މާލެތެރޭގައި ގިނަ ދުވަސްތަކެއް ވަންދެން ޕާކުކޮށް، ބާވެފައި ހުރި ވެހިކަލްތައް ނަގަން މިއަދު ފަށައިފި އެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ މަގުތަކަށް އުކާލައި، ބޭނުން ނުކުރެވޭ ހާލަތުގައި ހުރި ވެހިކަލްތައް ސިޓީ ކައުންސިލާއި ފުލުހުންނާ ގުޅިގެން ކުރިއަށް އޮތް ދެ ހަފުތާގެ ތެރޭގައި ނަގާނެ ކަމަށެވެ.
ގާނޫނުގައި ބުނާގޮތަށް، ވެހިކަލްގެ ވެރިމީހާ ހަވާލުވެގެން އެ ގެންދަން ދެ މަސް ދުވަހުގެ މުއްދަތެއް ދޭނެ އެވެ. އެ އުޅަނދެއް ނައްތައިލާނީ އޭގެ ފަހުންނެވެ.
ބޭނުން ނުކުރެވޭ ހާލަތުގައި ހުރި ވެހިކަލްތައް ނަގަން ފެށިއިރު، ސިޓީ ކައުންސިލުން ވަނީ ވެހިކަލް އެތެރެކުރާ އަދަދު ކޮންޓްރޯލް ކުރުމަށް މަސައްކަތް ފަށައިފަ އެވެ. އެ ކަމަށް ބޭނުންވާ މައުލޫމާތުތައް ފޮނުވައި ދިނުމަށް ޓްރާންސްޕޯޓް މިނިސްޓްރީގައި ވެސް އެދިފައި ވާއިރު، އެ ނިންމުން ތަންފީޒު ކުރަން ފެށުމުން މާލެ ސަރަހައްދަށް ވެހިކަލް އެތެރެކުރާ އަދަދާއި ވެހިކަލްތަކުގެ އުމުރު ކަނޑައެޅޭނެ ކަމަށް ޑރ. މުއިއްޒު ވިދާޅުވި އެވެ.