ޑްރަގް ވިއްކައި މަނީލޯންޑާކުރާ ކަމުގެ ތުހުމަތުގައި ހައްޔަރުކުރި ދެ މީހުން ދޫކޮށްލައިފި

ފުވައްމުލަކުގައި ފުޅާ ދާއިރާއެއްގައި މަސްތުވާތަކެތި ވިއްކައި، މަނީ ލޯންޑާކުރާ ކަމަށް ތުހުމަތު ކުރެވޭ މައްސަލާގައި ހައްޔަރުކޮށްފައިވާ ދެ މީހަކު ބަންދުން ދޫކޮށްލަން ހައި ކޯޓުން އަމުރުކޮށްފި އެވެ.

މަސްތުވާތަކެއްޗާ ދެކޮޅަށް ފުވައްމުލަކުގައި ފުލުހުން ހިންގި ބޮޑު އޮޕަރޭޝަނެއްގައި މިދިޔަ މަހުގެ 9 ވަނަ ދުވަހު ހައްޔަރުކުރީ ދޫޑިގަން، ކަރަންކާވިލާ އަހުމަދު ނިއުޝާދު، 34، އާއި ދޫޑިގަން، ޒަމާނީވިލާ، ހަސަން އާޒިމް، 29 އެވެ.

އެ މީހުންނާ އެކު އިތުރު ބަޔަކު ހައްޔަރުކުރި ނަމަވެސް މި ދެ މީހުންގެ މައްޗަށް ފުލުހުން ކުރަނީ އެކަމުގައި އިސްކޮށް ހަރަކާތްތެރިވާ ކަމުގެ ތުހުމަތެވެ.

އެ މައްސަލާގައި ފުލުހުން ކުރިން ބުނެފައިވާ ގޮތުގައި ތަހުގީގަށް މިހާތަނަށް ހޯދި މައުލޫމާތުން، ނިއުޝާދުގެ ބޭންކު އެކައުންޓުން ފާއިތުވި ފަސް އަހަރުގެ ތެރޭގައި 21 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވެ އެވެ. އާޒިމްގެ ބޭންކު އެކައުންޓު މެދުވެރިކޮށްގެން ދެ އަހަރުގެ ތެރޭގައި ހަތް މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ފުލުހުން ބުންޏެވެ.

އެ މައްސަލައާ ގުޅިގެން ފުވައްމުލަކު މެޖިސްޓްރޭޓުން އެ މީހުން ޝަރީއަތް ނިމެންދެން ބަންދުކުރި އެވެ.

އެކަމަކު ހައި ކޯޓުގައި މައްސަލަ އިސްތިއުނާފު ކުރުމުން ކޯޓުން ކުރި ހުކުމްގައި ބުނީ އެ ދެމީހުން ޝަރީއަތް ނިމެންދެން ބަންދުކުރުމުގައި ފަނޑިޔާރު ރިއާޔަތްކޮށްފައި ވަނީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާ އަށް ކަމަށެވެ. އެއީ ކުށުގެ ތުހުމަތުގައި ބަންދު ކޮށްފައިވާ މީހަކު ބަންދުކޮށްފައި ވަނީ ގާނޫނާ އެއްގޮތަށް ތޯ ނުވަތަ ނޫންތޯ ކަނޑައަޅައި އެ މީހަކު އިތުރަށް ބަންދުގައި ބެހެއްޓުމާ މެދު ގޮތް ކަނޑައަޅާ މާއްދާއެކެވެ.

އެންމެ ފުރަތަމަ ކަމަކަށް ފަނޑިޔާރު ބަލަން ޖެހޭނީ ތުހުމަތު ކުރި ކުށް އެ މީހަކު ކުރި ކަމަށް ބާރު ލިބިދޭ ހެކި ހުރިތޯ ކަމަށާއި ހެކި ހުރި ނަމަ ހެކީގެ ނިސްބަތް ބަލައި ދެ ހާލަތެއް އެ މާއްދާގައި ބަޔާންކުރާ ކަމަށް ހުކުމްގައިވެ އެވެ. އެއީ ތުހުމަތު ކުރެވޭ މިންވަރަށް ހެކި ހުރުމާއި ކުށް ކުރިކަމަށް ތުހުމަތުކުރެވޭ މިންވަރަށް އެކަށީގެންވާ ހެކި އެ ވަގުތު ނެތް ނަމަވެސް ތުހުމަތު ކުރެވޭ ކޮންމެވެސް މިންވަރަކަށް ހެކި ހުރުމެވެ.

Drug vikkai money launder kuraa bodu network eh Fuvammulakun athulaigenfi

The most trusted news source in the Maldives

Mihaaru

އެކަމަކު އާޒިމްގެ އަމުރުގައި، އެކަށީގެންވާ ހެކި ހުރި ކަމަށް ބުނުމަށް ފަހު، އިތުރު ދެ ތަނެއްގައި ވަނީ ތުހުމަތު ކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށް ބަޔާންކޮށްފަ އެވެ. ނިއުޝާދުގެ އަމުރުގައި ތުހުމަތު ކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށް ބުނެ ފަނޑިޔާރު ރިއާޔަތް ކޮށްފައި ވަނީ ތުހުމަތު ކުރެވޭ މިންވަރަށް ހެކި ހުރި ކަމަށެވެ.

ހައި ކޯޓުން ބުނީ ދައުލަތުން ވެސް އެއްބަސްވާ ގޮތުގައި ތުހުމަތު ކުރެވޭ ކޮންމެވެސް މިންވަރެއްގެ ހެކި ހުރި ކަމަށް ބަޔާން ކުރުމަށް ފަހު، އެ ދެ މީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށެވެ.

އިސްތިއުނާފާ ގުޅިގެން ދައުލަތުން ވަކާލާތު ކޮށްފައި ވަނީ، ދަށު ކޯޓަށް ހެދިފައި އޮތް ގޯހަކީ ބަންދު އަމުރަށް ބުރޫ ނާރާނެ އިޖުރާއީ އައިބެއްގެ ގޮތުގައި ކަނޑައަޅައިދިނުމަށެވެ. އެކަމަކު، އެކަން އެގޮތަށް ކަނޑައަޅައި ދެވޭނެ ގާނޫނީ ހަމައެއް ދައުލަތަށް ދެއްކިފައި ނުވާ ކަމަށާއި އެއީ ދަށު ކޯޓަށް ހެދިފައި އޮތް ގޯހުގެ ސަބަބުން ކަމަށް ހައި ކޯޓުން ބުންޏެވެ.

އެފަދަ ސަބަބުތަކާ ހުރެ، ހައި ކޯޓުން ނިންމީ ނިއުޝާދާއި އާޒިމް ޝަރީއަތް ނިމެންދެން ބަންދުކުރަން ފުވައްމުލަކު ކޯޓުން ކުރި އަމުރު ބާތިލުކުރާށެވެ.