އަހަރު ފެށުނުއިރު އާސަންދައަށް ކުރި ހޭދަ ކުޑައެއް ނުވި

ސަރުކާރުގެ އިގުތިސާދީ އިސްލާހީ އެޖެންޑާގެ ދަށުން، އާސަންދައިގެ އިސްރާފުތައް ހުއްޓުވައި ހަރަދު ކުޑަކުރުމަށް އަޅަން ފަށާފައިވާ ފިޔަވަޅުތަކުގެ ނަތީޖާ، މާލީ ހިސާބުތަކުން ނުދައްކައި އަނެއްކާވެސް މަތިވެއްޖެ އެވެ.

ފިނޭންސް މިނިސްޓްރީން ކޮންމެ ހަފުތާއަކު އާންމުކުރާ މާލީ ހިސާބުތައް ދައްކާ ގޮތުން، މުޅި އަހަރަށް އާސަންދަ އަށް ކަނޑައަޅާފައިވާ 1.85 ބިލިއަން ރުފިޔާގެ ތެރެއިން މި މަހުގެ 13 ވަނަ ދުވަހާ ހަމައަށް ވަނީ 413.6 މިލިއަން ރުފިޔާ ހޭދަވެފަ އެވެ.

މިއީ މިދިޔަ އަހަރުގެ އެ މުއްދަތުގައި ހަރަދުވި 240.3 މިލިއަން ރުފިޔާ އާ އަޅާބަލާއިރު، 72 ޕަސެންޓުގެ އިތުރުވުމެކެވެ.

އާސަންދައަށް ކުރާ ހޭދަ ކުޑަނުވިޔަސް، ދައުލަތުގެ އިދާރީ އަދި ހިންގުމުގެ ޖުމްލަ ހަރަދު މިދިޔަ އަހަރާ އަޅާބަލާއިރު މި އަހަރު ވަނީ ވަރަށް ބޮޑަށް ކުޑަކޮށްފަ އެވެ.

މިދިޔަ އަހަރުގެ ފެބްރުއަރީ 13 ވަނަ ދުވަހާ ހަމައަށް އިދާރީ ހިންހުމަށް ހަރަދުކުރި 2.2 ބިލިއަން ރުފިޔާ، މި އަހަރު ވަނީ 1.7 ބިލިއަން ރުފިޔާއަށް ކުޑަކޮށްފަ އެވެ. މިއީ ގާތްގަނޑަކަށް 440 މިލިއަން ރުފިޔާގެ ދަށްވުމެކެވެ.

ދައުލަތް ހިންގުމުގެ ހަރަދާ އެކު، ޖުމްލަ ހަރަދު ވެސް މި އަހަރުގެ އެހާތަނަށް ވަނީ ވަރަށް ބޮޑަށް ކުޑަވެފަ އެވެ.

މިގޮތުން، މިދިޔަ އަހަރުގެ އެ މުއްދަތުގައި ޖުމްލަ ހަރަދުގެ ގޮތުގައި ހުރި 4.1 ބިލިއަން ރުފިޔާ، މި އަހަރު ވަނީ ތިން ބިލިއަން ރުފިޔާއަށް ދަށްވެފަ އެވެ.

ޖުމްލަ ހަރަދުން ގާތްގަނޑަކަށް އެއް ބިލިއަން ރުފިޔާ ސަލާމަތްކޮށްފައިވަނީ، ރިކަރަންޓު ހަރަދުތައް ވެސް ކުޑަކޮށްގެންނެވެ. ނަމަވެސް، ހަރަދުތައް މި މިންވަރަށް ކުޑަވުމުގެ ހިއްސާ އެންމެ ބޮޑީ، ކެޕިޓަލް ހަރަދުތައް ދަށްވުމެވެ.

މިދިޔަ އަހަރު ކެޕިޓަލް ހަރަދުގެ ގޮތުގައި ހުރި 855.8 މިލިއަން ރުފިޔާ، މި އަހަރު ވަނީ 169.8 މިލިއަން ރުފިޔާ އަށް ދަށްވެފަ އެވެ.

އުމްރާނީ ތަރައްގީ (ޕީއެސްއައިޕީ)ގެ މަޝްރޫއުތަކަށް ބަލާ ނަމަ މިދިޔަ އަހަރު ހުރި 819.4 މިލިއަން ރުފިޔާއިން މި އަހަރު ވަނީ 324.8 އަށް ވެއްޓިފަ އެވެ.

ހަރަދު ކުޑަކޮށްގެން ސަލާމަތް ކުރެވުނު އަދަދުގެ އެންމެ އެދެވޭ ނަތީޖާ، ބަޖެޓު ޑެފިސިޓަށް ނުކުރީ، މި މުއްދަތުގައި އާމްދަނީ ދަށްވުމުގެ ސަބަބުންނެވެ.

މިދިޔަ އަހަރުގެ ފެބްރުއަރީ 13 ވަނަ ދުވަހާ ހަމައަށް އާމްދަނީ އާއި ހިލޭ އެހީގެ ގޮތުގައި ލިބިފައިވަނީ 4.8 ބިލިއަން ރުފިޔާ އެވެ. ނަމަވެސް، މި އަހަރުގެ އެ މުއްދަތުގައި އެ އަދަދު ވަނީ 4.4 ބިލިއަން ރުފިޔާއަށް ދަށްވެފަ އެވެ.

މިގޮތުން، މި އަހަރުގެ މިހާތަނަށް ދައުލަތަށް ލިބުނު ޓެކްސް އާއި ޓެކްސް ނޫން އާމްދަނީ ވެސް ވަނީ ކުޑަވެފަ އެވެ.

މިދިޔަ އަހަރު ޓެކްސްގެ ގޮތުގައި ލިބުނު 4.1 ބިލިއަން ރުފިޔާ، މި އަހަރު ވަނީ 3.9 ބިލިއަނަށް ވެއްޓިފަ އެވެ. ޓެކްސް ނޫން ގޮތް ގޮތުން ލިބުނު އާމްދަނީ 718.7 މިލިއަން ރުފިޔާ އިން، މި އަހަރު 541.3 މިލިއަން ރުފިޔާ އަށް ވަނީ ތިރިވެފަ އެވެ.

އެއާ އެކު، މިދިޔަ އަހަރާ އަޅާބަލާއިރު، ފެބްރުއަރީ 13 ވަނަ ދުވަހާ ހަމައަށް، ދައުލަތުގެ ޖުމްލަ ހަރަދަށް ވުރެ، އާމްދަނީ 1.4 ބިލިއަން ރުފިޔާ އިތުރު ކަމަށް މާލީ ހިސާބުތަކުން ދައްކަ އެވެ.