ކުރީގެ ރައީސް އަބްދުﷲ ޔާމީނަށް މަނީ ލޯންޑަރިންގެ ކުށުގައި ހުކުމް ކުރި ފަނޑިޔާރުންގެ ބެންޗުން ތިން ފަނޑިޔާރަކު އެ ހުކުމާ ބެހޭ ގޮތުން ސުވާލު އުފެދޭ ގޮތަށް ވާހަކަ ދައްކަވާ ކަމަށް ބުނާ އޯޑިއޯ އަކީ ސައްހަ އެއްޗެއް ނޫން ކަމަށާއި މައްސަލައިގެ ތަހުގީގަށް އަޑުގެ ސާމްޕަލް ދެއްވަން ތިން ފަނޑިޔާރުން އެއްބަސްވެ ވަޑައިގެންފި އެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން މިރޭ ނެރުނު ބަޔާނެއްގައި ބުނީ ސޯޝަލް މިޑިއާގައި އިއްޔެ ލީކުކޮށްލި އޯޑިއޯގެ މައްސަލައިގެ ތަހުގީގު މިހާރު ފަށާފައިވާ ކަމަށާއި އެ ފަނޑިޔާރުން ކޮމިޝަނަށް ހާޒިރުކޮށް، ސުވާލު ކޮށްފައިވާ ކަމަށެވެ.
މީޑިއާގައި ދައުރުވަމުން ދަނީ ސައްހަ އޯޑިއޯތަކެއް ނޫން ކަމަށް ފަނޑިޔާރުން ވިދާޅުވެފައިވާ ކަމަށާއި އެފަދަ ވާހަކައެއް ދައްކަވާފައި ނުވާނެ ކަމަށް ތިން ފަނޑިޔާރުން ވިދާޅުވި ކަމަށް ޖޭއެސްސީން ބުންޏެވެ.
އެ ތަހުގީގު އިތުރަށް ކުރިއަށް ގެންދިއުމަށް އޯޑިއޯތަކުގެ އެނަލިސިސް ހެދުމަށް ފުލުހުންނަށް ޖޭއެސްސީން ހުށަހަޅާފައިވާ ކަމަށް އެ ކޮމިޝަނުން ބުންޏެވެ. އަދި ތަހުލީލަށް އަޑުގެ ސާމްޕަލް ދިނުމަށް އެ ފަނޑިޔާރުން ރުހުން ދީފައިވާ ކަމަށް ވެސް ޖޭއެސްސީން ބުންޏެވެ.
ނޮވެމްބަރު 28، 2019 ގައި ޔާމީން ޖަލަށް ލާން ހުކުމް ކުރީ ކްރިމިނަލް ކޯޓުގެ ފަސް ފަނޑިޔާރުންގެ ބެންޗެއްގެ އިއްތިފާގުންނެވެ.
އެ ބެންޗުގައި ހިމެނިވަޑައިގަތީ ރިޔާސަތު ބެލެހެއްޓެވި، ސުޕްރީމް ކޯޓުގެ މިހާރުގެ ފަނޑިޔާރު އަލީ ރަޝީދާއި ގާޒީ ހުސައިން ފާއިޒު ރަޝާދާއި ކްރިމިނަލް ކޯޓުގެ މިހާރުގެ އިސް ގާޒީ އަހުމަދު ޝަކީލާއި ގާޒީ އަލީ އާދަމާއި ޑްރަގް ކޯޓުގައި މިހާރު ހުންނެވި ގާޒީ މުހައްމަދު ސަމީރެވެ. އޭގެ ތެރެއިން ލީކުވެފައިވާ އޯޑިތަކުގައި ވަނީ ފަނޑިޔާރު ފާއިޒާއި ފަނޑިޔާރު އަލީ އާދަމްގެ އިތުރުން ފަނޑިޔާރު މުހައްމަދު ސަމީރުގެ އަޑު ކަމަށް އަންނަނީ ތުހުމަތުކުރަމުންނެވެ.
މި އޯޑިއޯތަކާ ގުޅިގެން، އިދިކޮޅު ޕީޕީއެމް/ޕީއެންސީ ކޯލިޝަނުން ބުނެފައި ވަނީ މިއީ ޔާމީންގެ ޝަރީއަތަށް ސަރުކާރުން ނުފޫޒު ފޯރުވާފައިވާ ކަމުގެ ހެއްކެއް ކަމަށާއި ޔާމީން ވަގުތުން މިނިވަންކުރަންޖެހޭ ކަމަށެވެ.
