މާލޭގެ މަގުމައްޗަށް އުކާލާފައިވާ ވެހިކަލްތައް ނެގުން މާލޭ ސިޓީ ކައުންސިލުން ކުރިއަށް ގެންދަނީ އިންސާފުން ނޫން ކަމަށް ބުނެ ރޭ ލިބުނު ޝަކުވާއަކާ ގުޅިގެން އެ މަސައްކަތް ވަގުތީ ގޮތުން ހުއްޓާލާފައިވާ ކަމަށް އެ ކައުންސިލުން މިރޭ ބުނެފި އެވެ.
އެ ޝަކުވާ ހުށަހެޅީ ކައުންސިލުން ބުނިގޮތުގައި، މާލޭގެ ތަރައްގީގެ ޕްލޭނަށް ހިޔާލު ހޯދަން ގަލޮޅުގެ ރައްޔިތުންނާއެކު ސިޓީ ކައުންސިލުން ރޭ ބޭއްވި ބައްދަލުވުމުގައި ވާހަކަ ދެއްކި އާންމު މީހެކެވެ.
ގަލޮޅުގެ އެ މީހާގެ ފަރާތުން އެ ޝަކުވާ ލިބިވަޑައިގަތުމުން މޭޔަރު ޑރ. މުހައްމަދު މުއިއްޒު އެ ވާހަކަ ގަބޫލު ކުރެއްވީ ކަމަށް ސިޓީ ކައުންސިލުން ބުނެ އެވެ. އެހެންވެ، ހަލާކުވެގެން މަގުމައްޗަށް ދޫކޮށްފައިވާ ވެހިކަލްތަކާއި ނުދުއްވައި ގިނަ ދުވަސް ވެފައިވާ ވެހިކަލްތައް ނެގުން ވަގުތީ ގޮތުން ހުއްޓައިލައްވަން މޭޔަރު ނިންމެވީ އެ މަސައްކަތުގައި އިންސާފުވެރިކަން ކަށަވަރު ކުރުމަށް ކަމަށް ސިޓީ ކައުންސިލުން ބުންޏެވެ.
ޝަކުވާ ހުށަހެޅި އާންމު މީހާގެ މައިގަނޑު މައްސަލަ އަކީ މިއީ ކޮވިޑްގެ ދަތި ދުވަސްވަރަށް ވެފައި އާންމުން އެކި ތަންތަނުގައި ތާށިވެފައިވާއިރު، އެ މީހުން ދުއްވަމުން އައި ވެހިކަލްތައް މާލޭގެ މަގުތަކުގައި ހުންނާނެތީ، އެއީ ބޭނުން ނުކޮށް ދޫކޮށްލާފައިވާ ތަކެތި ކަމަށް ބަލާތީ އެވެ. އެހެންވެ، ސިޓީ ކައުންސިލުން ކުރަނީ ކިތަންމެ ރަނގަޅު މަސައްކަތަކަށް ވިޔަސް މި ދުވަސްވަރުގެ ގޮތުން އެގޮތަށް ވެހިކަލްތައް ނެގުން އިންސާފުވެރި ނޫން ކަމަށް އެ މީހާ ބުނެ އެވެ.
ސިޓީ ކައުންސިލުން އަމަލުކުރާ ގޮތުން، ކޮވިޑާ ގުޅިގެން ދިމާވެފައިވާ ވެފައިވާ މާލީ ދަތިތަކަށް އިތުރު ތަކުލީފެއް ކުރިމަތިވާ ކަމަށް ވެސް އެ މީހާއާ ހަވާލާދީ ކައުންސިލުން ބުންޏެވެ.
އެ މީހާ ސިޓީ ކައުންސިލްގައި އެދުނީ މިހާރަށް ވުރެ ރަނގަޅު އުސޫލެއް ހަމަޖައްސައިގެން ވެހިކަލްތައް ނެގުން ކުރިއަށް ގެންގޮސްދިނުމަށެވެ.
މާލޭގެ މަގުތަކަށް އުކާލާފައިވާ ވެހިކަލްތައް ނެގުމުގެ މަސައްކަތް ސިޓީ ކައުންސިލުން ފެށީ މިދިޔަ ހޯމަ ދުވަހު އެވެ.