ޓޫރިޒަމް މިނިސްޓްރީ އަށް ފޮނުވި ގޮތް ނޭނގޭ އެއްޗަކީ ކަދުރު ފޮއްޓެއްކަން "މިހާރު" އަށް އެނގިއްޖެ އެވެ.
ސަރުކާރުގެ ގިނަ އޮފީސްތަކެއް ހިންގާ ވެލާނާގެ އިމާރާތުގެ ފަސް ވަނަ ފްލޯގައި ހިންގާ ޓޫރިޒަމް މިނިސްޓްރީން ގޮތް ނޭނގޭ އެއްޗެއް ފެނިގެން ސިފައިންގެ "ބޮމްބް ޑިސްޕޮސަލް ސްކޮޑް" ވެސް އެ ތަނުގައި ހަރަކާތްތެރިވި އެވެ.
އޭގެ ފަހުން އެމްއެންޑީއެފުން ބުނީ އެ ތަނުން ފެނުނީ އެއްވެސް ގެއްލުމެއް ނެތް އެއްޗެއްކަން ޔަގީންކުރުމަށް ފަހު އެ އެތި ފުލުހުންނާ ހަވާލުކޮށްފައިވާ ކަމަށެވެ. އެނގިފައިވާ ގޮތުގައި ސިފައިން ހަވާލުކުރީ ކަދުރު އަޅާފައި ހުރި ފޮއްޓެކެވެ. ނަމަވެސް އެ ފޮށި ޓޫރިޒަމަށް ލިބުނު ގޮތެއް އަދި ސާފެއް ނުވެ އެވެ.
އެމްއެންޑީއެފުން ވަނީ އޮފީސްތަކުން ގޮތް ނޭނގޭ އެއްޗިއްސާ ހަވާލު ނުވުމަށް އިލްތިމާސްކޮށްފަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން އައިއީޑީއެއް ގޮއްވާލި ހާދިސާ އަށް ފަހު ސިފައިންނާއި ފުލުހުން ވެސް ޓެރަރިޒަމާ ގުޅުން ހުރި ކަންކަމަށް ދޭ ސަމާލުކަން ވަނީ އިތުރުކޮށްފަ އެވެ. މިފަދަ އަމަލުތައް ހިންގަފާނެ އަދި އެފަދަ ކަންކަމަށް ހިތްވަރު ދޭ މީހުންނާ ދެކޮޅަށް އޮޕަރޭންތަކެއް ވެސް ވަނީ ހިންގައިފަ އެވެ.
