ދެ ރައީސުންގެ ޕްރައިމަރީ: ތިލަފަތް ބަރީ ކޮން ކޮޅަކަށް؟

ރާއްޖޭގެ ސިޔާސީ ހަޔާތުގައި ޕާޓީއެއްގެ އެތެރޭގެ ޕްރައިމަރީ މިހާ ވާދަވެރިއެއް ނޫނެވެ. އެމްޑީޕީގެ ރިޔާސީ ކެންޑިޑޭޓަކު ހޮވުމުގެ މި ޕްރައިމަރީގެ ކެމްޕޭނަށް މަހެއް ވި އިރު، ރައީސް އިބްރާހިމް މުހައްމަދު ސޯލިހާއި ރައީސް މުހައްމަދު ނަޝީދުގެ ކެމްޕޭން ޓީމުން ވެސް ރަތް ރޮނގު ހުރަސްކޮށްފި އެވެ. ޕާޓީގެ އެތެރޭގެ އިންތިހާބެއްގައި ތަބާވާން ޖެހޭ ހުރިހާ އިންތަކާއި މިންތަކެއް ކެމްޕޭނުގައި ފަހަނާޅައި ހިނގައްޖެ އެވެ. އެއް ބަޔަކު އަނެއް ބަޔަކަށް ނާޅުވާ އިލްޒާމެއް ނެތެވެ. އަމާޒުނުކުރާ ފާޑުކިއުމެއް ނެތެވެ. ޕާޓީގެ އިންތިހާބުތަކުގައި ވާދަކުރާ ކެންޑިޑޭޓުން ހިފަހައްޓަންޖެހޭ މިންގަނޑުކަމަށް ކަނޑައަޅާފައިވާ އުސޫލުތަކެއް އޮތް ކަމަކަށް ވެސް މި ކެމްޕޭނުގައި ދެ ރައީސުން ނުބައްލަވަ އެވެ.

ސިޔާސީ ގޮތުން ފިކުރު ތަފާތު ދެ ޕާޓީއަށް ވުރެން ވެސް ވަރުގަދަ ބަހުގެ ހަމަލާތައް އެއް ބަޔަކު އަނެއް ބަޔަކަށް އަމާޒުކޮށްފި އެވެ. މީގެ ނަތީޖާއަކީ މި ޕްރައިމަރީއަށް ފަހު ޕާޓީ އެކަތިގަނޑެއްގެ ގޮތުގައި ކުރިއަށް އޮތް ރިޔާސީ އިންތިހާބުގެ މަސައްކަތްތައް އެކުގައި ނުކުރެއްވޭ ހިސާބުގައި ތިބުމެވެ.

މިއާ ގާތްކުރާ، ޕްރައިމަރީއެއް މިހާތަނަށް ބޭއްވީ ޕީޕީއެމުންނެވެ. އެ ޕާޓީން 2013ގެ ރިޔާސީ ޓިކެޓަށް ވާދަކުރެއްވީ، ކުރީގެ ރައީސް އަބްދުﷲ ޔާމީން އާއި ކުރީގެ ހޯމް މިނިސްޓަރު އުމަރު ނަސީރެވެ. މި ޕްރައިމަރީ ނިމުނީ ދެ ބޭފުޅުން ވާދަވެރި ކެމްޕޭނަކާއި ހިތްހަމަނުޖެހުންތަކުންނެވެ. އެކަމަކު އެ ޕްރައިމަރީއަށް ފަހު ޕީޕީއެމަށް ވާނެ ގޮތަކާ ދޭތެރޭގައި ސުވާލެއް އުފެދޭ ހިސާބަކަށް ނުދެ އެވެ.

އެމްޑީޕީގެ މި ޕްރައިމަރީން ފެންނަ ތަފާތަކީ އެ އެވެ. ވޯޓާ މެދު ގޮތް ނިންމައިގެން ތިބި އާއްމު މެމްބަރުން ވެސް އުފައްދަނީ އެ ސުވާލެވެ. ޕާޓީއަށް ވާން މިއުޅޭ ގޮތެކެވެ.

