އައްޑޫ ހިތަދޫ ހިރާ ސްކޫލް ހިންގުމުގައި ދެމެހެއްޓެނިވި ތަރައްގީ އަށް އަމާޒު ކޮށްގެން މަސައްކަތް ކުރާތީ ޔޫއޭއީގެ ސަރުކާރުން ދޭ "ޒައިދު ސަސްޓެނައިބިލިޓީ އެވޯޑް" އެ ސްކޫލަށް މި އަހަރު ލިބިއްޖެ އެވެ.
ހިރާ އަށް އެ އެވޯޑް ލިބުނީ ދެކުނު އޭޝިއާގެ ގްލޯބަލް ހައި ސްކޫލް ކެޓަގަރީންނެވެ.
ޒައިދު ސަސްޓެނައިބިލިޓީ އެވޯޑް ދިނުމަށް ޔޫއޭއީގައި މިއަދު ބޭއްވި ހަފުލާގައި ރާއްޖޭގެ ރައީސް އިބްރާހީމް މުހައްމަދު ސޯލިހު ވެސް ބައިވެރިވެވަޑައިގެންނެވިއިރު، ހިރާ ސްކޫލުން ހޯދި ކާމިޔާބީ އަށް އެ މަނިކުފާނު މަރުހަބާ ވިދާޅުވި އެވެ.
ރައީސް ކުރެއްވި ޓްވީޓެއްގައި ވިދާޅުވީ، އެ ކާމިޔާބި އަކީ ކުރިމަގުގައި ހިރާ ސްކޫލުން ނުކުންނަ ދަރިވަރުން ސަސްޓެއިނަބިލިޓީ ލީޑަރުންނަށް ވާނެ ކަމާ ދޭތެރޭ އެއްވެސް ޝައްކެއް ނެތް ކަމަށެވެ.
ހިރާ ސްކޫލަކީ ތިމާވެއްޓާ ރައްޓެހިކޮށް، ހިންގުމަށް ވަރަށް ބޮޑު އިސްކަމެއްދޭ ތަނެކެވެ.
ޒައިދު ސަސްޓެނައިބިލިޓީ އެވޯޑަކީ ޔޫއޭއީގެ ބާނީ ޝައިހް ޒައިދު ބިން ސުލްތާން އަލް ނަޙްޔާންގެ ނަމުގައި ދޭ އެވޯޑެކެވެ.
