އެޗްޑީސީން ހުޅުމާލޭގައި ސެރަމިކް އާޓް އަދި ޕޮޓަރީ ތައްޔާރުކުރާ ކްލޭ ސްޓޫޑިއޯއެއް އިއްޔެ ހުޅުވައިފި އެވެ.
މިއީ ރާއްޖޭގައި ހުޅުވި ޕޮޓަރީ އަދި ކްލޭ އާޓްގެ ފުރަތަމަ ސްޓޫޑިއޯ އެވެ.
އެޗްޑީސީން މިއަދު ބުނީ އެ ކްލޭ ސްޓޫޑިއޯ ހުޅުވީ، ހުޅުމާލޭގެ ރެއިން ކްރެސްޓް ރެސިޑެންސް އިމާރާތުގެ ގްރައުންޑް ފުލޯގައި ކަމަށެވެ. އެ ސްޓޫޑިއޯ ރަސްމީކޮށް ހުޅުއްވައި ދެއްވީ އެޗްޑީސީގެ މެނޭޖިން ޑިރެކްޓަރު އަހުމަދު އާތިފް ކަމަށް އެ ކުންފުނިން ބުންޏެވެ.
އެ ސްޓޫޑިއޯ އިން ދޭ ބައެއް ހިދުމަތްތަކުގެ ތެރޭގައި؛
- ޕޮޓަރީ އަދި ސެރަމިކް އާޓްގެ ފަންނު ދަސްކޮށްދިނުމަށް ކޯސްތައް ހިންގުން.
- ޕޮޓަރީ އަދި ސެރަމިކް އާޓްގެ ފަންނުގެ މަސައްކަތް ތަޖުރިބާ ކޮށްލަން ބޭނުންވާ މީހުންނާއި ކުޑަކުދިންނަށް އެ ފުރުސަތު ދިނުން.
އެޗްޑީސީން ބުނި ގޮތުގައި، ވޯކްޝޮޕްތަކާއި ފަންނުވެރިންގެ ހުނަރު ދައްކުވައިދޭ އެގްޒިބިޝަންތައް ބޭއްވުމަށް އަދި ފްރީލާންސް އާޓިސްޓުންނަށް ވެސް މި ސްޓޫޑިއޯ ބުކްކޮށްގެން ބޭނުންކުރެވޭނެ އެވެ.