ރާއްޖެ އާއި ތުރުކީއާ ދެމެދު ވިޔަފާރީގެ އެއްބަސްވުމެއްގައި ސޮއިކޮށްފި

ރާއްޖެ އާއި ތުރުކީއާ ދެމެދު ވިޔަފާރީގެ ގުޅުން ބަދަހިކުރުމުގެ އެއްބަސްވުމެއްގައި އިއްޔެ ސޮއިކޮށްފި އެވެ.

މި އެއްބަސްވުމުގައި ސޮއިކުރީ އާ ރައީސް ޑރ. މުހައްމަދު މުއިއްޒު މިހާރު ތުރުކީ އަށް ކުރައްވަމުން ގެންދަވާ ދަތުރުފުޅުގަ އެވެ.

ތުރުކީގެ ރައީސް ރަޖަބް ތައްޔިބް އުރުދުޣާންގެ ދައުވަތަކަށް ރައީސް ޑރ. މުއިއްޒު އެ ގައުމަށް ފެއްޓެވި ދަތުރުފުޅުގައި އިއްޔެ ބޭއްވެވި ބައްދަލުކުރުމުގެ ތެރެއިން މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. ތުރުކީގެ ފަރާތުން، ސޮއިކުރެއްވީ ޓްރޭޑް މިނިސްޓަރު އޮމާ ބޮލަޓް އެވެ.

"އެގްރީމަންޓް އޮން ޓްރޭޑް އެންޑް އިކޮނޮމިކް ކޯޕަރޭޝަން ބިޓްވީން ދަ ގަވަމަންޓް އޮފް ދަ ރިޕަބްލިކް އޮފް މޯލްޑިވްސް އެންޑް ދަ ގަވަމަންޓް އޮފް ދަ ރިޕަބްލިކް އޮފް ތުރްކިއޭ"ގެ ނަމުގައި ދެ ގައުމުން ސޮއިކުރި އެއްބަސްވުމާ ގުޅޭ އިތުރު ތަފްސީލެއް ދެ ސަރުކާރުން އަދި ނުދެ އެވެ.

ރައީސް ޑރ. މުއިއްޒާއި ތުރުކީގެ ރައީސް އުރުދުޣާން އިއްޔެ ވަނީ ބައްދަލުކުރައްވައި ދެ ގައުމުގެ ރަސްމީ ވާހަކަތައް ބާއްވައިފަ އެވެ.

ދެ ރައީސުންގެ ބައްދަލުވުމުގައި ރާއްޖެ އާއި ތުރުކީގެ ގުޅުން ވަރަށް ވަރުގަދަކަން ފާހަގަ ކުރައްވައި، އެ ގުޅުން އިތުރަށް ފުޅާކުރުމަށް ވިޔަފާރީގެ ދާއިރާ އާއި އިންވެސްޓްމަންޓާއި އިޔާދަކުރަނިވި ހަކަތަ އާއި މަތީ ތައުލީމުގެ ދާއިރާ އިން ގުޅުން ބަދަހި ކުރައްވާނެ ކަމަށް ރައީސް ޑރ. މުއިއްޒު ވިދާޅުވި އެވެ.

ރައީސް ޑރ. މުއިއްޒު، ތުރުކީގެ ރައީސް އުރުދުޣާންއާ މިއަދު ބައްދަލުކުރައްވަނީ.-- ފޮޓޯ: ރައީސް އޮފީސް

އިޖުތިމާއީ-އިގްތިސާދީ ތަރައްގީގެ އެކި ދާއިރާތަކުން ތުރުކީ އިން ރާއްޖެ އަށް ދޭ އެއްބާރުލުން ވެސް ރައީސް ޑރ. މުއިއްޒު ފާހަގަކުރައްވައި، އެކަމަށްޓަކައި ރައީސް އުރުދުޣާނަށާއި ތުރުކީގެ މީހުންނަށް ޝުކުރު އަދާކުރެއްވި ކަމަށް ރައީސް އޮފީހުން ބުންޏެވެ.

ތުރުކީގެ ރައީސް އުރުދުޣާންގެ ވާހަކަފުޅުގައި ރައީސް ޑރ. މުއިއްޒު ރިޔާސީ އިންތިހާބު ކާމިޔާބު ކުރެއްވުމުން އެކަމަށް މަރުހަބާ ވިދާޅުވެފަ އެވެ. އަދި ރައީސްކަމާ ހަވާލުވެވަޑައިގަތުމަށް ފަހު، ރައީސް ޑރ. މުއިއްޒު މަގާމުގެ ހައިސިއްޔަތުން ކުރައްވާ ފުރަތަމަ ދަތުރުފުޅަށް ތުރުކީ ހިޔާރު ކުރެއްވުމަކީ އެ މަނިކުފާނަށާއި ތުރުކީގެ މީހުންނަށް ލިބުނު ވަރަށް ބޮޑު ޝަރަފެއް ކަމުގައި ރައީސް އުރުދުޣާން ވިދާޅުވި އެވެ.

ރައީސް ޑރ. މުއިއްޒު، ތުރުކީގެ ރައީސް އުރުދުޣާންއާ މިއަދު ބައްދަލުކުރައްވަނީ.-- ފޮޓޯ: ރައީސް އޮފީސް

"މީގެ އިތުރުން، ރައީސުލްޖުމްހޫރިއްޔާ ތުރުކީވިލާތަށް ކުރެއްވި މި ދަތުރުފުޅުގެ ސަބަބުން، ތުރުކީވިލާތާއި ދިވެހިރާއްޖެއާ ދެމެދު އޮތް ގުޅުމުގެ އާ ބާބެއް ފެށުމަށް މަގުފަހިވެގެންދާނެކަން ޔަގީން ކުރައްވާ ކަމުގައި ތުރުކީވިލާތުގެ ރައީސް ރަޖަބް އްޔިބް އުރްދުޣާން ވިދާޅުވި އެވެ،" ރައީސް އޮފީހުގެ ވެބްސައިޓްގައި ވެ އެވެ.

ދެ ލީޑަރުން ދެއްކެވި ވާހަކަފުޅުގައި، ރާއްޖެ އާއި ތުރުކީއާ ދެމެދު އޮތް ގާތް ގުޅުން އިތުރަށް ބަދަހިކުރެވިދާނެ އެކި ދާއިރާތަކުގެ މައްޗަށް އަލިއަޅުއްވައިލައްވައި، ދެ ގައުމުގެ ގުޅުން ބަދަހިކުރުމުގެ މަގުޗާޓަކަށް އެއްބަސްވެވަޑައިގެންނެވި ކަމަށް ރައީސް އޮފީހުން ބުންޏެވެ.