މި ޕްރައިމަރީގައި ވާދަ ކުރައްވަނީ އެމްޑީޕީ އުފަން ކުރުމުގައި އިސް ދައުރެއް އަދާކުރެއްވި އަދި ރާއްޖޭގެ ސިޔާސީ ކަންކަމާއި ޕާޓީގެ ހަޔާތުގައި ވެސް މުހިއްމު މަސައްކަތްތަކެއް އެކުގައި ކުރެއްވި ދެ ރައީސުންނެވެ. މި ވެރިކަން ފެށުމާ އެކު ދެ ބޭފުޅުންގެ ވާދަވެރިކަމުގައި ޕާޓީ ދެބައިވެ، ރިޔާސީ ޓިކެޓާ އަރާހަމަވިއިރު ދެ ބޭފުޅުން ފެންނަނީ އަަލުން އަނބުރާ އެކީގައި މަސައްކަތް ނުކުރެއްވޭނެހާ ދުރުގައި ތިއްބެވި ތަނެވެ.

ނަޝީދު، ތަކުރާރުކޮށް ވިދާޅުވާ ގޮތުގައި، އެމްޑީޕީގެ އަސާސްތަކާއި ޕާޓީގެ ތަސައްވުރާ މާދުރަށް މި ވެރިކަމުގައި ރައީސް އިބްރާހިމް މުހައްމަދު ސޯލިހް ގެންދަވައިފި އެވެ. އެމަނިކުފާނު ވެވަޑައިގަންނަވާ ވައުދަކީ، އެހެން ފިކުރުތަކާ މައްސުނިކޮށް، ގަޑުބަޑުކޮށްފައިވާ ޕާޓީ އޭގެ އަސްލުގެ ގޮތުގައި އެ ޕާޓީ މެމްބަރުންނަށް ރުޖޫއަކޮށްދެއްވުމެވެ. ރައީސް އިބްރާހިމް މުހައްމަދު ސޯލިހް ވިދާޅުވަނީ، ނަޝީދު ބޭނުންފުޅުވާ ސިޔާސީ ވަކި މަގުސަދެއް ހާސިލްކުރެއްވުމަށް އެމަނިކުފާނަށް ޕާޓީ ދޫކޮށެއް ނުލެއްވޭނެ އެވެ. ޕާޓީގެ އެ މަސްލަހަތު ގައުމާ ގުޅިފައި އޮތް ކަމަށާއި އެމްޑީޕީއަށް ވެރިކަމުގެ ދެ ވަނަ ދައުރެއް ލިބެން ޖެހޭނެ ކަމަށެވެ. އެކަން ކަށަވަރު ކުރެއްވޭނެ މިންވަރަށް، މި ވެރިކަމުގައި އެމަނިކުފާނު މަސައްކަތް ކޮށްދެއްވާފައިވާ ކަމުގެ ނަމްބަރުތައް ދައްކަވަ އެވެ.

މި ޕްރައިމަރީއަކީ މިހާތަނަށް ވެރިކަމުގައި ހުންނެވި ބޭފުޅަކާ ޕާޓީ ތެރެއިން ވާދަކުރައްވާ ފުރަތަމަ ފަހަރެވެ. ރައީސް އިބްރާހިމް މުހައްމަދު ސޯލިހަކީ ރައީސްކަމުގައި ހުންނަވައި ދެ ވަނަ ދައުރަކަށް އެމްޑީޕީގެ ރިޔާސީ ޓިކެޓަށް ވާދަކުރައްވާ ފުރަތަމަ ރައީސެވެ.

