ޓިނު ބިލްޑިންގް އަލިފާން: ފުލުހުންނާއި ސިފައިން ކޮމިޓީއަށް ހާޒިރުކޮށް ސުވާލުކުރަނީ

ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގި ޓިނު ބިލްޑިންގާއި އެންވަޔަރުމަންޓް މިނިސްޓްރީ ހިންގި ގްރީން ބިލްޑިންގްގައި މިދިޔަ ބުރާސްފަތި ދުވަހު ރޯވި އަލިފާނުގެ ހާދިސާއާ ގުޅޭ މައުލޫމާތުތައް ސާފުކުރަން ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީން ނިންމައި، އެކަން އެ ކޮމިޓީގެ މެމްބަރުންނަށް މިއަދު އަންގައިފި އެވެ.

ކޮމިޓީގެ މުގައްރިރު އޭދަފުށީ ދާއިރާގެ ޕީއެންސީގެ މެމްބަރު އަހުމަދު ސަލީމް (ރެޑްވޭވް ސަލީމް) ގެ އެދިވަޑައިގަތުމަކަށް އެ ކޮމިޓީ ބާއްވަން ތާވަލްކުރީ އަންނަ ބުރާސްފަތި ދުވަހުގެ ހެނދުނު 10 ޖަހާއިރަށެވެ. އެ ދުވަހު ކޮމިޓީ އަށް ހާޒިރުކުރަން ނިންމާފައި ވަނީ ޑިފެންސް މިނިސްޓްރީ އާއި ފުލުހުންގެ ކަމާ ގުޅުން ހުރި ބޭފުޅުން ކަމަށް ކޮމިޓީން މެމްބަރުންނަށް ފޮނުވި މެސެޖުގައި ވެ އެވެ.

ޓިނު ބިލްޑިންގުގައި ރޯވެ އެ އިމާރާތާ ޖެހިގެން ހުންނަ ގްރީން ބިލްޑިންގަށް އަލިފާން ފެތުރުނީ އެމްއެންޑީއެފްގެ ފަޔާމަނުންގެ އިހުމާލުން ކަމަށް އެމްޑީޕީން މިއަދު ބޭއްވި ޕާލަމެންޓްރީ ގުރޫޕްގެ ބައްދަލުވުމުގައި ބުނެފައިވާއިރު، ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީން އެ ކަން ތަހުގީގު ކުރުމަށް ވެސް އެ ޕާޓީން ވަނީ ހުށަހަޅައިފަ އެވެ.

ސަލާމަތީ ހިދުމަތްތަކާ ބެހޭ ކޮމިޓީގެ މެމްބަރަކު މިއަދު ވިދާޅުވީ، އެހެން ކަމަކާ ގުޅިގެން މިދިޔަ ބުރާސްފަތި ދުވަހު ހަވީރު ބޭއްވި އެ ކޮމިޓީގެ ސިއްރު ބައްދަލުވުމުގައި ހޯމް މިނިސްޓަރު އަލީ އިހުސާން އަލިފާނުގެ ހާދިސާއާ ގުޅޭ ޖަވާބުތައް ދެއްވި ކަމަށެވެ. އެކަމަކު، އެއީ ސިއްރު ބައްދަލުވުމެއް ކަމަށް ވުމުން އޭގެ ތަފުސީލް މީޑިއާއާ ހިއްސާއެއް ނުކުރެއްވި އެވެ.

ތިން މިނިސްޓްރީ އާއި މާލެ ސިޓީ ކައުންސިލްގެ ބައެއް ހިންގި ދެ އިމާރާތުގައި ރޯވި މައްސަލާގައި ރައްޔިތުންގެ މަޖިލިހުގެ ކުއްލި ޖަލްސާއެއް ބާއްވައި ދިނުމަށް ހުށަހަޅާނެ ކަމަށް ވެސް އެމްޑީޕީން މިއަދު ބުންޏެވެ. އެކަމަކު، ކުއްލި ޖަލްސާއެއް ބާއްވަން ސޮއި ބޭނުންވާ އަދަދަށް އެމްޑީޕީގައި މެމްބަރުންނެއް ނެތެވެ. މަޖިލިހުގެ ކުއްލި ޖަލްސާއެއް ބޭއްވޭނީ މަދުވެގެން 31 މެމްބަރުންގެ ސޮޔާ އެކު ހުށަހެޅުމުންނެވެ. ނަ،މަވެސް، ރައްޔިތުންގެ މަޖިލިހުގައި ތިއްބެވީ އެމްޑީޕީގެ 12 މެމްބަރުންނެވެ.

އެމްޑީޕީގެ ޕާލަމެންޓްރީ ގުރޫޕްގެ ލީޑަރު އިބްރާހިމް ނާޒިލް ވިދާޅުވީ، ހައުސިން މިނިސްޓްރީއާ ޖެހިގެން ހުރި ގްރީން ބިލްޑިންގަށް އަލިފާންގަނޑު ފެތުރި، އެ އިމާރާތް އެއްކޮށް އަނދައިގެން ދިޔުމުގައި އެމްއެންޑީއެފްގެ އިހުމާލު ވަރަށް ބޮޑަށް އެބައޮތް ކަމަށެވެ. އެހެންވެ އެ މައްސަލަ ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅަން އެ ޕާޓީން ވަނީ ނިންމައިފަ އެވެ.

Alifaanuge haadhisaa hin'gi goiy thahugeegu kuran beyruge ehee hoadhanee

The most trusted news source in the Maldives

Mihaaru

ޕޮލިސް ކޮމިޝަނަރު އަލީ ޝުޖާއު އިއްޔެ ވިދާޅުވީ، އަލިފާނުގެ ހާދިސާއާ ގުޅޭ ތަހުގީގު ކުރިއަށް ގެންދާ ކަމަށާއި އެ ތަހުގީގަށް ބައިނަލްއަގްވާމީ ފަރާތެއްގެ އެހީތެރިކަން ހޯދާނެ ކަމަށެވެ.

އަލިފާނުގެ ހާދިސާ އަށް ފަހު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރުމަންޓް މިނިސްޓްރީގެ މަސައްކަތްތައް އިއްޔެ އިން ފެށިގެން ވަގުތީ ގޮތުން ހިންގަނީ ދަރުބާރުގޭގަ އެވެ.