ސޯނޫ ސޫދު ހައްޔަރުކުރަން ކޯޓު އަމުރެއް ނެރެފި

މަކަރާއި ހީލަތުގެ މައްސަލައެއްގައި ބޮލީވުޑްގެ އެކްޓަރު ސޯނޫ ސޫދު ހައްޔަރުކުރަން އިންޑިއާގެ ކޯޓަކުން އަމުރެއް ނެރެފި އެވެ.

ސޯނޫ ހައްޔަރުކުރަން އިންޑިއާގެ ޕަންޖާބުގެ ލުދިއާނާ ޑިސްޓްރިކްޓުގެ ކޯޓުން އަމުރެއް ނެރުނީ މިދިޔަ ބުރާސްފަތި ދުވަހު އެވެ.

މޯހިތު ޝުކްލާ ކިޔާ މީހެއްގެ ފަރާތުން ލުދިއާނާގެ ވަކީލެއް ކަމަށްވާ ރާޖޭޝް ކަންނާ ކޯޓަށް ހުށަހެޅި މައްސަލާގައި ތުހުމަތުކޮށްފައި ގޮތުގައި، ސޯނޫ ވަނީ މަކަރާއި ހީލަތު އެއް މިލިއަން ރުޕީސް އޭނާގެ އަތުން ހޯދައިފަ އެވެ. އަދި އެ ފައިސާ ހޯދީ ކްރިޕްޓޯ ކަރަންސީއެއްގައި އިންވެސްޓްކުރަން ކަމަށް ބުނެ އޮޅުވާލައިގެންނެވެ.

ކޯޓުން ވަނީ އެ މައްސަލާގައި ޖަވާބުދާރީވުމަށް ސޯނޫ ކޯޓަށް ހާޒިރުވުމަށް މީގެ ކުރިން ވެސް އަންގައިފަ އެވެ. ނަމަވެސް، އެ އަމުރަށް އޭނާ ތަބާނުވުމުން އޭނާ ހައްޔަރުކޮށްގެން ކޯޓަށް ހާޒިރުކުރުވުމަށް މުމްބާއީގެ ފުލުހުންނަށް ވަނީ އަމުރުކޮށްފަ އެވެ.

ފުލުހުންނަށް އަމުރުކޮށްފައި ވަނީ ސޯނޫ ހައްޔަރުކޮށްގެން އަންނަ ހޯމަ ދުވަހުގެ ކުރިން އޭނާ ކޯޓަށް ހާޒިރުކުރުވުމަށެވެ. މި މައްސަލައިގެ ދެން އޮތް އަޑުއެހުން ވެސް ތާވަލުކޮށްފައި ވަނީ އެ ދުވަހަށެވެ.