ފެމިލީ ކޯޓު: އެ ކޯޓުގެ ކައިވެންޏާބެހޭ ރަޖިސްޓްރާގެ މަގާމަށް މީހަކު އައްޔަން ކުރުން މަޑުޖައްސާލަން ހައި ކޯޓުން ވަނީ އަންގާފައި --- ފޮޓޯ/މިހާރު
21 ޖެނުއަރީ 2022 - 10:20
8 comments
ފެމިލީ ކޯޓުގެ ކައިވެނީގެ ރަޖިސްޓްރާގެ މަގާމަށް މީހަކު އައްޔަންކުރުން މަޑުޖައްސާލަން ހައި ކޯޓުން އަމުރުކޮށްފި އެވެ.
ހައި ކޯޓުން އެގޮތަށް އަމުރުކުރީ ފެމިލީ ކޯޓުގެ ކުރީގެ ކައިވެނީގެ ރަޖިސްޓްރާ ވަޒީފާއިން ވަކިކުރި މައްސަލައިގަ އެވެ. އެ މަގާމުގައި ކުރިން ހުންނެވި އަހުމަދު އަބްދުﷲ 2019 ވަނަ އަހަރު ވަޒީފާއިން ވަކިކޮށްފައި ވަނިކޮށް ވަޒީފާއާބެހޭ ޓްރައިބިއުނަލުން މިދިޔަ އަހަރު އެންގީ އޭނާއަށް އަލުން އެ ވަޒީފާ ދިނުމަށެވެ. އެ ނިންމުން ޖުޑީޝަލް ސާވިސް ކޮމިޝަން (ޖޭއެސްސީ) ގެ ފަރާތުން ހައި ކޯޓުގައި އިސްތިއުނާފް ކުރުމަށް ފަހު ދެ އަހަރު ފަހުން އެ މަގާމަށް އާ ބޭފުޅަކު ހޯދަން މިދިޔަ ޑިސެމްބަރު މަހު އޮތީ އިއުލާންކޮށްފަ އެވެ.
ހައި ކޯޓުން މައްސަލަ ނިމެންދެން ކައިވެނީގެ ރަޖިސްޓްރާގެ މަގާމަށް މީހަކު އައްޔަންކުރުން މަޑުޖައްސާލުމުގެ އަމުރަކަށް އަހުމަދު އަބްދުﷲގެ ފަރާތުން އެދުމުން ހައި ކޯޓުން އިއްޔެ ނެރުނު އަމުރުގައިވަނީ ވަޒީފާއާބެހޭ ޓްރައިބިއުނަލްގެ ނިންމުމަށް އަމަލު ކުރުން ފަސްކުރަން ޖޭއެސްސީން ހައި ކޯޓުގައި އެދިފައިނުވާ ކަމަށެވެ. އެހެންވެ، ޓްރައިބިއުނަލްގެ ނިންމުން އަދިވެސް ދެމި އެބައޮތް ކަމަށާއި އަދި އެ ނިންމުން ދެމި އޮއްވައި އެ ނިންމުމާ ޚިލާފަށް ޖޭއެސްސީއަށް އަމަލު ނުކުރެވޭނެ ކަމަށް އެ އަމުރުގައިވެ އެވެ.
ހައި ކޯޓުގެ ތިން ފަނޑިޔާރުންގެ އިއްތިފާގުން ނެރުއްވި އެ އަމުރުގައިވަނީ ފެމިލީ ކޯޓަށް ކައިވެނީގެ ރަޖިސްޓްރާއަކު އައްޔަން ކުރުން މަޑުޖައްސާލަން ފެމިލީ ކޯޓާއި ކަމާބެހޭ ފަރާތްތަކަށް އަންގާ ކަމަށެވެ.
ހައި ކޯޓުން އެ މައްސަލަ ބައްްލަވަނީ ފަނޑިޔާރު މުހައްމަދު ފައިސަލާއި ފަނޑިޔާރު ހުސައިން ޝަހީދުގެ އިތުރުން ފަނޑިޔާރު ފާތިމަތު ފަރުހީޒާ އެވެ. ބެންޗުގެ ރިޔާސަތަކީ ފަނޑިޔާރު ފައިސަލެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހަސަނާސަނާ
22 January 2022
ކޮށްފަހުރި ކައިވެނިތައް ރެކޯޑުތައް ގެއްލިގެން ނުރޫޅިއްޖިއްޔާ ރަނގަޅު. ވަރައް ސަލާމް.
