ކޮވިޑް-19 ގެ ވެކްސިން ފުރިހަމަކޮށް، 14 ދުވަސް ފަހުން ރާއްޖެ އަންނަ ދިވެހިންނާއި ވޯކް ޕާމިޓް ހޯލްޑަރުން ކަރަންޓީނުވާން ނުޖެހޭ ގޮތަށް އެޗްޕީއޭ އިން މިރޭ އުސޫލަށް ބަދަލު ގެނެސް އެ އުސޫލު އާންމުކޮށްފި އެވެ.
އެ އިދާރާ އިން ބުނީ ކޮވިޑަށް ޕޮޒިޓިވްވެ، ބަލިން ރަނގަޅުވެފައިވާ މީހުންގެ ތެރެއިން ސާމްޕަލް ނެގި ތާރީހުން ފެށިގެން 60 ދުވަސް ނުވާ މީހުންނާއި ދުނިޔޭގެ ސިއްހަތު ޖަމިއްޔާގެ އިމަޖެންސީ ޔޫޒާސް ލިސްޓުގައި ހިމެނޭ ކޮވިޑް ވެކްސިނެއް ފުރިހަމަކޮށް، 14 ދުވަސްވެފައިވާ ނަމަ ރާއްޖެ އެތެރެވުމަށް ފަހު ކަރަންޓީނުވާކަށް ނުޖެހޭނެ އެވެ.
މި އުސޫލަށް އަމަލު ކުރަން ފަށާނީ މި މަހުގެ 26 ގަ އެވެ.
މި ބަދަލުގެ ދަށުން އެ މީހުންނާ އެކު ދަތުރުކުރާ، ވެކްސިން ނުޖެހޭ އުމުރުފުރާގެ ކުދިން ވެސް ކަރަންޓީނުވާކަށް ނުޖެހޭނެ އެވެ.
އެކަމަކު، ރާއްޖެ އަށް އެތެރެވުމުގެ ކުރިން އެންމެންގެ އަތުގައި ވެސް 72 ގަޑިއިރު ނުވާ ނެގެޓިވް ޕީސީއާރު ނަތީޖާއެއް އޮންނަން ޖެހެ އެވެ. އަދި ވެކްސިން ފުރިހަމަކޮށްފައިވާ މީހުންނާ އެކު ދަތުރުކުރާ ކުޑަކުދިން ރާއްޖެ އެތެރެވެ، 5-7 ދުވަހުގެ ތެރޭގައި ޕީސީއާރު ޓެސްޓެއް ހަދަން ޖެހެ އެވެ.
އެޗްޕީއޭ އިން ބުނިގޮތުގައި، އެ މީހުން ފިޔަވައި އިތުރު މީހުން ރާއްޖެ އެތެރެވުމަށް ފަހު 14 ދުވަހުގެ ކަރަންޓީނުގެ މުއްދަތެއް ފުރިހަމަކުރަންޖެހޭނެ އެވެ. އަދި ކަރަންޓީނުން ދޫކޮށްލާނީ ޕީސީއާރު ޓެސްޓް ހަދައި ނެގެޓިވްވުމުން ކަމަށެވެ.
ދަތުރުކުރުމުގެ ކުރިން އެޗްޕީއޭގެ ހާލު ބެލުން ޕޯޓަލްގައި ދަތުރުކުރުމުގެ ހުއްދައަށް ވެސް އެދެން ޖެހެ އެވެ. އެޗްޕީއޭ އިން ބުނީ ވެކްސިން ފުރިހަމަކުރި މީހުންނަށް ދީފައިވާ ލުއިތައް އެ ގައުމެއްގައި ބަލީގެ ހާލަތު އޮތް ގޮތަށް ބަލައި ބަދަލުކުރާނެ ކަމަށެވެ.
ވޯކް ޕާމިޓުގައި ދެކުނު އޭޝިއާ އިން ރާއްޖެ އަންނަ މީހުންގެ ތެރެއިން ކޮވިޑް-19 ވެކްސިން ފުރިހަމަ ކޮށްފައިވާ މީހުން ކަރަންޓީން ވާން ޖެހޭ މުއްދަތު ހަތް ދުވަހަށް ވެސް އެޗްޕީއޭ އިން ވަރަށް ފަހުން ކުރުކޮށްދިނެވެ. އެކަމަކު އޭރު އެ ގައުމުތަކުން ރާއްޖެ އާދެވޭނީ 96 ގަޑިއިރު ނުވާ ޕީސީއާރު ނެގެޓިވް ޓެސްޓު ނަތީޖާއަކާ އެކުގަ އެވެ.