ޕްރައިމަރީ ކާމިޔާބު ކުރައްވާނީ ކޮން ބޭފުޅެއް؟

ކެމްޕޭނުގެ މަންޒަރުތަކުން ދެ ރައީސުން ވެސް މި ޕްރައިމަރީގެ ނަތީޖާ ދައްކަވަ އެވެ. ހިޔާލު ހޯދުމުގެ ވޯޓުތަކާއި ހިސާބުތައް ޖައްސަވައި އިންތިހާބުގެ ނަތީޖާ ދެ ބޭފުޅުން ވެސް ތިއްބެވީ މޮޅުވާނެ ކަމަށް ޔަގީންކުރައްވައިގެންނެވެ. ރައީސް އިބްރާހިމް މުހައްމަދު ސޯލިހާއި ރައީސް ނަޝީދު ވެސް ވިދާޅުވަމުން އަންނަނީ މި އިންތިހާބު ބޮޑު ތަފާތަކުން ކާމިޔާބު ކުރައްވާނެ ކަމަށެވެ.

ރައީސް އިބްރާހިމް މުހައްމަދު ސޯލިހް ވިދާޅުވާ ގޮތުގައި އެމަނިކުފާނުގެ ކޮޅަށް "ޕްރައިމަރީ އޮތީ ނިމިފަ" އެވެ. ނަޝީދު ވިދާޅުވަނީ އެމަނިކުފާނަށް ޕްރައިމަރީ ކާމިޔާބުވެފައި އޮތުމާ އެކު ވިސްނެވުން އަދި މަަސައްކަތްތައް މި ޕްރައިމަރީގައި ކުރައްވަނީ މާދުރަށް، ރިޔާސީ އިންތިހާބުގެ ކެމްޕޭނާ އެކުގަ އެވެ.

ދެ ރައީސުންގެ މި ވާހަކަފުޅުތަކާއި ކެމްޕޭން ޓީމުތަކުން ދައްކާ މަންޒަރުތައް ކަށަވަރުވާން އޮތީ ވޯޓު ފޮށިތަކުގެ ނަތީޖާ އިންނެވެ.

މި ޕްރައިމަރީގެ ނަތީޖާއިން ސާފުވާނީ އެންމެ ކަމެއް ނޫނެވެ. ޕާޓީގެ ކުރި މަގެވެ. އާއްމު މެމްބަރުން ޕާޓީ ގެންދަން ބޭނުންވާ މިސްރާބެވެ. ކުރިއަށް އޮތް ރިޔާސީ އިންތިހާބައަށް އެމްޑީޕީއަށް ވާން އުޅޭ ގޮތެކެވެ. ސިޔާސީ މަސްރަހު ފުރޮޅިގެންދާނެ ގޮތެވެ. އެއާއެކު، އެންމެ މުހިއްމު ކަމެއްގެ ގޮތުގައި އެމްޑީޕީގެ ބާރުގަދަ ލީޑަރު ވެސް މި ޕްރައިމަރީއާ އެކު އާއްމު މެމްބަރުން ކަނޑައަޅާނެ އެވެ.

"ބަލިވާ ކެންޑިޑޭޓް މޮޅުވާ ކެންޑިޑޭޓުގެ ފަހަތަށް"

ޑިމޮކްރެޓިކް އުސޫލްތަކަށް ވަކާލާތުކުރާ އެމްޑީޕީން ގަބޫލުކުރާ ގޮތަކީ މިއެވެ؛ އެތެރޭގެ އިންތިިހާބުތަކުގައި ހޯދާ ކާމިޔާބީއަކީ ޕާޓީގެ އާއްމު މެމްބަރުންގެ ބަހެވެ. ނިންމުމެވެ. އެހެންކަމުން އޮންނަ ހަމައަކީ ޕްރައިމަރީން ބަލިވާ ކެންޑިޑޭޓަކު ބަލި ގަބޫލުކޮށް، މޮޅުވާ ކެންޑިޑޭޓަކާ އެއްކޮށް މަސައްކަތް ކުރުމެވެ.

