ރައީސް އިބްރާހިމް މުހައްމަދު ސޯލިހުގެ ސަރުކާރުގެ އަނިޔާތަކަށް ކެތް ނުވެގެން ކަމަށް ވިދާޅުވެ، ކުރީގެ ނައިބު ރައީސް އަބްދުﷲ ޖިހާދު ފުރަތަމަ ފަހަރަށް ސިޔާސީ ރެލީއެއްގައި ބައިވެރިވެވަޑައިގެން ސަރުކާރަށް މިއަދު ފާޑުވިދާޅުވެއްޖެ އެވެ.
ދައުލަތަށް ފައިދާ ލިބެން އޮތް ކަމެއްގައި އެހެން ގޮތަކަށް އަމަލު ކުރުމުގެ ދައުވާ އުފުލާފައިވާ ޖިހާދު، ކުރީގެ އަބްދުﷲ ރައީސް ޔާމީން މިނިވަން ކުރަން ގޮވާލައި އިދިކޮޅުން މިއަދު ހަވީރު ބޭއްވި ހިނގާލުމުގައި ބައިވެރިވެވަޑައިގެން ވިދާޅުވީ، އެ މަނިކުފާނަށް ރައީސް އިބްރާހިމް މުހައްމަދު ސޯލިހުގެ ވެރިކަމުގައި ވަރަށް އަނިޔާ ލިބިފައިވާ ކަމަށެވެ. ޖިހާދު ވިދާޅުވީ އެ މަނިކުފާނަކީ 35 އަހަރު ދައުލަތަށް ހިދުމަތް ކުރެއްވި ބޭފުޅެއް ކަމަށާއި ކުރިން އެއްވެސް މައްސަލައެއްގައި ކޯޓަށް ނުވެސް ގެންދާ ކަމަށެވެ.
މީގެ ކުރިން ދުވަހަކު ވެސް މިފަދަ ސިޔާސީ ރެލީއެއްގައި ބައިވެރިވެވަޑައިނުގަންނަވާކަން ވެސް ޖިހާދު ފާހަގަކުރެއްވި އެވެ. އެކަމަކު މިއަދު މަގުމައްޗަށް ނުކުމެވަޑައިގަންނަވަން ޖެހިވަޑައިގަތީ މި ސަރުކާރުން އަނިޔާ ކުރާތީ ކެތް ނުކުރެވިގެން ކަމަށް ވިދާޅުވި އެވެ.
"ތިބޭފުޅުންނަށް ނުފެންނާނެ [އަޅުގަނޑު] އެއްވެސް ކަހަލަ ރެލީއެއްގައި ބައިވެރިވި ތަނެއް. މިއަދު އަޅުގަނޑު އައިސް މިތަނަށް ހުއްޓެން މި ޖެހުނު ސަބަބަކީ އިބްރާހިމް މުހައްމަދު ސޯލިހުގެ ވެރިކަމުން އަޅުގަނޑުމެންނަށް އަނިޔާ ކުރަން ފެށީމާ އަޅުގަނޑަށް ކެތް ނުކުރެވިގެން މި އައީ،" ޖިހާދު ވިދާޅުވި އެވެ.
"އަޅުގަނޑަށް މިއަދު ފެންނަނީ އަޅުގަނޑުގެ ކަރުގައި ހަންޖަރު ޖައްސާފައި ހުންނަ ތަން."
ޖިހާދު ވިދާޅުވިގޮތުގައި، މީގެ ކުރިން މިފަދަ ހަރަކާތްތަކުގައި ބައިވެރިވެވަޑައިނުގެންނެވި ނަމަވެސް "މިއީ ފެށުން" އެވެ. އަދި މިކަން ނިންމާނީ އަދުލުއިންސާފު ގާއިމު ކޮށްފައި ކަމަށް ވިދާޅުވި އެވެ.
ކުރީގެ ފިނޭންސް މިނިސްޓަރުކަމާއި އެމްއެމްއޭގެ ގަވަރުނަރުކަން ވެސް ކުރެއްވި ޖިހާދު ރާއްޖެއިން ބޭރަށް ފުރިޔަ ނުދީ ބޭސްފަރުވާއިންނާއި އެ މަނިކުފާނުގެ ބޭފުޅުންނާ ބައްދަލުކުރެއްވުމުން ވެސް މަހުރޫމުކޮށްފައިވާ ކަމަށް ވިދާޅުވި އެވެ.
"އިބްރާހިމް މުހައްމަދު ސޯލިހަށް ފެންނާނެ ދެން އަޅުގަނޑު މަގުމަތީގައި އުޅޭ ތަން،" ޖިހާދު ވިދާޅުވި އެވެ.
އަނިޔާ ކުރުން ހުއްޓާލަން ރައީސް އިބްރާހިމް މުހައްމަދު ސޯލިހަށާއި އެސެޓް ރިކަަވަރީ ކޮމިޝަނުގެ ރައީސް އަހުމަދު އައްސަދަށް ގޮވާލައްވަމުން ޖިހާދު ވިދާޅުވީ، ހުއްޓާނުލައިފި ނަމަ އޭނާ ފެންނާނީ މަގުމަތިން ކަމަށެވެ.
ފަނޑިޔާރުންނަށް ނުފޫޒު ފޯރުވުން ހުއްޓާލާށާއި ޔާމީން މިނިވަން ކުރުމަށް ވެސް ޖިހާދު ގޮވާލެއްވި އެވެ. އޭނާ ދެކެވަޑައިގެންނެވި އެންމެ ހީވާގި ހިންގުންތެރި ރައީސަކީ ޔާމީން ކަމަށާއި އެ މަނިކުފާނު ޖަލަށް ލާފައި ހުރީ ގޯސް ހުކުމެއް ކޮށްގެން ކަމަށް ވެސް ޖިހާދު ވިދާޅުވި އެވެ.
ޖިހާދުގެ މައްޗަށް ދައުވާކޮށްފައި ވަނީ، ކުރީގެ ރައީސް މުހައްމަދު ވަހީދުގެ ވެރިކަމުގައި، ފުށިދިއްގަރު ފަޅު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީ ކުރުމަށް ސަރުކާރުގެ 50 ޕަސެންޓް ހިއްސާވާގޮތަށް ޖޮއިންޓް ވެންޗާ އެގްރިމެންޓެއް ހެދުމަށް ނިންމާފައި އޮއްވައި، ސަރުކާރުގެ ހިއްސާ އެ އަށް ވުރެ ކުޑަކޮށް ކުންފުނި ހެދުމަށް ޕްރައިމް ކެޕިޓަލް މޯލްޑިވްސް ލިމިޓެޑް ކިޔާ ކުންފުންޏަކާ އެކު އެއްބަސްވުމުގައި ސޮއިކުރުމުން ދައުލަަތަށް ލިބެން އޮތް ފައިދާއެއް ގެއްލުނު ކަމަށް ބުނެ އެވެ. އެ މައްސަލައިގެ ޝަރީއަތް މިހާރު ކްރިމިނަލް ކޯޓުގައި ކުރިއަށްދެ އެވެ.