ވައްކަމުގެ ތުހުމަތުގައި ލ. ކަލައިދޫން ހައްޔަރުކުރި މީހަކަށް ފުލުހުން އަނިޔާކުރި ކަމަށް ފުލުހުންގެ ތަހުގީގުން ސާބިތުވެފައިވާ ކަމަށާއި ނަމަވެސް އެކަށީގެންވާ ފިޔަވަޅު އަޅާފައިވާ ކަމަށް ނުފެންނާތީ ޖިނާއީ ތަހުގީގެއް ކޮށް ދައުވާކުރަން އެދުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ [241] ކޮމިޓީން ނިންމައިފި އެވެ.
ސެޕްޓެމްބަރު 6، 2020 ގައި ލ. ކަލައިދޫ މޫނިމާގެއިން ވައްކަން ކުރި ކަމުގެ ތުހުމަތުގައި އެ ރަށު ސުވީޓްހާޓްގޭ އަހުމަދު ސިރާޖު ހައްޔަރު ކުރުމަށް ފަހު ފުލުހުންގެ ބެލުމުގެ ދަށުގައި ބަހައްޓައިގެން އޭނާއަށް އެކި ވަރުގެ އަނިޔާކުރި މައްސަލައެއް އޭނާގެ ފަރާތުން ވަނީ ފުލުހަށާއި ރައްޔިތުންގެ މަޖިލީހަށް ވެސް ހުށަހަޅައިފަ އެވެ.
އެ މައްސަލަ ސަލާމަތީ ހިދުމަތްތަކާ ބެހޭ ކޮމިޓީން ދިރާސާ ކުރުމަށް ފަހު މިއަދު މަޖިލީހުގެ ތަޅުމަށް ރިޕޯޓު ހުށަހަޅުއްވަމުން އެ ކޮމިޓީގެ މުގައްރިރު ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވީ އެ މައްސަލާގައި ފުލުހުންގެ ޕްރޮފެޝަނަލް ސްޓޭންޑަޑް ކޮމާންޑުން ލ. އަތޮޅަށް ޓީމެއް ފޮނުވައިގެން ތަހުގީގުކުރި ކަމަށެވެ.
އަނިޔާ ލިބުނު ސިރާޖު އިސްދޫ ޕޮލިސް ސްޓޭޝަނަށް ގެންގޮސް ކޮޓަރިއަކަށް ވެއްދުމަށް ފަހު އަނިޔާކޮށްފައިވާ ކަމަށާއި އެއީ އޭނާ ގޭގައި އުޅެނިކޮށް ލިބުނު އަނިޔާތަކެއް ކަމަށް އެއްބަސް ނުވަނީސް ދޫކޮށްނުލާނެ ކަމަށް ފުލުހުން ބުނި ކަމަށް އޭނާގެ ބަޔާނުގައި ތުހުމަތުކުރާ އަސްލަމް ވިދާޅުވި އެވެ.
އަނިޔާކުރި ކަމަށް ތުހުމަތު ކުރެވޭ ފުލުހުން އެކަމަށް އިންކާރުކުރާ ކަމަށާއި ނަމަވެސް އެ މައްސަލަ ތަހުގީގު ކުރުމުން، ސިރާޖަށް ލިބިފައިވާ އަނިޔާތަކަކީ އިސްދޫ ޕޮލިސް ސްޓޭޝަނަށް އޭނާ ގެންދިޔުމަށް ފަހު ލިބުނު އަނިޔާތަކެއްކަން އެނގޭ ކަމަށް ފުލުހުންނާ ހަވާލާދީ އަސްލަމް ވިދާޅުވި އެވެ.
އަނިޔާކުރި ކަމަށް ބުނާ މައްސަލާގައި ތުހުމަތު ކުރެވޭ ތިން ފުލުހަކު އަށް މަސް ވަންދެން ކައިރިން ސުޕަވައިޒް ކުރުމަށް ޕްރޮފެޝަނަލް ސްޓޭންޑާޑް ކޮމާންޑުން ނިންމާފައިވާ ކަމަށާއި ދެ ފުލުހެއްގެ ގާބިލްކަން އިތުރުވާ ފަދަ ހާއްސަ ކައުންސިލިން ދިނުމަށް އެ މުއައްސަސާއިން ނިންމާފައިވާ ކަމަށް އަސްލަމް ވިދާޅުވި އެވެ.
"ކޮމިޓީއަށް ފާހަގަ ކުރެވުނީ މީހަކަށް އަނިޔާކުރުމަކީ އެންޓި ޓޯޗާ ގާނޫނުގެ ދަށުން ޖިނާއީ ކުށަކަށް ވާއިރު ފުލުހުންގެ ބެލުމުގެ ދަށުގައި ހުރި ފަރާތަކަށް އަނިޔާ ކުރިކަން ފުލުހުންނަށް ގަބޫލު ކުރެވޭ ހާލަތުގައި އިދާރީ ފިޔަވަޅެއް އަޅައި އެފަދަ މައްސަލައެއް ނިންމާލުމަކީ ރަނގަޅު ގޮތެއް ނޫން ކަން،" އަސްލަމް ވިދާޅުވި އެވެ.
އަނިޔާކުރި ފުލުހުންގެ މައްޗަށް ޖިނާއީ ތަހުގީގެއް ހިންގައި އެ ފަރާތްތަކަށް ދައުވާ ކުރުމަށް ޕްރޮސެކިއުޓާ ޖެނަރަލް އޮފީހަށް ފޮނުވުމަށް ސަލާމަތީ ހިދުމަތްތަކާ ބެހޭ ކޮމިޓީން ވަނީ އެ މުއައްސަސާގައި އެދިފަ އެވެ. އަދި ބަންދުގައި ތިބޭ މީހުންނަށް އަސާސީ ހައްގުތައް ކަށަވަރުކޮށްދިނުމާއި އެ ފަރާތްތަކާ މެދު އަމަލުކުރަމުންދާ ގޮތް ކައިރިން ބެލޭނެ ފަދަ އިންތިޒާމްތައް ހަމަޖައްސާފައި ބެހެއްޓުމަށް ވެސް ސަލާމަތީ ހިދުމަތްތަކާ ބެހޭ ކޮމިޓީން ވަނީ ލަފާ ދީފަ އެވެ.
