ކޮވިޑު-19 އިން ރައްކާތެރިވުމަށް އަޅާފައިވާ ފިޔަވަޅުތަކާ ހިލާފުވެގެން ސަރުކާރު ކޯލިޝަންގެ މައި ޕާޓީ، އެމްޑީީޕީ އަދި އިދިކޮޅު ކޯލިޝަންގައި ހިމެނޭ ޕީޕީއެމާއި ޕީއެންސީ އިއްޔެ ޖޫރިމަނާކޮށްފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ މިންގަނޑާ ހިލާފުވެފައިވާތީ އެމްޑީޕީ އާއި ޕީޕީއެމް އަދި ޕީއެންސީ ޖޫރިމަނާކޮށްފައިވާ ކަމަށެވެ. އޭގެ ތަފްސީލެއް ނުދެއްވަ އެވެ.
ރައްކާތެރިކަމުގެ ފިޔަވަޅުތަކާ ހިލާފުވުމުން 5،000ރ. އިން ޖޫރިމަނާކުރެ އެވެ.
އެންމެ ހަރަކާތްތެރި ތިން ޕާޓީ ޖޫރިމަނާކޮށްފައިވަނީ، އަންނަ މަހު ބާއްވާ ލޯކަލް ކައުންސިލް އިންތިޚާބުގެ ކެމްޕެއިނަށް ހަރަކާތްތަކެއް ބާއްވާފައިވަނިކޮށެވެ.
އެގޮތުން، ހުޅުމާލޭގައި އެމްޑީޕީން ޖަގަހައެއް ހުޅުވަން މިދިޔަ ހަފުތާގައި ބޭއްވި ރަސްމިއްޔާތުގައި ރައްކާތެރިކަމުގެ ފިޔަވަޅުތައް ނެތުމުން އެތައް ބައެއްގެ ފާޑުކިޔުން އަމާޒުވި އެވެ. ނަމަވެސް އެ ޕާޓީން ބުނީ ރަސްމިއްޔާތު ބޭއްވީ އެޗްޕީއޭގެ ހުއްދަ ލިބިގެން ކަމަށެވެ.
މިއީ، އެޗްޕީއޭގެ ގައިޑްލައިނާ ހިލާފުވެގެން އެމްޑީޕީ ޖޫރިމަނާކުރި ފުރަތަމަ ފަހަރެވެ.
ސަރުކާރުގެ އެކި ކަންކަމާ މެދު ހިތްހަމަނުޖެހި އިދިކޮޅު ކޯލިޝަނުން އަންނަނީ ކޮންމެ ހުކުރު ދުވަހަކު މުޒާހަރާ ކުރަމުންނެވެ. އެ މުޒާހަރާއިން މީހުން ހައްޔަރުކޮށް ދޫކޮށްލަނީ ޖޫރިމަނާކުރުމަށް ފަހުގަ އެވެ.
