ފާޓިލިޓީ ސެންޓަރާއެކު އައިޖީއެމްއެޗްގައި މި އަހަރު އައިވީއެފް ހަދަން ފަށަނީ

އައިޖީއެމްއެޗުގައި ފާޓިލިޓީ ސެންޓަރު ގާއިމްކޮށް، މި އަހަރުގެ ތެރޭގައި އައިވީއެފް ހަދަން ތައްޔާރުވެއްޖެ އެވެ.

މާލެ ހޮސްޕިޓަލްސް ގްރޫޕުން މިދިޔަ ބުރާސްފަތި ދުވަހު ބޭއްވި ނިއުސް ކޮންފަރެންސްގައި، ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ފާޓިލިޓި ސެންޓަރު ތަރައްގީކޮށް، ކުރިއަށް އޮތް މަދު ދުވަސްތަކުގެ ތެރޭގައި ހިދުމަތް ދޭން ފަށާނެ ކަމަށެވެ.

އޭނާ ވިދާޅުވި ގޮތުގައި ސެންޓަރު ހުޅުވުމުން އައިވީއެފްގެ ހިދުމަތް ވެސް އެތަނުން ދޭނެ އެވެ.

ގުދުރަތީ ގޮތުން ދަރިން ނުލިބޭ ނަމަ އެކަމަށް ދެން އޮތް ފަރުވާއަކީ އައިޔޫއައި އަދި އައިވީއެފް މެދުވެރިކޮށް ދަރިން ހޯދުމެވެ. ދަރިމައިވުމުގެ މައްސަލަތައް ރާއްޖޭގައި ގިނައިރު، އެ ފަރުވާއަށް ބޮޑު ހޭދައެއްކޮށް ރާއްޖެ އިން ބޭރުން ހިދުމަތް ހޯދަން ޖެހުމަކީ ގިނަ ބައެއްގެ ވަރަށް ބޮޑު ކަންބޮޑުވުމެކެވެ.

ދަރިމައިވުމުގެ މައްސަލަތަކަށް ފަރުވާ ދިނުމަށް އައިޖީއެމްއެޗްގައި ވަކި ހާއްސަ ސެންޓަރެއް ހަދާއިރު، އިންޑިއާގެ އެންޔޫ ހޮސްޕިޓަލާ ގުޅިގެން މިހާރު ވެސް އަންނަނީ "ނެޝަނަލް ޔޫރޯ ރީނަލް އެންޑް ފާޓިލިޓީ ސެންޓަރު"ގައި ފަރުވާ ދެމުންނެވެ.

އަޅުގަނޑުމެން މި ގާއިމްކުރާ ނޭޝަނަލް ފާޓިލިޓީ ސެންޓަރަކީ ނަން ބޯޑެއް ނޫން. މި ސެންޓަރަކީ އައިވީއެފް ހެދޭނެ ގޮތަށް ބޭނުންވާ ހުރިހާ އިކުއިޕްމަންޓާއި ވަސީލަތްތަކާއެކީގައި ގާއިމްކުރާ ފާޓިލިޓި ސެންޓަރެއް. -- ހަލީމް ވިދާޅުވި އެވެ.

"މިހާރު"ން ކުރި ސުވާލާ ގުޅިގެން، ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވީ ދަރިމައިވުމުގެ މައްސަލަތަކަށް ފަރުވާ ދިނުމަށް އެގްރިމެންޓު ކޮށްފައި އޮތަސް އެއީ ހަމައެކަނި ނަމެއްގައި އޮތް ނަން ބޯޑެއް ކަމަށެވެ. އެކަމަކު، ކިޑްނީއާ ޔޫރޯގެ އެހެނިހެން ހިދުމަތްތައް ވަރަށް ރަނގަޅަށް ލިބޭ ކަމަށް އޭނާ ވިދާޅުވި އެވެ.

"އަޅުގަނޑުމެން މި ގާއިމްކުރާ ނޭޝަނަލް ފާޓިލިޓީ ސެންޓަރަކީ ނަން ބޯޑެއް ނޫން. މި ސެންޓަރަކީ އައިވީއެފް ހެދޭނެ ގޮތަށް ބޭނުންވާ ހުރިހާ އިކުއިޕްމަންޓާއި ވަސީލަތްތަކާއެކީގައި ގާއިމްކުރާ ފާޓިލިޓި ސެންޓަރެއް. މާނައަކީ މި ތަނުގައި ޑޮކްޓަރަށް ދައްކާފައި...ހުރިހާ ކަމެއް ވެސް، ދަރުމަވަންތަ ހޮސްޕިޓަލްގައި ގާއިމްވެގެންދާނެ،" ހަލީމް ވިދާޅުވި އެވެ.

އައިޖީއެމްއެޗުގައި އެންޔޫ ހޮސްޕިޓަލުން ހިންގާ ރީނަލް އެންޑް ފާޓިލިޓީ ސެންޓަރު. ދަރިމައިވުމުގެ މައްސަލަތަކަށް އެ މަރުކަޒުގައި ފަރުވާ ނުދޭ ކަމަށް ވިދާޅުވި.-- ފޮޓޯ: މިހާރު

ދަރުމަވަންތައިގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވީ އެދެވޭ ގޮތެއްގައި މިހާތަނަށް ފާޓިލިޓީ ހިދުމަތް ފުޅާކުރުމުގެ މަސައްކަތް ނުކުރެވޭ ކަމަށެވެ. އެހެން ބަޔަކާ ނުގުޅި އައިޖީއެމްއެޗްގެ އަމިއްލަ މަރުކަޒެއް ހަދަނީ އެ ސަބަބާ ހެދި ކަމަށާއި އޭގެ ސަބަބުން ދަރިމައިވުމުގެ ފަރުވާއަށް ބޮޑު ކުރިއެރުމެއް ލިބޭނެ ކަމަށް ވެސް އޭނާ ވިދާޅުވި އެވެ.

"ބޭނުންވަނީ އަމިއްލަ ފައި މައްޗަށް ތެދުވެފައި އެހެން ހޮސްޕިޓަލްތަކާ ގުޅިގެން ކުރާ މަސައްކަތްތައް ވީހާ ވެސް މަދުވުންް ކުރިއަށް އޮތް ތަނުގައި. އޭގެ ދަށުން މަސައްކަތުގެ ލޯޑު ނެގޭ ވަރަކަށް އަޅުގަނޑުމެން ކުރާނީ ބޭރު ބަޔަކާ ގުޅިގެން ކުރުމުގެ ބަދަލުގައި،" ޝާހު ވިދާޅުވި އެވެ.

އޭނާ ވިދާޅުވީ، އައިވީއެފް ހެދުމަށް އެހީދޭނެ ގޮތް ކަނޑައެޅުމަށް އެންސްޕާއިން ހަދާފައިވާ ގައިޑްލައިނަށް ފެތޭ މީހުންނަށް އެ އެހީގެ ދަށުން ފަރުވާ ކުރިއަށް ގެންދެވޭނެ ކަމަށެވެ.

ރާއްޖޭގައި މި ވަގުތު އައިވީއެފް ހަދައިދެނީ ޓްރީޓޮޕް ހޮސްޕިޓަލުގައި އެކަންޏެވެ. އެތަނުގައި މިދިޔަ މެއި މަހުގެ ތެރޭގައި އައިވީއެފް ފަށައި ފުރަތަމަ ދަރިފުޅު ވިހާފައިވާ ކަން އިއުލާންކޮށް، ހިދުމަތް ވަރަށް ކާމިޔާބު ކަމަށް އެ ހޮސްޕިޓަލުން ވަނީ ބުނެފަ އެވެ.