އެކަމަކު މި ޕްރައިމަރީގައި މިކަން ފެންނާނެތޯ އެއީ ވަރަށް ބޮޑު ސުވާލެކެވެ.

އިންތިހާބުގައި ނާކަމިޔާބުވެވަޑައިގެންފި ނަމަ ވެސް ހުންނަވާނީ، ރައީސް އިބްރާހިމް މުހައްމދު ސޯލިހް ވިދާޅުވެފައިވާ ގޮތުގައި، އެމްޑީޕީއާ އެކުގަ އެވެ. ސިޔާސީ އިދިކޮޅު ޕާޓީއާ ގުޅިގެން، އެއްވެސް މަސައްކަތެއް ކުރެއްވުމަކަށް އެމަނިކުފާނުގެ ވިސްނުންފުޅެއް ނެތް ކަން ވަނީ އާއްމު މެމްބަރުންނަށް ސާފުކޮށްދެއްވައިފަ އެވެ.

ނަޝީދުގެ ނިންމެވުން ސާފެއް ނޫނެވެ؛ ކެމްޕޭންގައި ސަޕޯޓަރަކާ އެކު ދެކެވުނު ވާހަކައެއްގެ ތެރޭގައި ބަލިވެއްޖެ ނަމަ ރައީސް އިބްރާހިމް މުހައްމަދު ސޯލިހް ފަހަތަކަށް ވެސް އަދި ޕީޕީއެމާ ވެސް ގުޅިވަޑައިނުގަންނަވާނެ ކަމަށާއި ވަންނަވާނީ "ގެއަށް" ކަމަށް ވިދާޅުވެ އެވެ.

އެކަމަކު، ފަހުން އާއްމުކުރެއްވީ ކޮންމެ ގޮތެއް ވިޔަސް މިއަށް ވުރެން ދުރަށް، ރިޔާސީ އިންތިހާބާ ހަމައަށް ވިސްނުން ގެންގުޅުއްވާ ކަމެވެ. އެ ވާހަކަތަކަށް މިހާރު ބާރު ދެއްވަނީ، އެމްޑީޕީއާ އަބަދުވެސް ވާދަވެރި ޕާޓީ، ޕީޕީއެމްގެ ބައެއް ސިޔާސަތުތަކާ ރުހިވަޑައިގަންނަވާ ކަމަށާއި ދެ ޕާޓީ އެކުގައި ސިޔާސީ މަސައްކަތްތައް ކުރެއްވިދާނެ ކަމުގެ ފޯމިއުލާއެއް ހޯއްދެވިދާނެ ކަމުގެ ޔަގީންކަން ވެސް ދެއްވަމުންނެވެ.

މިކަމުގައި ކަންބޮޑުވެވަޑައިގަންނަވާ އެމްޑީޕީގެ ބައެއް މެމްބަރުން ވިދާޅުވަނީ ޕީޕީއެމާ އެކު ނުވަތަ އެ ފިކުރުގެ މެމްބަރުންގެ ތާއީދާ އެކު ނަޝީދު ސިޔާސީ މަސައްކަތުގައި އުޅުއްވުން، އެމަނިކުފާނު ވިދާޅުވަމުން ގެންދަވާ ވާހަކަތަކަށް ބަލާއިރު ގާތެވެ. މިގޮތަށް މިކަން ވާން ނޭދޭ، ބޭފުޅުންގެ އުއްމީދަކީ އެމަނިކުފާނު އެ ނޫން ގޮތެއް ހޯއްދެވުމެވެ. އެއީ، ވަކިން އިންތިހާބުގައި ވާދަކުރެއްވުން ވިޔަސް އެންމެ ރަނގަޅު ކަމަށް ވިސްނުން ކުރިއަށް ނެރެ އެވެ.

