އެމެރިކާގެ ދެކުނުން ގަލްފް އޮފް މެކްސިކޯގައި އުފެދުނު ބާރުގަދަ އައިޑާ ތޫފާން ލޫޒިއާނާ އަށް އަރައި ލިބުނު ބޮޑެތި ގެއްލުންތަކުގެ ތެރެއިން އެކަކު މަރުވެ، މިލިއަނަކަށް ވުރެ ގިނަ މީހުންނަށް ކަރަންޓުގެ ހިދުމަތް ކެނޑިއްޖެ އެވެ.
އިއްޔެ ކަނޑު ތެރޭގައި ހުރި ތޫފާން އިއްޔެ ހަވީރު ލޫޒިއާނާ އަށް އެރި އިރު، ވައިގެ ބާރުމިން ހުރީ ގަޑިއަކު 150 މޭލު ބާރުމިނުގަ އެވެ. ތޫފާން އެއްގަމަށް އެރި އިރު، އެ ސަރަހައްދު ދޫކޮށް ނުދެވުނު މީހުން، ގެތަކުން ނުނިކުމެ ތިބުމަށް ކަމާ ބެހޭ އިދާރާތަކުން ވަނީ އިރުޝާދު ދީފަ އެވެ.
ތޫފާނުގައި ޖެހުމުން ދިޔަ ބާރު ވައިގެ ސަބަބުން، ލޫޒިއާނާގެ ބާތޮން ރޮގް ސަރަހައްދުގައި ހުރި ގަހެއް، ގެއެއްގެ މައްޗަށް ވެއްޓި، އެ ގޭގައި ހުރި މީހަކު މަރުވި އެވެ. މަގުމަތީގައި ދަމާފައި ހުރި ކަރަންޓު ކޭބަލްތައް ބުރިވުމުގެ ސަބަބުން، ވަރަށް ބޮޑު ސަރަހައްދަކުން ވަނީ ކަރަންޓު ކެނޑިފަ އެވެ.
ކަމާ ބެހޭ އިދާރާތަކުން ބުނި ގޮތުގައި ލޫޒިއާނާގައި ދިރިއުޅޭ މީހުންގެ ތެރެއިން މިލިއަނަކަށް ވުރެ ގިނަ މީހުން މިހާރު ތިބީ ކަރަންޓުގެ ހިދުމަތުން މަހުރޫމްވެފަ އެވެ.
އެމެރިކާގެ މޫސުމާ ބެހޭ އިދާރާ އިން ބުނި ގޮތުގައި، އައިޑާ ތޫފާން އެއްގަމަށް އެރި ފަހުން މިހާރު ވަނީ ތޫފާނުގެ ބާރު ދަށްވެފަ އެވެ. މިހާރު ތޫފާނުގައި ވައި ޖެހެމުން ދަނީ ގަޑިއަކު 95 މޭލު ބާރުމިނުގައި ކަމަށްވާތީ، ތޫފާނުގެ ދަރަޖަ މިހާރުވަނީ އެކަކަށް ދަށް ކޮށްފައި ކަމަށް، މޫސުމާ ބެހޭ އިދާރާ އިން ބުނެ އެވެ.
ތޫފާންގެ މަރުކަޒު މިހާރު ހުރީ އެއްގަމުގައި ކަމަށް ވިޔަސް، ލޫޒިއާނާގެ ދެކުނު އައްސޭރިފަށުގެ ސަރަހައްދުގައި ކަނޑުގެ ބާނިތައް މިހާރު ވެސް ހުރީ 16 ފޫޓަށް އުފުލިފަ އެވެ. އެހެންކަމުން، ތޫފާނުގެ ކޮޅިގަނޑު މައިތިރިވާ އިރު، އައްސޭރިފަށުގެ އެއްގަމު ސަރަހައްދަށް ބޮޑެތި ގެއްލުންތަކެއް ލިބޭނެ ކަމަށް ބެލެވެ އެވެ.
އައިޑާ ތޫފާނުގައި ލޫޒިއާނާ އަށް ބޮޑެތި ގެއްލުންތަކެއް ލިބެމުން ދާތީ، އެމެރިކާގެ ރައީސް ޖޯ ބައިޑެން މިހާރު ވަނީ، މައި ސަރުކާރުގެ ފަރާތުން ލޫޒިއާނާ އަށް ކުއްލި އެހީތެރިކަން ފޯރުކޮށްދިނުމުގެ ގަރާރެއް ނެރުއްވައިފަ އެވެ. މި ގަރާރުގެ ދަށުން، ތޫފާނުގައި ގެއްލުން ލިބުނު މީހުންނަށް އެހީވުމަށާއި، ލިބުނު ގެއްލުންތައް ފޫބެއްދުމަށް، މަރުކަޒީ ސަރުކާރުން ލޫޒިއާނާގެ ސަރަހައްދީ ސަރުކާރަށް މާލީ އެހީތެރިކަން ފޯރުކޮށްދޭނެ އެވެ.
