އޯޑިއޯތައް ހުރީ އެޑިޓުކޮށްފައި، ފާއިޒްގެ އަޑު ދިމާވޭ: ޖޭއެސްސީ

ކުރީގެ ރައީސް އަބްދުﷲ ޔާމީނަށް މަނީ ލޯންޑަރިންގެ ކުށުގައި ހުކުމް ކުރި ފަނޑިޔާރުންގެ ބެންޗުން ތިން ފަނޑިޔާރަކު އެ ހުކުމާ ބެހޭ ގޮތުން ސުވާލު އުފެދޭ ގޮތަށް ވާހަކަ ދައްކަވާ ކަމަށް ބުނާ އޯޑިއޯތައް ހުރީ އެޑިޓުކޮށް ބަދަލުކޮށްފައި ކަމަށާއި އޭގެ ތެރެއިން އަޑު ދިމާވަނީ ކްރިމިނަލް ކޯޓުގެ ގާޒީ ހުސެއިން ފާއިޒް ރަޝާދުގެ އެކަނި ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފި އެވެ.

ތިން ފަނޑިޔާރަކަށް ތުހުމަތުކޮށް އޯޑިއޯތަކެއް ލީކު ކުރި މައްސަލާގައި ޖޭއެސްސީން ވަނީ ފޮރެންސިކް އެނާލިސިސްއެއް ހެދުމަށް ފުލުހަށް ހުށަހަޅައިފަ އެވެ.

ފޮރެންސިކް އެނާލިސިސްގެ ނަތީޖާ ލިބުމާ އެކު ޖޭއެސްސީން ރޭ ނެރުނު ބަޔާނެއްގައި ބުނީ ލީކު ކުރި ތިން އޯޑިއޯއަކީ ވެސް ޓެމްޕާކޮށް ރެކޯޑިންގައިވާ ވަކި ބައެއް ޑިލީޓްކޮށް ނުވަތަ ވަކިވަކި ކްލިޕްތަކަކުން ގުޅުވައިގެން އެޑިޓް ކޮށްފައިވާ އޯޑިއޯތަކެއްކަން އެނގޭ ކަމަށެވެ.

އޭގެ ތެރެއިން ކްރިމިނަލް ކޯޓުގެ ގާޒީ އަލީ އާދަމް އާއި ޑްރަގް ކޯޓުގެ ގާޒީ މުހައްމަދު ސަމީރުގެ އަޑާ އެ އޯޑިއޯތަކުގައި ވާހަކަދައްކާފައިވާ މީހާގެ އަޑު ދިމާ ނުވާ ކަމަށާއި އެހެންކަމުން އެއީ ދޮގު ތުހުމަތެއް ކަމަށް ކަނޑައަޅައި، އެ ދެ ފަނޑިޔާރުންގެ މައްސަލަ ނުބަލަން ނިންމާފައިވާ ކަމަށް ޖޭއެސްސީން ބުންޏެވެ.

ފާއިޒްގެ އޯޑިއޯ ވެސް ޓެމްޕާކޮށްފައިވާ ކަމަށާއި ނަމަވެސް އޭނާގެ އަޑު އޯޑިއޯގައި ވާހަކަ ދައްކާ މީހާގެ އަޑާ ދިމާވާ ކަމަށް ޖޭއެސްސީން ބުންޏެވެ. ރެކޯޑިންގައި ވަނީ ފާއިޒްގެ އަޑު ކަމަށް އޭނާ އިންކާރު ކޮށްފައިވީ ނަމަވެސް އެ މައްސަލަ ބަލަން ނިންމާފައިވާ ކަމަށާއި އެކަމަށް ކޮމިޓީއެއް ނަގާފައިވާ ކަމަށް ވެސް އެ ކޮމިޝަނުން ބުންޏެވެ.

އޯޑިއޯގައި ފާއިޒް ދައްކާފައިވާ ވާހަކަތަކުގެ ތެރޭގައި ޔާމީންގެ މައްޗަށް ކްރިމިނަލް ކޯޓުގައި ހިންގި ޝަރީއަތާ ގުޅިގެން އެއްވެސް ފަރާތަކުން އެއްވެސް ފަނޑިޔާރަކާ ބައްދަލުކޮށްފައިވާ ކަމަށް ނުވަތަ އެ ޝަރީއަތަށް ނުފޫޒު ހިންގުމަށް އެއްވެސް މަސައްކަތެއް ކުރި ކަމަށް އޭނާ ވިދާޅުވެފައި ނުވާ ކަމަށް ޖޭއެސްސީން ބުންޏެވެ.

ނަމަވެސް އެ އޯޑިއޯގައި ކޯޓުގެ ޝަރީއަތަކާ ގުޅޭ ގޮތުން ކޯޓުން ބޭރުގައި ގިނަ ވާހަކަތަކެއް ދައްކާފައިވާ ކަމަށާއި އެގޮތަށް ފަނޑިޔާރު އަމަލު ބެހެއްޓުމުގެ ސަބަބުން ބަޔަކަށް އޭގެ ނާޖާއިޒް ފައިދާ ނެގުމުގެ ފުރުސަތު ފަހިވާ ކަމަށް ޖޭއެސްސީން ބުންޏެވެ. އަދި އެހެން ފަނޑިޔާރުންގެ އިތުބާރު ރައްޔިތުންގެ ކުރިމަތީގައި ގެއްލޭ ގޮތަށް އޯޑިއޯތަކެއް ހަދައިގެން ދައުރު ކުރުމުގެ އަމަލު ހިންގުމަށް ވެސް މަގު ފަހިވެގެން ދިޔަ ކަމަށް އެ ކޮމިޝަނުން ބުންޏެވެ.

އޯޑިއޯތައް ލީކުވުމާ އެކު އިދިކޮޅު ފަރާތްތަކުން ވަނީ އެ މައްސަލަަ އެކި މުއައްސަސާތަކަށް ހުށަހަޅައިފަ އެވެ. އެ އޯޑިއޯތަކަކީ ޔާމީންގެ ޝަރީއަތް ހިނގީ ނުފޫޒުގެ ތެރެއިން ކަން ސާބިތުވާ ހެއްކެއް ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ.

ނޮވެމްބަރު 28، 2019 ގައި ޔާމީން ޖަލަށް ލާން ހުކުމް ކުރީ ކްރިމިނަލް ކޯޓުގެ ފަސް ފަނޑިޔާރުންގެ ބެންޗެއްގެ އިއްތިފާގުންނެވެ.