ގޯޅި ހަނިކަމުން ނަޝީދަށް ސެކިއުރިޓީ ދޭން އުނދަގޫ މައްސަލަ އޮތީ ސަމާލުކަމަށް ގެނެސްފައި

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ރޭ އެއްޗެއް ގޮއްވައިލީ، ގެކޮޅު ގ. ކެނެރީގެ ހުންނަ ނީލޯފަރު ހިނގުން ހަނިކަމުން އެ މަނިކުފާނަށް ސެކިއުރިޓީ ދޭން އުނދަގޫވާ ކަމަށް އެމްއެންޑީއެފުން މާލެ ސިޓީ ކައުންސިލަށް އަންގާފައި އޮއްވައިކަން ސޯޝަލް މީޑިއާގައި އާންމުކޮށްފައިވާ ސިޓީއަކުން އެނގިއްޖެ އެވެ.

މާލެ ސިޓީ ކައުންސިލްގެ މޭޔަރު ޝިފާ މުހައްމަދު "މިހާރު" އަށް މިރޭ ވިދާޅުވީ، ނަޝީދަށް ސެކިއުރިޓީ ދޭން އުނދަގޫވާ ކަމަށް އެމްއެންޑީއެފުން އެންގުމުން އެކަން ޕްލޭނިން މިނިސްޓްރީގެ ސަމާލުކަމަށް އެތައް ފަހަރަކު ގެނެސްފައިވާ ކަމަށެވެ. އެ މައްސަލައާ ގުޅިގެން އިތުރު ތަފުސީލެއް އޭނާ ނުދެއްވަ އެވެ.

ނަޝީދު މިހާރު ދިރިއުޅުއްވަނީ އެ މަނިކުފާނުގެ އާއިލާގެ ގެކޮޅު ކެނެރީގޭގަ އެވެ. އެ ގެކޮޅު ހުންނަނީ ވަރަށް ހަނި ގޯޅިއެއްގައި ކަމަށް ވާއިރު، މަގުގެ އެއް ފަރާތުގައި ސައިކަލްތައް ޕާކް ކޮށްފައި ހުރުމުން ހަތަރު ފުރޮޅުލީ އުޅުނދުތަކެއް މަގަކަށް ނުވަދެ އެވެ. އަދި އެއީ ސައިކަލްތައް ދުއްވާ މަގަކަށް ވެފައި، މަގުގެ ހަނިކަމަށް ބަލާއިރު ހިނގާފައި ވެސް ދާން އުނދަގޫ ވާނެ އެވެ. ނަޝީދުގެ ކާރުކޮޅު ވެސް އާންމުކޮށް ޕާކް ކޮށްފައި އޮންނަނީ ކެނެރީގެ ހުންނަ ގޯޅިން މަޖީދީމަގާ ވީ ފަރާތުން އެ ގޯޅީގެ ކަންމަތީގަ އެވެ.

ނީލޯފަރު މަގުގައި ޕާކްނުކުރެވޭ ގޮތް ހަދައި، އެ ސަރަހައްދުގައި ޕާކުކޮށްފައިވާ ވެހިކަލްތަކަށް ހާއްސަ ޕާކިން ޒޯނެއް ބިއްލޫރިޖެހިގޭގައި ހެދުމުގެ ހުއްދަ އަށް އެދި ސިޓީ ކައުންސިލް މާޗު 23، 2021 ގައި ޕްލޭނިން މިނިސްޓްރީއަށް ސިޓީއެއް ފޮނުވި އެވެ. ނަމަވެސް އެނގިފައިވާ ގޮތުގައި ޕްލޭނިން މިނިސްޓްރީން އެކަމަށް އެއްވެސް ޖަވާބެއް ދީފައެއް ނުވެ އެވެ.

"ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިހާރު ދިރިއުޅުއްވަމުން ގެންދވާ ގެކޮޅު ކަމުގައިވާ ގ. ކެނެރީގެ ހުންނަ ނީލޯފަރު ހިނގުން މަގަކީ ހަނި ގޯޅިއަކަށް ވެފައި އަދި އެ ގޯޅީގެ އެއްފަރާތުގައި ސައިކަލް ޕާކުކޮށްފައި ހުރުމުގެ ސަބަބުން އެ މަނިކުފާނަށް ސެކިއުރިޓީ ފޯރުކޮށްދިނުމަށް ދަތިތަކާ ކުރިމަތިވާކަމަށް ނޭޝަނަލް ޑިފެންސް ފޯސް އިން ވަނީ މި އިދާރާ އަށް އަންގަވާފަ އެވެ. އަދި އެ މަގު ސައިކަލް ޕާކްނުކުރެވޭ މަގަކަށް ހަދައި ދިނުމަށް ވެސް ވަނީ އެދިލައްވާފަ އެވެ،" ހައުސިން މިނިސްޓަރު މުހައްމަދު އަސްލަމަށް މާލޭ ސިޓީ ކައުންސިލުން މިދިޔަ މާޗު 23 ގައި ފޮނުވި ސިޓީގައި ވެ އެވެ.

ސޯޝަލް މީޑިއާގައި އާންމު ކޮށްފައިވާ އެ ސިޓީގައި ވާ ގޮތުން މާލޭ ސިޓީ ކައުންސިލުން އެދިފައި ވަނީ ނަޝީދުގެ ގެކޮޅު ހުންނަ ގޯޅީގައި ޕާކް ކޮށްފައިވާ އުޅަނދުތަކަށް ހާއްސަ ކޮށްގެން ކަމަށް ވާތީ، އެ ތަނުގައި ޕާކިން ޒޯނެއް ހެދުމުގެ ހުއްދަ ދިނުމަށެވެ.

ބިއްލޫރިޖެހިގެ އަކީ މޯލްޑިވްސް ކުރިން ނޭޝަނަލް ލައިބްރަރީ އަދި މިހާރު މޯލްޑިވްސް މީޑިއާ ކައުންސިލާއި ބްރޯޑްކާސްޓިން ކޮމިޝަނާއި ޖެންޑާ މިނިސްޓްރީ ހުންނަ ބިމުގެ ސަރަހައްދެވެ.

ފޮޓޯ ގެލަރީ / ނަޝީދަށް ދިން ހަމަލާ

ނަޝީދަށް ހަމަލާ ދީފައި ވަނީ އެމަނިކުފާނު ދިރިއުޅުއްވާ ގެ ކައިރީ ޕާކު ކޮށްފައި ހުރި ސައިކަލެއްގައި ގޮވާ އެއްޗެއް ހަރު ކޮށްގެނެވެ. އަދި އެމަނިކުފާނު ކާރަށް އަރުއްވަން ވަޑައިގެންނެވި ވަގުތަށް އޭތި ގޮއްވާލުމުން، ނަޝީދުގެ އިތުރުން ހަތަރު މީހަކަށް ވަނީ އަނިޔާވެފަ އެވެ.

އެ ހޮސްޕިޓަލުން ބުނީ 16 ގަޑިއިރުގެ ތެރޭގައި ކުރި ކާމިޔާބު އޮޕަރޭޝަންތަކަކަށް ފަހު ނަޝީދު މިހާރު ބާއްވާފައި އޮތީ އައިސީޔޫގައި ކަމަށާއި އެ މަނިކުފާނުގެ ހާލަތު ކްރިޓިކަލް ކަމަށެވެ. ނަޝީދުގެ ބޮލާއި އަތާއި ފައިގެ މަސްގަނޑާއި ފުރަމެ އަދި ބަނޑުގެ ސާޖަރީއެއް ވަނީ ހަދައިފަ އެވެ.

ފުލުހުން މިއަދު މެންދުރު ބޭއްވި ނިއުސް ކޮންފަރެންސްގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ އެ ހަމަލާއާ ގުޅުން ހުރި ކަމަށް ޝައްކުކުރެވޭ ހަތަރު މީހަކު ފާހަގަކުރެވިފައިވާ ކަމަށެވެ. އެ މީހުން އައިޑެންޓިފައި ކުރުމާއި އަޅަން ޖެހޭ ފިޔަވަޅުތައް އެޅުމުގެ މަސައްކަތް ފަށައިގެން ކުރިޔަށް ދާ ކަމަށް ހަމީދު ވިދާޅުވި އެވެ.