ވަރަށް ބޮޑަށް މަރާމާތުކުރަން ޖެހިފައިވާ މާލެ-ހުޅުމާލެ ހައިވޭގެ މަސައްކަތް މިރޭ ފަށަން ތައްޔާރުވެއްޖެ އެވެ.
ފުލުހުން ސޯޝަލް މީޑިއާގައި މިއަދު ކުރި ޕޯސްޓެއްގައި ބުނީ މަގުތަކަކީ އަމާން، ރައްކާތެރި ތަނަކަށް ހެދުމަށް ކުރާ މަސައްކަތުގެ ތެރެއިން ހައިވޭގެ ޓްރެފިކް ލައިންތައް އާކުރުމުގެ މަސައްކަތް މިރެއިން ފެށިގެން އެ މަސައްކަތް ނިމެންދެން އެޗްޑީސީން ކުރާނެ ކަމަށެވެ.
އެޗްޑީސީން އެ މަސައްކަތް ކުރިއަށް ގެންދާނީ ކޮންމެ ރެއަކު 12:00 އިން ހެނދުނު 6:00 އަށް ކަމަށް ފުލުހުން ބުންޏެވެ.
"ވީމާ، މި މަސައްކަތް ކުރިއަށް ދާއިރު، ހައިވޭ ބޭނުންކުރައްވާ ފަރާތްތަކުން މިކަމަށް ސަމާލުވުމަށް ދަންނަވަމެވެ،" ފުލުހުން ބުންޏެވެ.
މާލެ އާއި ހުޅުލެ އަދި ހުޅުމާލެ ގުޅުވައިދޭ ހައިވޭ ބަލަހައްޓައި މަރާމާތުކުރުމުގެ މަސައްކަތް ހަވާލުކޮށްފައި އޮންނަނީ އެޗްޑީސީއާ އެވެ.
ހައިވޭ މަރާމާތުކުރުމުގެ މަސައްކަތް ފެށިއިރު، އެ މަގުގެ ދެ ފަރާތުގައި ޖަހާފައިވާ ދަގަނޑުތަކުގައި ދަބަރު ޖަހައި ވަރަށް ބޮޑަށް ވަނީ ބާވެފަ އެވެ. އަދި ތާރު މަގުގައި ކުރަހާފައިވާ މަގުމަތީގެ ނިޝާންތައް ވެސް ވަނީ ވަރަށް ބޮޑަށް ފުހެވިފަ އެވެ. އެއާޕޯޓުގެ ފެންސުތައް ވެސް ވަރަށް ބޮޑަށް ބާވެ ވަނީ ހަލާކުވެފަ އެވެ.