ގެދޮރުވެރިޔާ ސްކީމްގެ ދަށުން ހުޅުމާލެ އިން ދޫކުރާ ފްލެޓްތައް ދޫކުރުން ލަސްވެ، ހައުސިން މިނިސްޓްރީގެ ތެރޭގައި މުޒާހަރާ ކުރަން ފަށައިފި އެވެ.
ހުޅުމާލޭގައި އިމާރާތް ކުރަމުން އަންނަ 4،000 ފްލެޓް ލިބުނު މީހުންގެ ލިސްޓު އާންމުކުރާނެ ކަމަށް ހައުސިން މިނިސްޓްރީން ކުރިން ދިން މުއްދަތު މިދިޔަ ހަފްތާގެ ނިޔަލެވެ. އެކަމަކު އިއްޔެ މިނިސްޓްރީން އާންމުކުރި ބަޔާނުގައި ވަނީ ލިސްޓު ނެރުން މުއްދަތެއް ނެތް ގޮތަށް ފަސްކޮށްފަ އެވެ.
އެ މައްސަލާގައި ހައުސިން މިނިސްޓްރީ ހިންގަމުން އަންނަ އިމާރާތް ކައިރިއަށް ގިނަ ބަޔަކު އެއްވެ މިހާރު ދަނީ އަޑުގަދަކުރަމުންނެވެ. އާންމުވެފައިވާ ވީޑިއޯތަކުން ފެންނަ ގޮތުގައި ބައެއް މީހުން ވަނީ އެ އޮފީހުގެ އެތެއަށް ވަދެ ވެސް ނުރުހުން ފާޅުކޮށްފަ އެވެ.
ލިސްޓު ދިގުލައިގެން ދިއުމާއި އެކަމާ ގުޅިގެން ފުރިހަމައަށް ޖަވާބުދާރީވުމަށް އެއްވުމުގެ ބައިވެރިން ދަނީ ގޮވަމުންނެވެ.
ހައުސިން މިނިސްޓްރީން އިއްޔެ ނެރުނު އިއުލާނުގައި ބުނީ ގެދޮރުވެރިޔާ ސްކީމްގެ ލިސްޓު މުރާޖައާ ކުރުމުގެ މަސައްކަތް ކުރަމުން އަންނަނީ ރައީސް ޑރ. މުހައްމަދު މުއިއްޒުގެ ލަފާގެ މަތިން އެކުލަވާލާފައިވާ ހައުސިން އެޑްވައިޒަރީ ކޮމިޓީ އާއި ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން ކަމަށް މިނިސްޓްރީން ބުންޏެވެ.
އެ ލިސްޓު މުރާޖައާ ކުރުމުގެ މަސައްކަތް ކުރަމުން އަންނަނީ ރައީސް ޑރ. މުހައްމަދު މުއިއްޒުގެ ލަފާގެ މަތިން އެކުލަވާލާފައިވާ ހައުސިން އެޑްވައިޒަރީ ކޮމިޓީ އާއި ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން ކަމަށް މިނިސްޓްރީން ބުންޏެވެ.
ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ. އެކަމަކު ދާއިމީ ލިސްޓުގައި ހިމެނޭ 4000 މީހުންގެ ތެރެއިން 60 ޕަސެންޓް މީހުން ޝަރުތު ހަމަނުވާ ކަމަށް އޭސީސީން ބުނެ އެވެ.