އަރަބި އަދި ތާނަ ލިޔުމަކީ އަހުމަދިއްޔާ އިންޓަނޭޝަނަލް ސްކޫލުގެ ކުދިންނަށް މަޖުބޫރު ދެ މާއްދާގެ ގޮތުގައި އެ ސްކޫލުން ހަމަޖައްސައިފި އެވެ.
ޕްރިންސިޕަލް މުހައްމަދު ރަޝީދު "މިހާރު" އަށް ދެއްވި އިންޓަވިއުއެއްގައި ވިދާޅުވީ، ކުދިން އެންމެ ތުއްތު އިރުން ފެށިގެން އިސްލާމާއި ދިވެހި މާއްދާ އަށް ލޯބި ޖައްސަން ޖެހޭ ކަމަށެވެ. އެގޮތުން އަރަބި ބަހާއި ދިވެހިން [ތާނައިން] އެންމެ ކުޑަމިނުން އަމިއްލަ ނަން ލިޔަން އެނގެން ޖެހޭނެ ކަމަށް އޭނާ ގަބޫލު ކުރައްވަ އެވެ.
އޭގެ މިސާލެއްގެ ގޮތުގައި ރަޝީދު ދެއްކެވީ ގްރޭޑް 10 ނިންމާ ކުއްޖެއްގެ އަތުލިޔުން އެހެން މީހަކަށް ކިޔަން އުނދަގޫވާ ވަރަށް ހަޑިކޮށް ލިޔާ މައްސަލަ އެވެ.
"ގްރޭޑް 10 ނިންމާ ކުއްޖެއްގެ ދިވެހި އަތުލިޔުމުން ފ، ދ، ލ އަދި ޅ އަކުރު އޮޅުން ނުފިލާނެ. ލާހިކެއް ނޫން ވަކިކުރާކަށް. އެއް ވެފައި ހުންނާނީ. އަރަބިން ލިޔެލަން ނޭނގޭނެ އަމިއްލަ ނަން ވެސް،" ރަޝީދު ވިދާޅުވި އެވެ.
އެހެންވެ، ދިވެއްސާއި އަރަބި ބަހުން ރީއްޗަށް ލިޔަން ދަސްކޮށްދިނުން ދަށް ގްރޭޑްތަކާ ހިސާބުން ފަށަން ޖެހޭކަން ފާހަގަ ކުރައްވަމުން އޭނާ ވިދާޅުވީ، މި އަހަރުން ފެށިގެން އަރަބި އަދި ތާނައިން ލިޔުން މަޖުބޫރު މާއްދާއަކަށް އަހުމަދިއްޔާގައި ހަދައި، ގްރޭޑް 1 އިން 8 ގެ ކުދިން އެ ނިންމުމަށް އަމަލުކުރަންޖެހޭނެ ކަމަށެވެ.
"އެއީ އަޅުގަނޑުމެންގެ އަމިއްލަ ރީތި ބަސް. އެއްވެސް ކުއްޖަކަށް ނޭނގޭނެ އަރަބިން އެ ކުއްޖެއްގެ އަމިއްލަ ނަން ވެސް ރީތިކޮށް ލިޔެލާކަށް. އަޅުގަނޑުމެން މުސްލިމުން އަރަބިން ނަން އެންމެ ކުޑަމިނުން އެނގެން ވާނެ. ތާނައިން ރީއްޗަށް ލިޔަން އެނގެންވާނެ [އެ ކުއްޖެއްގެ] ނަން،" އޭނާ ވިދާޅުވި އެވެ.
"އެހެންވެ މި އަހަރުން ފެށިގެން އަރަބި ތާނައިން ލިޔުން އެއީ ވަކިން މަޖުބޫރު މާއްދާއެއް ހަމަ، ރިޕޯޓު ފޮތަށް މާކްސް އަރުވާނެ."
މާލެ ސަރަހައްދުގެ އެންމެ ބާރު ބޮޑު އެއް ސްކޫލު، އަހުމަދިއްޔާގައި ޕްރީ ސްކޫލުން ފެށިގެން ގްރޭޑް 12 އަށް ކިޔަވާ 2،000އަށް ވުރެ ގިނަ ދަރިވަރުން އުޅެ އެވެ.
މިހާރު 258 ޓީޗަރުން ކިޔަވައިދޭ އަހުމަދިއްޔާ ސްކޫލުގެ ކިޔެވުން މިއަދު ފެށުނު ދިރާސީ އާ އަހަރާއެކު އެއް ދަންފަޅި އަށް ވަނީ ބަދަލުކޮށްފަ އެވެ.