އިއްޔެ ބޭއްވި އެމްޑީޕީގެ ގައުމީ މަޖިލީހުގެ އިންތިހާބުގައި އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދުގެ ފެކްޝަން ބަލިކޮށް، ރައީސް އިބްރާހިމް މުހައްމަދު ސޯލިހުގެ ތާއީދު އޮތް ކެންޑިޑޭޓުން ބޮޑު ކާމިޔާބީއެއް ހޯދައިފި އެވެ.
ރައީސުލްޖުމްހޫރިއްޔާގެ މަގާމުގެ ހައިސިއްޔަތުން އެމްޑީޕީގެ އިސް ލީޑަރުގެ މަގާމު ވެސް ފުރުއްވާ އިބްރާހިމް މުހައްމަދު ސޯލިހުގެ ފެކްޝަންގެ މެމްބަރަކު ވިދާޅުވީ، މި އިންތިހާބުގައި ވާދަކުރި 97 ގޮނޑީގެ ތެރެއިން މިހާތަނަށް 65 ގޮނޑި ނެގީ އެ މަނިކުފާނުގެ ފެކްޝަނުން ކަމަށެވެ.
"މުޅި ނަތީޖާ އަށް ބަލާއިރު މިއީ ވަރަށް ބޮޑު ކާމިޔާބީއެއް. މި ނަތީޖާ އިން އެނގުނު އެންމެ ބޮޑު އެކައްޗަކީ ޕާޓީގެ ގްރާސްރޫޓް މީހުންގެ ވިސްނުން ހުރި ގޮތް،" ރައީސްގެ ފަޅީގެ މެމްބަރު ވިދާޅުވި އެވެ.
އެމްޑީޕީގެ އެތެރޭގައި ނަޝީދާއި ރައީސް އިބްރާހިމް މުހައްމަދު ސޯލިހާ ދެ ބޭފުޅުންގެ މެދުގައި ބޮޑެތި ހިޔާލު ތަފާތުވުންތަކެއް އުފެދި ރަސްމީކޮށް ދެ ފެކްޝަނެއްގެ ގޮތުގައި މަސައްކަތް ފެށި ފަހުން ބޭއްވި އެންމެ ފުރަތަމަ، އަދި އެންމެ ބޮޑު އިންތިހާބު ރައީސަށް ކާމިޔާބުވުމުގެ މާނައަކީ ގައުމީ މަޖިލީހުގެ ފުރިހަމަ ކޮންޓްރޯލް ނަޝީދަށް ގެއްލުމެވެ.
މި އިންތިހާބުގައި އެކި ދާއިރާތަކަށް ވާދަކުރެއްވި، ރައީސް އިބްރާހިމް މުހައްމަދު ސޯލިހުގެ ކެބިނެޓުގެ ވަޒީރުންނާއި ސަރުކާރުގެ ކުންފުނިތަކުގެ ވެރިން ވެސް ވަނީ ކާމިޔާބު ހޯއްދަވައިފަ އެވެ. އޭގެ ތެރޭގައި އިކޮނޮމިކް މިނިސްޓަރު ފައްޔާޒު އިސްމާއިލާއި ފިނޭންސް މިނިސްޓަރު އިބްރާހިމް އަމީރާއި މި ވަގުތު ސަސްޕެންޝަނުގައި ހުންނެވި ޔޫތު އެންޑް ސްޕޯޓްސް މިނިސްޓަރު އަހުމަދު މަހްލޫފު ހިމެނެ އެވެ.
ކުންފުނިތަކުގެ އެންމެ އިސްވެރިންނަށް ބަލާއިރު އެސްޓީއޯގެ އެމްޑީ ހުސައިން އަމްރާއި ފެނަކައިގެ އެމްޑީ އަހުމަދު ސައީދު އަދި އާރުޑީސީގެ އެމްޑީ މޫސާ އަލިމަނިކު (މޫކޭ) ގެ ކާމިޔާބީ ވެސް ރައީސްގެ ފަޅިން ފާހަގަކުރެވެ އެވެ.
އެމްޑީޕީގެ ތެރޭގައި ބާރު ހޯއްދަވަމުން ގެންދަވާ ރައީސް އިބްރާހިމް މުހައްމަދު ސޯލިހުގެ ފެކްޝަނުން ގައުމީ މަޖިލީހުގެ އިންތިހާބުން 65 ގޮނޑި ކާމިޔާބު ކޮށްފައިވާ ކަމަށް ބުންޏަސް އިންތިހާބަކާ ނުލައި ކާމިޔާބު ހޯދާފައިވާ ކެންޑިޑޭޓުންނާއި މަގާމުގެ ހައިސިއްޔަތުން ގައުމީ މަޖިލިސް އަށް ހޮވޭ ބޭފުޅުންނާއެކު 100 އަށް ވުރެ ގިނަ މެމްބަރުން ރައީސާއެކު ތިއްބަވާނެ އެވެ.
ފަސް އަހަރަށް އިންތިހާބުކުރާ އެމްޑީޕީގެ ގައުމީ މަޖިލީސް އެކުލެވިގެން ވަނީ، އެ ޕާޓީ ވެރިކަމުގައި އޮންނަ ނަމަ ރައީސުލްޖުމްހޫރިއްޔާ އާއި ވަޒީރުންގެ މަޖިލީހުގެ އެމްޑީޕީގެ މެމްބަރުންނާއި ޕާޓީގެ ލީޑަޝިޕާއި ޕާލަމެންޓްރީ ގްރޫޕްގެ މެމްބަރުންނާއި ދާއިރާތަކުގެ ރައީސުންނާއި އަންހެނުންގެ ރޫހާއި ޒުވާނުންގެ ހިތްވަރު އަދި އިސްލާމްދީނުގެ މަޝްވަރާ މަޖިލީހުގެ ރައީސް ހިމެނޭ ގޮތުންނެވެ.
