މަލީހަށް ފިޔަވަޅު އަޅަން ކޮމިޓީއަކުން ނުނިންމާ

ރައްޔިތުންގެ މަޖިލީހަށް އޮޅުވައިލެއްވި ކަމަށް ތުހުމަތުކޮށް، ކުރީގެ ކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލާ ދެކޮޅަށް ދައުވާކުރަން މަޖިލީހުގެ އިމްތިޔާޒާއި ސުލޫކު ކޮމިޓީން ނިންމާފައިވާ ކަމަށް ބައެއް މީޑިއާތަކުން ރިޕޯޓްކޮށްފައި އޮތަސް އެއީ އޮޅުމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

މަޖިލީހުގެ އިމްތިޔާޒާއި ސުލޫކު ކޮމިޓީން މަލީހުގެ މައްސަލަ ބެލީ އޭނާގެ އިތުބާރު ނެތްކަމަށް ފާސްކުރި ޖަލްސާގައި މަޖިލީހުގެ މެމްބަރުންނަށް ކުރެއްްވި ތުހުމަތުތަކަކާ ގުޅިގެންނެވެ. އެ ދުވަހު މަލީހު ތުހުމަތުކުރެއްވީ މަޖިލީހުން މިނިސްޓަރުންނަށް ބިރުދައްކާ ކަަމަށެވެ. ކުރީގެ ޖެންޑާ މިނިސްޓަރު ޝިދާތާ ޝަރީފު އިސްތިއުފާ ދެއްވީ ވެސް އެހެންވެ ކަމަށް އޭނާ އެ ދުވަހު ވިދާޅުވި އެވެ.

މަލީހުގެ ތުހުމަތުތައް އިމްތިޔާޒް އަދި ސުލޫކު ކޮމިޓީން ތަހުގީގުކުރަން ހުށަހެޅުއްވީ މަޖިލީހުގެ ރައީސް މުހައްމަދު ނަޝީދެވެ. އެ މަނިކުފާނު ވިދާޅުވީ މަލީހު މަޖިލީހަށް ތުހުމަތުކުރެއްވި އިރު ހަގީގަތާ ހިލާފަށް ވާހަކަދައްކަވާފައިވޭތޯ ބެލުމަށް އެ މައްސަލަ ތަހުގީގުކޮށް، ދައުވާކުރެވެން އޮތް ނަމަ އޭނާއާ ދެކޮޅަށް ދައުވާ ވެސް ކުރައްވާނެ ކަމަށެވެ.

އެކަމަކު މާޗް، 24 ގައި ކޮމިޓީންް ނިންމީ މަލީހު ދެއްކެވީ "އަސްލެއް ނެތް ވާހަކައެއްކަން އެނގޭތީ" އޭނާގެ މައްސަލަ އިތުރަށް ނުބަލައި ފައިލް ކުރުމަށެވެ. އެހެންވެ، މަލީހު ދެއްކެވީ ހަގީގަތާ ހިލާފު ވާހަކައެއް ނަމަ އޭނާއާ ދޭތެރޭ ފިޔަވަޅު އަޅާނެ ކަމަށް ނަޝީދު ވިދާޅުވި ނަމަވެސް ކޮމިޓީން ނިންމީ އެ ގޮތަކަށް ނޫނެވެ.

Imthiyaaz committee in nimmee Maleeh ah fiyavalhu naalhai massala file kuran

The most trusted news source in the Maldives

Mihaaru

މަޖިލީހުގެ މިއަދުގެ ޖަލްސާ އަށް ކޮމިޓީގެ މުގައްރިރު އަދި ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފު އެ ރިޕޯޓް ހުށަހަޅުއްވައި ނިންމަވައިލެއްވުމުން ރިޔާސަތުން މަޖިލީހުގެ ރައީސް ނަަޝީދު އެދިވަޑައިގަތީ ކޮމިޓީގެ ނިންމުން އަލުން ތަކުރާރު ކޮށްދެއްވުމަށެވެ.

ނަޝީދުގެ އެދިވަޑައިގަތުމަށް، ޔާސިރު އެ ނިންމުން ތަކުރާރު ކުރެއްވި އިރު ވެސް، ނިންމުމުގައި ހަވާލާދީފައި އޮތީ މާޗް، 24 ގައި ކޮމިޓީން ނިންމި ނިންމުމަށެވެ. އެއީ މަލީހު ދެއްކެވީ ހަގީގަތާ ހިލާފު ވާހަކައެއް ކަމަށް ބަލައި، މައްސަލަ ފައިލް ކުރުމެވެ. އެކަމަކު ފައިލް ކުރުމަކަށް ރިޕޯޓްގައި ސާފުކޮށް ބުނެފައެއް ނެތެވެ.

"އަޅުގަނޑު ފާހަގަކޮށްލަން ބޭނުން، މީޑިއާގަ އާއި އަދި އާއްމުންގެ ތެރޭގައި މި ރިޕޯޓާ ގުޅޭ ގޮތުން އޮޅުން އަރާފައި ވާކަން. އަަޅުގަނޑުހިތުން މިހާރު އެ އޮޅުން ސާފުވެގެންދާނެ،" ކޮމިޓީގެ ނިންމުން ޔާސިރު ތަކުރާރުކުރެއްވުމުން ރިޔާސަަތުން ނަޝީދު ވިދާޅުވި އެވެ.

ބެލެވޭ ގޮތުގައި މަލީހާ ދެކޮޅަށް ދައުވާކުރަން ނިންމި ކަމަށް ބައެއްް މީޑިއާތަކުން ރިޕޯޓްކުރީ، މަޖިލީހަށް އިތުރުފުޅު ހައްދަވައިފި ނަމަ، އެކަމުގައި އެޅިދާނެ ފިޔަވަޅުތައް، މަޖިލީހުގެ ގަވައިދާ ހަވާލާދީ ރިޕޯޓްގައި ފާހަގަކޮށްފައި އޮތުމުންނެވެ. އެކަމަކު ރިޕޯޓްގައި އެ ކަންތައްތައް އޮތީ "ފާހަގަކުރެވޭ" ކަންތައްތަކުގެ ތެރޭގަ އެވެ. ނަމަވެސް ނިންމުމަކު ނެތެެވެ.

އެ ރިޕޯޓާއި މެދު ގޮތެއް ނިންމާނީ މަޖިލީހުގެ ތަޅުމުގައި ނަގާ ވޯޓަކުންނެވެ. އެ ރިޕޯޓަށް ބަހުސް ކުރައްވަން މިއަދު ހުޅުވައިލި ފުރުސަތުގެ ބޭނުން އެއްވެސް މެމްބަރަކު ނުކުރައްވަ އެވެ.