ފ. މަގޫދޫ ސްކޫލުގެ ހިދުމަތްތައް ރަނގަޅުކުރަން އެ ރަށު ކައުންސިލުން އެއް މިލިއަނަށް ވުރެ ގިނަ ރުފިޔާ ހަރަދުކުރަން ނިންމައިފި އެވެ.
މަގޫދޫ ކައުންސިލްގެ ރައީސް އަބްދުﷲ ވަހީދު ވިދާޅުވީ އެ ރަށު ސްކޫލުގެ ކުލާސްރޫމްތަކާއި ސްކޫލްގެ ގޯތިތެރެއަކީ ދަރިވަރުންނަށް ކިޔެވުމަށް ފަހި މާހައުލަކަށް ހެދުމަށް ކައުންސިލުން އެކި ކަންކަން ރާވާފައިވާ ކަމަށެވެ.
ވަހީދު ވިދާޅުވި ގޮތުގައި، ކައުންސިލުގެ ބަޖެޓުން ބޮޑު ހަރަދެއް ކޮށްގެން ވަނީ ސްކޫލްގެ ހުރިހާ ކުލާސްރޫމްތަކެއް އޭސީ ކުރުމަށާއި ކޮމްޕިއުޓަ ލެބެއް ހެދުމަށާއި ޕާކެއް ހެދުމަށް އަދި ލައިބްރަރީއެއް ހަދަން ވެސް ނިންމައިފަ އެވެ.
"މީގެ އިތުރުން ވެސް، މިހާރު ވެސް ސްކޫލްގެ ހުރިހާ ތައުލީމީ އަދި ކުޅިވަރު ހަރަކާތްތަކުގައި، ހުރިހާ އިނާމާއި ތައްޓާއި މެޑަލް އަދި ސްކޫލްގެ އަހަރީ އިނާމު ދިނުމުގެ ހަފުލާގެ ހުރިހާ އިނާމެއް ދެނީ ކައުންސިލުން،" ވަހީދު ވިދާޅުވި އެވެ.
ސްކޫލަށް ގެންނަ ވަގުތީ ޓީޗަރުންގެ ހުރުމާއި ކެއުމާއި އަދި ދަތުރުގެ ހަރަދުތައް ވެސް ކައުންސިލުން ދޭނެ ކަމަށް ވަހީދު ވިދާޅުވި އެވެ.
އެ މަސައްކަތްތައް ކުރުމަށް މަގޫދޫ ކައުންސިލުން ވަނީ މިދިޔަ ބުދަ ދުވަހު އެ ރަށު ސްކޫލާ އެކު އެމްއޯޔޫގައި ވެސް ސޮއިކޮށްފަ އެވެ. އެ އެމްއޯޔޫގެ ދަށުން ހުރިހާ މަސައްކަތަކަށް 1،393،000ރ. ހަރަދުކުރަން ކައުންސިލުން ވަނީ ނިންމައިފަ އެވެ.