ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލައި އިދިކޮޅު ޕީޕީއެމް/ޕީއެންސީ ކޯލިޝަނުން މިއަދު ހިނގާލުމެއް ބާއްވައިފި އެވެ.
އިދިކޮޅުގެ ހިނގާލުން ފެށީ ބޮޑުތަކުރުފާނު މަގުގައި ހުންނަ ޕީޕީއެމްގެ އޮފީސް ކައިރިންނެވެ. ޔާމީން މިނިވަން ކުރަން ގޮވާލަމުން އެއްވުމުުގެ ބައިވެރިން ހިނގާފައި ދިޔައީ އެތަނުން ބޮޑުތަކުރުފާނު މަގުން ލާފައި އުތުރަށެވެ.
ނަމަވެސް، ކާނިވާ ކައިރީގައި ހުންނަ ޕެޓްރޯލް ޝެޑު ކައިރީގައި ފުލުހުން ޝީލްޑް ޖަހައިގެން ތިބުމުން އެއަށް ވުރެ ދުރަކަށް ނުދެވުނެވެ. ކޯލިޝަނުގެ ލީޑަޝިޕުން އެއްވުމުގެ ބައިވެރިންނާ ވާހަކަ ދެއްކީ ޕިކަޕެއްގައި ސްޕީކަރު ސެޓުތައް ބަހައްޓައިގެން އެ ޕެޓްރޯލް ޝެޑު ކައިރީގަ އެވެ.
މި ސަރުކާރުން އަދުލު އިންސާފު ގާއިމް ކުރުމުގެ ބާރުގެ ތެރެއަށް އަތް ބާނައި ސަރުކާރުން ބޭނުންވާ ގޮތަށް ހުކުމްތައް ނެރެމުންދާ ކަމަށް ޕީއެންސީގެ ރައީސް އަބްދުލްރަހީމް އަބްދުﷲ ވިދާޅުވި އެވެ. އަދި ޔާމީނަށް ހުކުމް ކުރީ ނުފޫޒު ފޯރުވައިގެން ކަމަށް ވިދާޅުވި އެވެ.
ފަނޑިޔާރުން ނުފޫޒަށް ތަބާ ނުވުމަށް އޭނާ ގޮވާލެއްވި އެވެ. އަދި ރައްޔިތުންގެ އަޑު އަހަން ރައީސް އިބްރާހިމް މުހައްމަދު ސޯލިހަށް ގޮވާލައި އެމަނިކުފާނު އިސްތިއުފާ ދެއްވަން ވެސް ގޮވާލެއްވި އެވެ.
މިއަދުގެ ހިނގާލުމުގައި ކުރީގެ ނައިބު ރައީސް އަބްދުﷲ ޖިހާދު ވެސް ބައިވެރިވެވަޑައިގެންނެވި އެވެ. މިއީ އޭނާ މިފަދަ މުޒާހަރާއެއްގައި ބައިވެރިވެވަޑައިގެން ވާހަކަ ދެއްކެވި ފުރަތަމަ ފަހަރެވެ. ޖިހާދު ވިދާޅުވި ގޮތުގައި ސަރުކާރުން އޭނާ އަށް ކުރަނީ އަނިޔާ އެވެ. އެހެންވެ، ކެތް ނުވެގެން މަގުމައްޗަށް ނުކުންނެވީ ކަމަށާއި މީގެ ފަހުން މަގުމަތިން އިންސާފު ހޯއްދަވަން އުޅުއްވާތަން ފެންނާނެ ކަމަށް ވިދާޅުވި އެވެ.
އޭގެ އިތުރުން، ޖަލު ހުކުމެއް ތަންފީޒު ކުރައްވަމުން ގެންދެވިޔަސް، ޔާމީންގެ ގެކޮޅު ކައިރިއަށް ސަޕޯޓަރުން އެއްވުމުން އެމަނިކުފާނު ސަޕޯޓަަރުންނާ ބައިވެރިވެވަޑައިގެން ޕީޕީއެމްގެ ދިދައާއި ދިވެހި ގައުމީ ދިދަ ވިހުރުވައި އަތުން އިޝާރާތް ކުރައްވައި ހެއްދެވި އެވެ.
މިއަދުގެ ހިނގާމުން ނިންމާލީ ޔާމީންގެ ގެކޮޅު ހ. ދޫވެހި ކައިރީގައި ސަޕޯޓަރުން އެއްވެ ތިބެ ކުރި ދުއާއަކުންނެވެ.
އިދިކޮޅުން ބުނާ ގޮތުގައި މިއަދު ރާއްޖޭގެ ބައެއް އެހެން ރަށްރަށުގައި ވެސް ޔާމީން މިނިވަން ކުރަން ގޮވާލައި އެ ކޯލިޝަނުގެ ސަޕޯޓަރުން ވަނީ މުޒާހަރާކޮށްފަ އެވެ.
މި ހިނގާލުން ބާއްވާފައި މިވަނީ ޔާމީން ޖަލަށް ލާން ހުކުމްކުރި ފަސް ފަނޑިޔާރުންގެ ބެންޗުގައި ހިމެނޭ ތިން ފަނޑިޔާރުން ކަމަށް ބުނާ ބައެއްގެ އޯޑިއޯތަކެއް ލީކުވެފައި ވަނިކޮށެވެ. އެ ފަނޑިޔާރުންނަށް ސަރުކާރުން ނުފޫޒު ފޯރުވާފައިވާ ކަމަށް ދޭހަވާ ވާހަކަތަކެއް އެ އޯޑިއޯގައި ދައްކާފައިވާއިރު، ކުރީގެ ބައެއް ފަނޑިޔާރުން ވެސް ވަނީ ނޫސްވެރިންގެ ބައްދަލުވުމެއް ބާއްވައި ސަރުކާރުން ނުފޫޒު ފޯރުވާ ކަމުގެ ތުހުމަތު ކޮށްފަ އެވެ.
ފަނޑިޔާރުގެއަށް ނުފޫޒު ފޯރުވާ ކަމަށް އެ ފަރާތްތަކުން ތުހުމަތު ކުރަނީ ޖޭއެސްސީ މެދުވެރިކޮށާއި، ރައީސް އޮފީހުގެ ޗީފް އޮފް ސްޓާފް އަލީ ޒާހިރު ސީދާ ފަނޑިޔާރުންނަށް ގުޅުއްވައިގެންނެވެ. ނަމަވެސް، މި ތުހުމަތު އަލީ ޒާހިރު ވަނީ ދޮގު ކުރައްވައިފަ އެވެ.
އިދިކޮޅުން މި ހިނގާލުން ބާއްވާފައިވާއިރު، ޔާމީން ޖަލަށްލި މައްސަލައިގެ އަޑުއެހުންތައް ސުޕްރީމް ކޯޓުގައި ފަށަން ދަނީ ތައްޔާރުވަމުންނެވެ. އެ މައްސަލަ ތާވަލު ކޮށްފައި ވަނީ އަންނަ އާދީއްތަ ދުވަހަށެވެ.
މި މައްސަލައިގެ އިތުރުން ރ. ފުއްގުރި ދޫކުރި މުއާމަލާތުގެ ތެރެއިން ޔާމީން އެއް މިލިއަން ޑޮލަރު ނެންގެވި ކަމަށް ބުނާ މައްސަލައިގައި ކޮށްފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށް ދެ އެވެ.
