ޝިގެއްލާގައި މަރުވި މީހުންނަށް ވުރެ ކޮވިޑްގެ މަރުތައް ރާއްޖޭގައި ގިނަވެއްޖެ!

ތިނަދޫ ކޮވިޑް ފެސިލިޓީގައި އިއްޔެ މަރުވި އުމުރުން ދުވަސްވީ މީހާއާ އެކު، ކޮވިޑްގައި ރާއްޖެއިން މަރުވި މީހުންގެ އަދަދު ވަނީ 200 އަށް އަރައިފަ އެވެ. މިއީ ފަހުގެ ތާރީހެއްގައި ރާއްޖެ އަށް ކުރިމަތިވި ބޮޑެތި ބަލިމަޑުކަމުގެ ތެރެއިން، ދެ ވަނަ ބޮޑު ރޯގާ ނުވަތަ ޝިގެއްލާގައި މަރުވި މީހުންނަށް ވުރެ ވެސް ގިނަ އަދަދެކެވެ. އެ ބަލީގައި މުޅި ރާއްޖެއިން މަރުވީ 197 މީހުންނެވެ.

ބޭރަށް ހިންގުމުގެ ރޯގާއެއް ކަމަށްވާ ޝިގެއްލާ ރާއްޖެއިން ފެނުނީ 1982 ވަނަ އަހަރު އެވެ. އިންޑިއާ އާއި މާލެއާ ދެމެދު ދަތުރުކުރާ ބޯޓެއްގެ ފަޅުވެރިޔެއްގެ ފަރާތުން އައި ކަމަށް ބެލެވޭ ޝިގެއްލާ ފުރަތަމަ ފެތުރެން ފެށީ މާލޭގަ އެވެ. އޭގެ ފަހުން ރާއްޖޭގެ އެކި ހިސާބުތަކަށް ފެތުރުނެވެ.

އެ ބަލި ކޮންޓްރޯލް ކުރެވުނުއިރު، މުޅި ރާއްޖެއިން 13،752 މީހަކަށް ބަލި ޖެހި، މާލެއިން އެކަނި ވެސް 3،950 މީހަކަށް ބަލި ޖެހިގެން ފަރުވާދީފައިވެ އެވެ. އަދި އެންމެ ގިނައިން މީހުން މަރުވީ ވެސް މާލެއިންނެވެ. އެއީ 33 މީހެކެވެ.

ބަލީގެ ނުރައްކާތެރިކަން ބޮޑުވާން ފެށުމުން އޭރު ވެރިކަމުގައި ހުންނެވި ރައީސް މައުމޫން އަބްދުލްގައްޔޫމް އިސްކޮށް ހުންނަވައި، ހާއްސަ ޓާސްކް ފޯހެއް އުފެއްދެވި އެވެ. ރަށްރަށަށް ޓީމުތަކާއި ބޭހާއި ބޭނުންވާ އެހެން ޒަރޫރީ އެއްޗެހި ފޮނުވުމުގެ ރޭވުންތަކާއި އަދި އަޅަން ޖެހޭ ފިޔަވަޅުތައް ނިންމީ ވެސް މި ޓާސްކް ފޯހުގެ ބެލުމުގެ ދަށުންނެވެ.

ޝިގެއްލާގެ ކުރިން 1977 ގައި ރާއްޖެ އަށް ކުރިމަތިވި ބޭރަށް ހިންގުމުގެ އެހެން ބޮޑު ރޯގާއެއް ކަމަށްވާ ކޮލެރާގައި ވެސް ވަރަށް ގިނަ އަދަދެއްގެ މީހުން މަރުވި އެވެ.

ކޮލެރާގައި ރާއްޖެއިން އެންމެ ފުރަތަމަ މަރުވީ ލ. މާމެންދޫގައި ދިރިއުޅެމުން އައި އެ އަތޮޅު ފޮނަދޫ މީހެކެވެ. މަސްވެރިކަމަށް ނިކުމެ އުޅެނިކޮށް، އެ މީހާ ހޮޑުލައި ބޭރަށް ހިންގި އެވެ. ދޯނި ރަށަށް ދިޔައިރު އޭނާގެ ހާލު ވަރަށް ސީރިއަސް އެވެ. އެހެންކަމުން ރަށު މީހުން ނިންމީ އާއިލާ ކައިރިއަށް ފޮނަދު އަށް ގެންދާށެވެ. އެކަމަކު އެ ނަސީބު އޭނާ އަށް ނުލިބި، ކަނޑުމަތީގައި މަރުވީ އެވެ.

ކޮލެރާ ރާއްޖޭގައި ކޮންޓްރޯލްވީ އިރު، 252 މީހަކު އެ ބަލީގައި މަރުވި އެވެ.

ޗައިނާގެ ވޫހާން ސިޓީން ފުރަތަމަ ފެނުނު ކޮވިޑް، މިހާރު މުޅި ރާއްޖެ އަށް ވެސް ފެތުރިފައި އޮތް އިރު، މި ބަލީގައި އެންމެ ގިނަ މީހުން މަރުވީ މިިދިޔަ މަހު އެވެ. އެއީ 88 މީހެކެވެ. މިދިޔަ މަހުގެ ނުވަ ދުވަހެއް، ފިޔަވައި ކޮންމެ ދުވަހަކު ވެސް ބަލީގައި މީހަކު މަރުވެފައިވެ އެވެ. އެންމެ ގިނަ މީހުން މަރުވީ 24 ވަނަ ދުވަހު އެވެ. އެ ދުވަހު 13 މީހަކު މަރުވި އެވެ.

މި ބަލީގައި އެންމެ ހަގު އުމުރުގެ ކުއްޖެއް ވެސް މަރުވީ މިދިޔަ މަހު އެވެ. އެއީ 10 އަހަރުގެ ކުއްޖެކެވެ.

މި ހިނގާ ޖޫން މަސް ދެބައިވީ އިރު، މި މަހުގެ މިހާތަނަށް ވެސް 33 މީހަކު މަރުވެފައިވެ އެވެ.

ކޮވިޑް ޖެހޭ މީހުންގެ އަދަދު މިދިޔަ މަހެއްހާ ދުވަހު ވަރަށް މަތީގައި ހުރުމަށް ފަހު މިހާރު ވަނީ މަޑުމަޑުން ދަށްވާން ފަށައިފަ އެވެ.