ޖިނާއީ މައްސަލަތަކާ ގުޅޭ އެއްބަސްވުމެއްގައި ރާއްޖެއާއި ލަންކާއާ ދެމެދު ސޮއިކުރަނީ

ރާއްޖެ އާއި ސްރީ ލަންކާއާ ދެމެދު، ޖިނާއީ މައްސަލަތަކާ ގުޅޭ އެއްބަސްވުމެއްގައި ސޮއިކުރަން ހަމަޖެހިފައިވާ ކަމަށް އެ ގައުމުގެ ނޫސްތަކުން ރިޕޯޓްކޮށްފި އެވެ.

ލަންކާގެ ޚަބަރުތައް ގެނެސްދޭ، "ކޮލަމްބޯ ގެޒެޓް" ގައި ބުނި ގޮތުގައި ޖިނާއީ އެކި މައްސަލަތަކާ ގުޅިގެން ދެ ގައުމުން އެހީ ފޯރުކޮށްދިނުމަށް އެއްބަސްވުމަށް އެ ގައުމުގެ ޖަސްޓިސް، ޕްރިޒަން އެކްޓިވިޓީސް މިނިސްޓަރު ހުށަހެޅުއްވި ހުށަހެޅުން ލަންކާގެ ކެބިނެޓުން ވަނީ ފާސްކޮށްފަ އެވެ.

ލަންކާގެ ސަރުކާރުގެ އޮފިޝަލަކާ ހަވާލާދީ އެ ނޫހުން ބުނީ އެ އެއްބަސްވުމުގެ ސަބަބުން ދެ ގައުމުން ގުޅިގެން ހިންގާ ތަހުގީގުތަކަށް ކުރިމަތިވާ ގޮންޖެހުންތައް ވެސް މަދުވާނެ ކަމަށެވެ. އަދި މީގެ ސަބަބުން ދެ ގައުމުގެ ގުޅުން އިތުރަށް ބަދަހިވާނެ ކަމަށް ވެސް އޮފިޝަލް ވިދާޅުވެ އެވެ.

ލަންކާ އަކީ ރާއްޖެއާ އެންމެ ކައިރީގައި އޮތް ގައުމެވެ. ދެ ގައުމުގެ މެދުގައި މީގެ ކުރިން ވެސް ކުށްވެރިން ބަދަލުކުރުމުގެ އެއްބަސްވުމެއް ހަދާފައި އޮވެ އެވެ.