ރޭ ހުޅުމާލޭ ގެސްޓުހައުސްއެއްގެ ކައިރިން، ލޭކޮށާލާފައި އޮތް މީހަކު ފެނިއްޖެ ކެވެ. އެނގިފައިވާ ގޮތުގައި ތިން ބުރީގެ ގެސްޓުހައުސްގެ މަތިން އެ މީހާ ތިރިއަށް ވެއްޓުނު އިރު ވެސް އޮތީ ވަރަށް ބޮޑަށް ޒަހަމްވެފަ އެވެ.
މި ހާދިސާއާ ގުޅޭގޮތުން ފުލުހުން މިހާތަނަށް ބުނީ، ހުޅުމާލޭ ނިރޮޅުމަގުގެ ހަ ނަމްބަރު ގޯޅީގައި މީހަކު ވެއްޓިފައި އޮތްކަމުގެ މައުލޫމާތު ރޭ ތިނެއް ޖެހިއިރު ލިބިފައިވާ ކަމަށެވެ. އަދި އެއީ 21 އަހަރުގެ ފިރިހެނެއް ކަމަށާއި އައިޖީއެމްއެޗަށް ގެންދިޔަ އިރު ވެސް އެ ޒުވާނާ އޮތީ ހޭނެތިފައި ކަމަށް ފުލުހުން ބުންޏެވެ.
ގެސްޓްހައުސް ހިންގާ އިމާރާތުގެ ވެރިމީހާ "މިހާރު" އަށް ބުނީ އޭނާއަށް އެކަމުގެ މައުލޫމާތު ލިބުނީ ރޭ ފަތިހު ފަހެއް ޖަހާކަންހާއިރު ކަމަށާއި އޭނާ އެތަނަށް ދިޔަ އިރު، ޒުވާނާ ވެއްޓިފައި އޮތްތަން ފުލުހުން ސާފުކޮށްފައިވާ ކަމަށެވެ. އެކަމަކު ގެސްޓް ހައުސްކައިރީގައި ވަރަށް ބޮޑަށް ލޭ ހެދިފައިވާ ކަމަށް، ފުލުހުންނާ ހަވާލާދީ އޭނާ ބުންޏެވެ. ބައެއް މީހުން ބުނާ ގޮތުން އެ ޒުވާނާ އޮތީ ހަމައެކަނި ބޮކްސާކޮޅާ އެކު އެވެ.
"މިހާރު" އަށް ލިބިފައިވާ ކުރު ވީޑިއޯ ކްލިޕެއްގައި ފެންނަ ގޮތުން، އޭނާގެ ގައިގެ އެކި ތަންތަން ވަނީ ޒަހަމްވެފަ އެވެ. އޭނާ އޮތީ ލޭތަކެއްގެ ތެރޭގަ އެވެ.
ގޭގެ ވެރިމީހާ ބުނިގޮތުގައި އިމާރާތަށް ވެފައިވާ ގެއްލުން ބެލުމަށް، ތިން ބުރިއަށް ހަދާފައި ހުންނަ ގެސްޓުހައުސްގެ ޓެރަސް އަށް އެރި އިރު، އެތަނުގައި ވެސް އޮތީ ހުސް ލެޔެވެ. ޓެރަސްގެ މަތިން އަދި ކުޑަތަންކޮޅެއް ހަދައި، އެތަނުގެ މަތީގައި ސޯލާ ޕެނަލް ޓިއުބް ހަރުކޮށްފައި ހުރިއިރު، އެތަން ވެސް ހުރީ ހަލާކުވެފަ އެވެ. އަދި އެތަނުން ޓެރަސްމައްޗަށް ފައިބަން ހުންނަ ހަރުގަނޑުގައި ވެސް ހުރީ ލޭ ކަމަށް އޭނާ ބުންޏެވެ.
"ޓެރަސްގެ މަތީގައި، ސޯލާ ޓިއުބްގެ އެތިކޮޅުތައް ވެސް ހުރި. އެހެންވެ، ބޮޑަށް ލަފާކުރެވެނީ ޖެހިގެން ހުރި ހަަތަރު ބުރީގެ އިމާރާތުން އޭނާ އެތަނަށް ވައްޓާލީ ކަމަށް ނުވަތަ ފުންމާލީ ކަމަށް،" އިމާރާތުގެ ވެރިމީހާ ބުންޏެވެ.
ޓެރަސްމަތީގައި ލޭގެ ކޯރު ހެދިފައިވާއިރު، އެތަނަށް ވެސް ވަނީ ގެއްލުން ވެފަ އެވެ. ޓެރަސްގެ ބިއްލޫރިން ހަދާފައިވާ ބެލްކަނީގެ ރެއިލިން ވެސް ހުރީ ތަޅައިގެން ގޮސްފަ އެވެ.
އިމާރާތުގެ ވެރިމީހާ ބުނީީ އެއީ ގެސްޓުހައުސްގައި ޗެކިން ވެފައިވާ މީހެއް ނޫން ކަމަށާއި އެތަން ހުރީ ހުސްކޮށް ކަމަށެވެ. އެހެންވެ، އެ މީހުން އެތަނަށް ވަން ގޮތެއް ވެސް، އަދި މަންޒަރު ދުށް މީހަކާ ދިމާވެފައި ނުވާތީ ވީ ގޮތެއް ވެސް މީހަކަށް ނޭނގެ އެވެ.
"އަޅުގަނޑުމެންނަށް އެނގުނީ ގެސްޓްހައުސްއިން މީހަކު ވެއްޓުނުކަން. އެއީ ކާކުކަމެއް، ކިހިނެއްވީ ކަމެއްކަން އަދިވެސް ނޭނގޭ،" އޭނާ ބުންޏެވެ.