އިންތިހާބު ނާކާމިޔާބުވެވަޑައިގެންފި ނަމަ ރައީސް އިބްރާހިމް މުހައްމަދު ސޯލިހްއާ އެކުގައި ސިޔާސީ މަސައްކަތުގައި ނޫޅުއްވާނެ ކަމަށް ނަޝީދު ވިދާޅުވެ އެވެ. އެކަމަކު ޕީޕީއެމާ އެކު އެއް އޮޑިއެއްގައި ދަތުރުކުރައްވަފާނަންތޯ ނޫސްވެރިންގެ ބައްދަލުވުންތަކުގައި އަހާ ސުވާލަށް ސާފު ޖަވާބެއް ނުދެއްވަ އެވެ.

މި ޕްރައިމަރީގެ ކުރިން، ރައީސް އިބްރާހިމް މުހައްމަދު ސޯލިހާއި ނަޝީދުގެ ސިދާ ކުރިމަތިލެއްވުމެއް ނުފެނުނަސް ޕާޓީގެ އެތެރޭގެ އިންތިހާބުތަކަކީ ދެ ރައީސުންގެ ސިޔާސީ ބާރުވެރިކަން ކަނޑައެޅި އިންތިހާބުތަކެކެވެ. އެމްޑީޕީގެ ޕާލަމެންޓްރީ ގްރޫޕްގެ މަގާމްތަކާއި ޕާޓީގެ އިސް މަގާމްތަކުގެ އިތުރުން ދާއިރާ ރައީސުންނާއި ގޮފިތަކަށް ވެސް ދެ ރައީސުންގެ ކެންޑިޑޭޓުން ވާދަކުރި އެވެ. މި އިންތިހާބުތަކުގެ ނަތީޖާ ބުރަވެފައި އޮތީ، ރައީސް އިބްރާހިމް މުހައްމަދު ސޯލިހްގެ ފަޅިއަށެވެ. މަޖިލީހުގެ އެމްޑީޕީގެ މެމްބަރުންނާއި ދާއިރާތަކުގެ ރައީސުންގެ އަޣުލަބިއްޔަތު އޮތީ ވެސް އެމަނިކުފާނަށެވެ.

އެކަމަކު މި ހުރިހާ އިންތިހާބުތަކާ މި ޕްރައިމަރީ ތަފާތުވާނެ ސަބަބެއް ނަޝީދު ދައްކަވައިފި އެވެ. އެއީ، ސީދާ އެމަނިކުފާނު ނުކުންނަވައި ކެމްޕޭން ކުރެއްވުމެވެ. ކެމްޕޭންގެ އެ އުކުޅުތަކާއި ސަޕޯޓަރުން ނެރުމުގެ ޖޯޝާއި ފޯރި އާއި ޕާޓީގެ ބާރުގަދަ މަގާމްތަކުގައި ތިއްބެވި ބޭފުޅުން އެމަނިކުފާނާ ފެއަށް ޖެހިވަޑައިގެން ތިއްބެވިޔަސް ދައްކަވާ ހިތްވަރެވެ.

ވާދަވެރި މި ކެމްޕޭންގެ ނަތީޖާއާ ހަމައަށް ވާސިލްވާން އޮތީ ދެތިން ދުވަހެވެ. އަންނަ ހޮނިހިރު ދުވަހު ބާއްވާ ޕްރައިމަރީއަކީ، ރާއްޖޭގެ ސިޔާސީ ތާރީހުގައި މުހިއްމު، އެމްޑީޕީގެ ކުރިމަގު ކަނޑައަޅާ ވޯޓެވެ. އެމްޑީޕީ ފިކުރުގެ ދިރުމަކީ ނަޝީދުތޯ ނުވަތަ ރައީސް އިބްރާހިމް މުހައްމަދު ސޯލިހްއާ އެކު އެމްޑީޕީ ކުރިއަށް ގެންދާނީތޯ އާއްމު މެމްބަރުން ނިންމާނެ އެވެ.

ސުވާލު އުފެދިފައި އޮތީ އެއަށް ފަހު އެމްޑީޕީއަށް ވާނެ ގޮތެކެވެ!