ސެރެގު
22 January 2022
ވަޒީފާ އިން ވަކި ކުރި ސަބަބު ކޮބާ؟
މޫސާ މޯލީ
21 January 2022
ޖުޑީޝަރީ އިން ސްޕްރީމް ކޯޓުގެ ރޫލިންނަށްް ތަބާ ނުވާނަމަ ދެންތަބާވާނީ ކާކު؟ ސްޕްރީމް ކޯޓުން މަދަނީ މައްސަލަ ތަންފީޒު ކުރުމާއި ބެހޭ ގޮތުން ނެރުނު ރޫލިން ނެރުނުމާއިއެކު ކާވެނީގެ ރަޖިސްޓްރާރ ގެ މަޤާމަށް އަލުން އޭނާ ނެރުމަކީ ޖޭއެސްސީ މައްޗަށް ލާޒިމްކަމެކެވެ. ނަމަވެސް ވަޒީފާ ހަމަ ނުޖައްސާ ސްޕްރީމް ކޯޓުގެ ރޫލިްނ އާއި ޚިލާފަށް އެމަޤާމަށް މީހަކު ހަމަޖެއްސުމުގެ މަސައްކަތް ފެށީ! ޒާތީ ވިޔަސް މީބޮޑުވަރު މީތޯ ތިބުނާ އިންސާފަކީ ދިވެހިން ތިއިންސާފު ބޭނުންނުވޭ!
ޖުހާނާ
21 January 2022
ކޮބާ، ޖޭއެސްސީގެ ރައީސަކަށް ހުރި "މޮޅު" ޤާނޫނީ ވަކީލު. މާމޮޅު މީހަކަށް ހެދިގެން އުޅޭއިރު ތަނެއްދޮރެއް ނޭނގޭ. އެވަރުގެ މީހަކަށް އިންސާފުން ކުރެވޭނީ ކޮން ކަމެއް؟ ހުރިހާ ކަމެއް ކުރަން އުޅެނީ ތިމާގެ މުލައްދަނޑީގެ ބާރުން. ޕާޓީގައި ތިބި ގަމާރުންތައް ތިބޭނެ އަތް ޖަހާލަ ޖަހާލާ.
ޢަލީ ޙަމީދު
21 January 2022
ފެމެލީ ކޯޓުގެ އިސް ހުރިހާ މަޤާމެއް ހުސްކޮށް : 1. ޢިސް ޤާޟީ 2. ޗީފް އެޑްމިނިސްޓަރ 3. ކައިވެނި ރަޖިސްޓަރ 4. ފައިނޭންސް ހެޑް .
ހޫސާ ކޫރު
21 January 2022
ރަތްޔިތުންނަށް ތިތަނުން ޚިދުމަތް ދޭނީ ކިހިނެއްތޯ ! ދައުލަތުގެ ބަޖެޓަށް ލުއިކުރަން ކޮށްގެން އުޅޭ ކަމެއ! މިހާރު އެންމެ ބޮއްސުންލާފަ އޮތްތަނަކީ ތީކަން އަޅުގަނޑަށް ފާހަގަ ކުރެވޭ !
ކޯޓް މާސްޓަރ
21 January 2022
ފެމެލީ ކޯޓުގައި ކައިވެނި ރަޖިސްޓްރާ އެއް ނެތި 3 އަހަރުވަނީ. ތި މައްސަލަ ނިމެން އަދި ކިތައް 3 އަހަރު ނަގަަނެބޭ.
މުލޭ
21 January 2022
ޖޭއެސްސީ އިސްވެ އޮވެ ދެން ކޮން އިންސާފެއްތޯ ގާއިމުކުރެވޭނީ. ހިތުހުރިގޮތަކަށް ކަންކަން ކުރަން މިއުޅެނީ. މިވަރުން އަހަތެމެން ކިހިނެއް ޖޭއެސްސީއަށް ވެސް އިތުބާރު ކުރާނީ.