ ކަމަށެވެ.
"21 އޮކްޓޯބަރުގައި އަޅުގަނޑު ހާޒިރުކުރީ ވައިސް ޗާންސެލައާ ބައްދަލުކޮށްލަން. ނަސޭހަތް ދޭކަށް ނޫން. އަދި ޓްވިޓާ ހޭންޑުލްގައި ވަކި ގޮތަކަށް ބަދަލުކުރާކަށް އަންގާފައެއް ވެސް ނުވޭ،" އޭނާ ވިދާޅުވި އެވެ.
"ޔުނިވާސިޓީގެ އިއްޒަތް ގެއްލުނު ކަމަށްވީ ކްރިމަސް ފާހަގަކުރުމާ ދެކޮޅަށް ވާހަކަ ދެއްކި، ނިކަމެތި އަޅުގަނޑު" ގެ ސަބަބުން ކަމަށާއި އެކަމަކު ޔުނިވާސިޓީގެ މިހާރުގެ ވައިސް ޗާންސެލާ އަކީ އެމްޑީޕީގެ ޕްރައިމަރީގައި ކަލާފާނު ސްކޫލްގެ ތެރޭގައި ހިނގި ހަމަނުޖެހުމުގައި އަމަލީ ގޮތުން ބައިވެރިވެވަޑައިގެންނެވި ބޭފުޅެއް ކަމަށް ވެސް އިޔާޒު ތުހުމަތު ކުރައްވަ އެވެ.
ޔުނިވާސިޓީން ނަސޭހަތް ދިން ފަހުން އޭނާ ކުރެއްވި ޓްވީޓެއްގައި ވިދާޅުވީ ވަޒީފާއިން ވަކިކޮށްފާނެ ކަމުގެ ބިރުު ދައްކައިގެން އޭނާ ކުރައްްވާ މަސަައްކަތް ނުހުއްޓުވޭނެ ކަމަށެވެ.