ދޯންޏެއްގައި ދެ ބިދޭސީއަކު ރޭ ހިންގި މާރާމާރީއެއްގައި ޒަހަމް ކޮށްލި މީހަކު މިއަދު މަރުވެއްޖެ އެވެ.
ފުލުހުންގެ މީޑިއާ އޮފިޝަލަކު ވިދާޅުވީ، އެންދަމާ ދޯންޏެއްގައި ތިބި ދެ ބިދޭސީއެއްގެ މެދުގައި ހިންގި މާރާމާރީއެއްގައި ބަންގްލަދޭޝް މީހެއްގެ ގަޔަށް ތޫނު އެއްޗަކުން ހަމަލާދީ ޒަހަމްކޮށްލި މައްސަލައެއް ރޭ 3:50 ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
ހަމަލާއާ ގުޅިގެން 42 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައި ވެ އެވެ.
އެ ދޯނި އޮތީ ތ. ގުރައިދޫއާ ކައިރީގަ އެވެ. ހަމަލާއަށްފަހު ޒަހަމްވި ބިދޭސީ މީހާ ވަނީ އެ އަތޮޅު ވޭމަންޑޫ ހޮސްޕިޓަލަށް ގެންގޮސްފަ އެވެ. ނަމަވެސް ފަރުވާ ދެމުންދަނިކޮށް މެންދުރު 11:59 ހާއިރު އެ މީހާ ވަނީ މަރުވެފަ އެވެ.
އެއީ ދ. މީދޫގެ މަސްދޯންޏެއް ކަމަށް ވެ އެވެ. ހަމަލާ ދިންއިރު ދޯނީގައި ތިބި 12 މީހުންގެ ތެރެއިން އަށް މީހުންނަކީ ބިދޭސީންނެވެ.