ލަންކާގައި ހައްޔަރުކުރި މީހާއަށް ކުރަނީ ރާއްޖޭގެ ގޭންގު ލީޑަރަކު މަރާލަން އުޅުނު ކަމަށް

ސްރީ ލަންކާގެ ޓޫރިސްޓުންގެ މެދުގައި މަގުބޫލު އަރުގަމް ބޭ ސަރަހައްދުގައި ހަމަލާދޭން އުޅުނު ކަމުގެ ތުހުމަތުގައި ހައްޔަރުކުރި ދިވެހި މީހާ އަށް އެ ގައުމުގައި އުޅޭ ރާއްޖޭގެ ގޭންގް ލީޑަރަކު މަރާލަން އުޅުނު ކަމުގެ ތުހުމަތު ކުރާކަން "މިހާރު" އަށް އެނގިއްޖެ އެވެ.

ލަންކާގެ ޓެރަރިޒަމް އިންވެސްޓިގޭޝަން ޑިވިޝަން (ޓީއައިޑީ) އިން ބަލަމުން އަންނަ މައްސަލައަކާ ގުޅިގެން މިދިޔަ މަހުގެ 24 ގައި ހައްޔަރުކުރީ ބިލާލް މުހައްމަދު ކިޔާ މީހެއްކަން ވަނީ އެނގިފަ އެވެ. ލަންކާގެ އަންހެނަކާއި ދިވެހި ފިރިހެނަކަށް ލިބިފައިވާ ބިލާލަކީ ރާއްޖެ އާއި ލަންކާގެ ވެސް ރައްޔިތުކަން އޮންނަ، އެ ގައުމުގައި އުޅޭ މީހެކެވެ.

ލަންކާގެ ނޫސްތަކުން ކުރިން ރިޕޯޓުކޮށްފައިވާ ގޮތުގައި ބިލާލް ހައްޔަރުކުރީ އަރުގަމް ބޭ ސަރަހައްދުގައި އިޒްރޭލުގެ ބަޔަކު ހިންގާ "ޗަބާދް ހައުސް" ކިޔާ ތަނަކަށް ހަމަލާދޭން އުޅޭ ކަމުގެ ތުހުމަތުގަ އެވެ. މުސްލިމުން ގިނަ އަރުގަމް ބޭ ސަރަހައްދުގައި، ޗަބަދް ހައުސް އަށް ދާ އިޒްރޭލު ޓޫރިސްޓުންނާއި މުސްލިމުންނާ ދެމެދު މި ފަހުން ކުރިމަތިލުންތައް ވެސް އާންމުވެފައިވާއިރު، އެ ހަމަލާ ރާވާކަމުގެ މައުލޫމާތު ލަންކާގެ ފުލުހުންނަށް ދިނީ އިންޑިއާގެ އިންޓެލިޖެންސް އެޖެންސީންނެވެ.

ނަމަވެސް، "މިހާރު" އަށް އެނގިފައިވާ ގޮތުގައި ބިލާލް ހައްޔަރުކުރީ މާލޭގެ ގޭންގެއްގެ ލީޑަރެއްގެ ގަޔަށް ބަޑި ޖަހައި މަރައިލަން އުޅުނު ކަމުގެ ތުހުމަތުގަ އެވެ.

އެކަމާ ގުޅިގެން ލަންކާ ފުލުހުންގެ ތަރުޖަމާނު ނިހާލް ތަލްދުއާ އާ "މިހާރު" އިން ސުވާލުކުރުމުން ދިވެއްސަކު ހައްޔަރު ކޮށްފައިވާކަން ޔަގީން ކޮށްދެއްވި އެވެ. އެކަމަކު ވިދާޅުވީ މައްސަލައިގެ ތަފްސީލެއް ދެވެން ނެތް ކަމަށެވެ.

Lanka gai dheyn ulhunu hamalaa aa gulhigen Dhivessegge dhariyaku hayyaru koffi

The most trusted news source in the Maldives

Mihaaru

ނަމަވެސް މަރައިލަން އުޅުނު ކަމަށް ބުނާ މީހާ ލަންކާގެ ޕޮލިހަށް ހާޒިރުކޮށް އެކަން ވަނީ އަންގައިފަ އެވެ. އޭނާ މަރައިލަން ރާވައި، އެކަމާ ބެހޭ ގޮތުން ފޯނުން ކޮށްފައިވާ މެސެޖުތަކަކާއި ފައިސާގެ މުއާމަލާތްތަކަކާ ބެހޭ މައުލޫމާތު ދީފައިވާކަން ވެސް ވަނީ އެނގިފަ އެވެ.

ހައްޔަރުކޮށްފައިވާ ބިލާލަކީ ނޮވެމްބަރު 2015 ގައި ސްރީ ލަންކާގައި ހުސައިން ރަޒީން (ރަބަރޭ) މަރައިލި މައްސަލާގައި ލަންކާ ފުލުހުން ހައްޔަރުކުރި މީހެކެވެ. އެ މައްސަލައިގައި ހިމެނޭ މީހުންގެ މައްޗަށް ރާއްޖޭގައި ކުރި ދައުވާގައި ބުނާ ގޮތުގައި ބިލާލް އެކަން ކުރީ ރާއްޖޭގައި ތިބި ބަޔަކު ފައިސާ ދިނުމުންނެވެ.

Rabarey ge gaathilah 2 faharah faisaa dhin: Dhaulaiy

The most trusted news source in the Maldives

Mihaaru

މައްސަލައިގައި ދައުވާ ލިބުނު މީހަކު ވަނީ ރަބަރޭ މަރައިލުމުގެ ކުރިން ބިލާލްއާ ބައްދަލުކޮށް އެކަމަށް ފައިސާ ދީފައި ކަމަށާއި ބިލާލް ގެންގުޅުނު ވޭނެއްގެ ތެރޭގައި ރަބަރޭ މަރައިލުމަށް ފަހު ރަބަރޭގެ ފޮޓޯ ފޮނުވުމުން އިތުރަށް ބިލާލަށް ފައިސާ ފޮނުވި ކަމަށް ދައުވާގައިވެ އެވެ.

އެ މައްސަލަ ތަހުގީގުކުރި ލަންކާގެ ފުލުހުން ބުނެފައިވާ ގޮތުގައި ރަބަރޭ މަރައިލީ 140 މިލިއަން ލަންކާ ރުޕީސްއަށެވެ. އެ ކަން ކުރީ ދިވެހި ވިޔަފާރިއަކު ހަރަދު ކޮށްގެން ކަމަށާއި ވިޔަފާރިވެރިޔާ ބޭނުންވީ އޭނާގެ ކޮއްކޮއެއްގެ މަރުގެ ބަދަލު ހިފަން ކަމަށް ލަންކާ ފުލުހުން އޭރު ބުނެފައިވެ އެވެ.