ދެ ފަނޑިޔާރުން ވަކިކުރަން ލާޒިމްވާ ބިލް ފާސް ނުކުރަން ގޮވާލައި، 62 ވަކީލުންގެ ޕެޓިޝަނެއް

ސުޕްރީމް ކޯޓުގެ ފަނޑިޔާރުންގެ ބެންޗު ފަހަކަށް މަދުކޮށް، ދެ ފަނޑިޔާރަކު މަގާމުން ވަކިކުރަން ޖެހޭ ގޮތަށް ކޯޓުތަކާ ބެހޭ ގާނޫނަށް ހުށަހަޅާފައިވާ އިސްލާހުގެ ބިލް ފާސް ނުކުރުމަށް ރައްޔިތުންގެ މަޖިލީހުގެ މެންބަރުންނަށް ގޮވާލައި، 62 ވަކީލަކު މަޖިލީހަށް ޕެޓިޝަނެއް ހުށަހަޅައިފި އެވެ.

ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހަޅުއްވާފައިވާ ބިލާ ދެކޮޅަށް ވަކީލުން މަޖިލީހަށް ހުށަހެޅި ޕެޓިޝަންގައި ބުނެފައިވަނީ ބިލްގެ ސަބަބުން ގާނޫނުއަސާސީން ފަނޑިޔާރުންނަށް ކަށަވަރުކޮށްދީފައިވާ ރައްކާތެރި ކަމަށް އަސަރުކުރާ ކަމަށެވެ. އަދި ފަނޑިޔާރުންގެ މަސައްކަތާ އެއްވެސް ގޮތަކުން ބެހި ނުފޫޒު ފޯރުވުމަކީ ގާނޫނުއަސާސީން މަނާކޮށްފައިވާ ކަމެއްކަން އެ ސިޓީގައި ފާހަގަ ކޮށްފައިވެ އެވެ.

އިސްލާހު އޮތް ގޮތުން ދެ ފަނޑިޔާރަކު މަގާމަށް ގާބިލް ނޫން ކަމަށް ކަނޑައަޅަން ޖުޑީޝަލް ސާވިސް ކޮމިޝަން (ޖޭއެސްސީ) އަށް ލާޒިމްވެ އެވެ. އެއީ މިހާރު ސުޕްރީމް ކޯޓުގައި ހަތް ފަނޑިޔާރުންގެ ތެރެއިން ދެ ފަނޑިޔާރަކު މަގާމުން ވަކިކުރަން އެ އިސްލާހުގެ ދަށުން ލާޒިމްވާތީ އެވެ.

ގާނޫނުއަސާސީގައިވާ ގޮތުން ފަނޑިޔާރުން ތަބާވާންޖެހޭ ސުލޫކީ މިންގަނޑުތަކާއި އުސޫލުތަކުން ބޭރުނުވެ މަސައްކަތް ކުރާހާ ހިނދަކު ފަނޑިޔާރަކު މަގާމުން ވަކިކޮށްގެން ނުވާނެ އެވެ. އަދި ސުލޫކީ މައްސަލައެއް ޖޭއެސްސީއަށް ސާބިތުވެ، މަޖިލީހުގެ މެންބަރުންގެ ތިންބައިކުޅަ ދެބައި ވޯޓު ލިބިގެން ނޫނީ ފަނޑިޔާރަކު ވަކި ނުކުރެވެ އެވެ.

Court packing: Raajjeyge siyaasee sagaafathakah

The most trusted news source in the Maldives

Mihaaru

ވަކީލުންގެ ޕެޓިޝަންގައި ބުނީ ފަނޑިޔާރުން މަސައްކަތަށް ގާބިލް ނޫން ކަން ކަނޑައެޅުމުގައި ބަލާނީ ކޮން ކަންތައްތަކެއް ކަމެއް އަދި ވަކިވަކިން ކޮންމެ ފަނޑިޔާރެއްގެ މައްސަލަތައް ހޯދައިގެން ބަލާނީތޯ ފަދަ އެއްވެސް ތަފްސީލެއް ބިލްގައި ހިމަނާފައިނުވާ ކަމަށެވެ.

ސަރުކާރުގެ ތާއީދާ އެކު، ސުޕްރީމް ކޯޓުގެ ފަނޑިޔާރުންގެ ބެންޗަށް ގެންނަ މި ބަދަލު ވާހަކަ ފެށުނީ މަޖިލީހުގެ މެންބަރުންގެ ގޮނޑި ގެއްލޭ އިސްލާހު ބާތިލްކުރަން ފުލް ބެންޗުން މައްސަލައެއް ބަލަމުން ދަނިކޮށެވެ. ދައުލަތުން އެ ބެންޗުގައި އެދުނީ ގާނޫނުއަސާސީ އަށް ގެނައި އިސްލާހުގެ މައްސަލަ ނުބެލޭނެ ކަމަށް ނިންމުމަށެވެ. ނަމަވެސް ފަނޑިޔާރުންގެ ނިންމާފައިވަނީ އެ މައްސަލައިގެ ޝަރީއަތް ކުރިއަށް ގެންދިއުމަށެވެ.

"މި ދަނޑިވަޅުގައި ކޯޓުތަކުގެ ގާނޫނަށް ބަދަލު ގެނެސްގެން ސުޕްރީމް ކޯޓުގެ ބައެއް ފަނޑިޔާރުން މަގާމުން ވަކިކުރުމުގެ މަސައްކަތް ކުރުމަކީ ރައްޔިތުންގެ މަޖިލީހުން އެ މައްސަލައަށް ނުފޫޒު ފޯރުވުމަށް ކުރާ ކަމެއް ކަމަށް ތުހުމަތު ކުރުމަށް ޖާގަ ލިބި، އެކަމުގެ ސަބަބުން އާންމު ހަމަޖެހުމާއި ސުލްހަވެރިކަމަށް ހުރަސްއެޅިގެން ހިނގައިދިޔުމުގެ ފުރުސަތު އޮތްކަން ވެސް ފާހަގަކުރަން،" ޕެޓިޝަންގައިވެ އެވެ.

އެހެންވެ ވަކީލުން ގޮވާލާފައިވަނީ އެ ބިލް ފާސްކުރުމަކީ އެންމެ ރަނގަޅު ގޮތް ކަމަށް ނުދެކެތީ، ބިލް ފާސްނުކޮށް އަނބުރާ ފޮނުވާލުމަށެވެ. އެ ޕެޓިޝަންގައި ސޮއި ކުރައްވާފައިވާ ބޭފުޅުންގެ ތެރޭގައި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ބަންޑާރަ ނައިބު ޑރ. އަހުމަދު އަލީ ސަވާދު ވެސް ހިމެނިވަޑައިގަންނަވަ އެވެ.