މިޝޭލް އޮބާމާ އަށް ޓްރަމްޕް ރައްދު ދެއްވައިފި

ނިއު ޔޯކް (ޑިސެމްބަރު 19) - ނޮވެމްބަރު މަހު ބޭއްވި ރިޔާސީ އިންތިޚާބަށް ފަހު އެމެރިކާގެ ކުރިމަގު ބަނަވެއްޖެ ކަމަށާއި އުއްމީދެއް ނެތް ކަމަށް މިޝޭލް އޮބާމާ ޓޯކް ޝޯއެއްގައި ވިދާޅުވެފައި ވާތީ ވެރިކަމަށް އިންތިހާބުކޮށްފައިވާ ޑޮނަލްޑް ޓްރަމްޕް ރައްދު ދެއްވައިފި އެވެ.

"ޝުކުރުގެ ދަތުރުގައި" އަލަބާމާގައި ޓްރަމްޕް ވިދާޅުވީ އޭނާ އިންތިޚާބުވި ފަހުން އެމެރިކާ އުއްމީދުން ފުރިއްޖެ ކަމަށެވެ.

"ގައުމެއްގެ ގޮތުގައި އެމެރިކާ ދާނީ އިތުރަށް ކާމިޔާބުވަމުން. ކުރިމަގު ވަރަށް އުއްމީދީ އަދި ވަރަށް ފުރުސަތު އެބައޮތް،" 70 އަހަރުގެ ބިލިއަނަރު ވިދާޅުވި އެވެ.

މިޝޭލް ވިދާޅުވީ އުއްމީދަކީ މުހިންމު އެއްޗެއް ކަމަށާއި ނޮވެމްބަރު 8 ވަނަ ދުވަހުގެ އިންތިހާބުގެ ނަތީޖާ އަށް ފަހު ބަނަކަންވެރިވެ އުއްމީދު ގެއްލިއްޖެ ކަމަށެވެ. ޓްރަމްޕުގެ ނަން ވިދާޅު ނުވެ މިޝޭލް ވިދާޅުވީ ވައިޓް ހައުސް އަށް ވަޑައިގަންނަވަން ޖެހޭނީ "ހަރު މީހެއް" ކަމަށެވެ.

ޓްރަމްޕް ވިދާޅުވީ މިއިން ޒަމާނެއްގައި ވެސް އެމެރިކާ ނުދެކޭ ފަދަ ތަރައްގީ އާއި ކުރިއެރުން ދެން ފެނިގެންދާނެ ކަމަށެވެ.

ޓްރަމްޕް ވަނީ އިންތިހާބުގެ ކާމިޔާބީ އަށް ފަހު ވައިޓްހައުސްގައި ބޭއްވި ބައްދަލުވުމުގައި މިޝޭލް އާއި ރައީސް ބަރަކް އޮބާމާގެ ފަރާތުން ލިބިވަޑައިގަތް މެހްމާންދާރީ އަށް ޝުކުރު އަދާކުރައްވައިފަ އެވެ.