އޭގެ އިތުރުން، ހާލުގައި ޖެހިފައިވާ މީހުންނަށް އެހީތެރިވުމަށާއި، ތޫފާނުގައި ވެއްޓިފައިވާ ގަސްތައް ނެގުމާއި މަގުތައް ސާފުކުރުން ފަދަ ކަންކަމުގައި އެހީތެރިވުމަށް، ސިފައިން ވެސް އެ ސަރަހައްދަށް ފޮނުވާނެ އެވެ. އަދި އިންޝުއާ ނުކޮށް ހުރި މުދަލަށް ލިބުނު ގެއްލުންތައް ފޫބެއްދުމަށް، ލުއި ލޯނު ވެސް ދޫކުރާނެ އެވެ.
މޫސުމާ ބެހޭ ގައުމީ އިދާރާ އިން ބުނި ގޮތުގައި، އައިޑާ ތޫފާންގެ މަރުކަޒު ހުރި ރޭ ހުރި ލާޕެލަސް ސަރަހައްދަށް ވަރަށް ބޯކޮށް ވާރޭ ވެހި ބޮޑު ސަރަހައްދެއްގައި މިހާރު ވަނީ ފެންބޮޑުވެފަ އެވެ. އޭގެ ސަބަބުން އެތައް ބަޔަކު ގެތަކުން ބޭރަށް ނުނިކުމެވި ތާށިވެފައި އެބަތިބި ކަމަށްވެ އެވެ. އެ ސަރަހައްދުގައި ހުރި ހޮޓަލެއްގައި ތިބި ގިނަ އަދަދެއްގެ ބަޔަކު ވެސް، އެތަނުން ނެރެގެން ރައްކާތެރި ހިސާބަކަށް ގެންގޮސްދިނުމަށް ވަނީ އެދިފައި ކަމަށް މޫސުމާ ބެހޭ އިދާރާ އިން ބުނެ އެވެ.
އެ އިދާރާ އިން ބުނި ގޮތުގައި ތޫފާންގެ މަރުކަޒު ދަތުރުކުރަމުންދާ ރާސްތާގައި ހިމެނޭ ސަރަހައްދުތަކަށް، 6-12 އިންޗި އަށް ވާރޭ ވެހުނެވެ. އެނޫން ސަރަހައްދުތަކަށް 4-6 އިންޗި އަށް ވާރޭ ވެހުނެވެ.
މިހާރު ތޫފާންގެ އަސަރު އެންމެ ބޮޑަށް ކުރަމުންދާ އެއް ސަރަހައްދު ކަމަށްވާ، ލޫޒިއާނާގެ ސެންޓް ޗާލްސް ސަރަހައްދުގައި ހުންނަ އިމަޖެންސީ އޮޕަރޭޝަން ސެންޓަރުގެ ފޯނުގެ ހިދުމަތް ވެސް ހުރީ ކެނޑިފަ އެވެ. އެހެންކަމުން، އެހީ ފޯރުކޮށްދިނުމުގެ މަސައްކަތަށް ހުރަސްއެޅިފައިވާ ކަމަށް، އެ ސަރަހައްދުގެ މީހުން ބުނެ އެވެ.
އައިޑާ ތޫފާންގެ ބާރު އެންމެ ގަދަވި ވަގުތުކޮޅު މިހާރު ފާއިތުވެފައި ވިޔަސް، އަދިވެސް ގެތަކުން ނުނިކުމެ ތިބުމަށް ވަނީ އިރުޝާދު ދީފަ އެވެ. ތޫފާނުގެ މިސްރާބު ހުރި ގޮތަށް ބަލާއިރު، ކުރިއަށް އޮތް ދެ ދުވަހު ވެސް، އައިޑާ ތޫފާން ހުންނާނީ ލޫޒިއާނާގެ އެއްގަމު ސަރަހައްދުގައި ކަމަށް ބެލެވޭތީ، އިތުރު ގެއްލުންތައް ލިބުމުގެ ފުރުސަތު އެބަ އޮތެވެ.