ޑްރަގް އެތެރެކުރަން އުޅުނު ނެދަލެންޑްސްގެ މާބަނޑުމީހާގެ ބަންދަށް 30‏ ދުވަސް

ރާއްޖެއަށް ފަސް ކިލޯގެ މަސްތުވާތަކެތި އެތެރެކުރަން އުޅުނު މައްސަލައެއްގެ ތުހުމަތުގައި ހައްޔަރު ކޮށްފައިވާ ނެދަލެންޑްސްގެ މާބަނޑުމީހާގެ ބަންދުގެ މުއްދަތު 30 ދުވަހަށް ކްރިމިނަލް ކޯޓުން އިތުރުކޮށްފި އެވެ.

އުމުރުން 21 އަހަރުގެ ބްރިޓެނީ އަޑޯފޯ ބޮއާފޯގެ މި މަހުގެ ނުވަ ވަނަ ދުވަހު ހައްޔަރުކޮށް އޭނާގެ ބަންދަށް އެންމެ ފުރަތަމަ ދިނީ 15 ދުވަހެވެ. އެ މުއްދަތު މިދިޔަ ހުކުރު ދުވަހު ހަމަވުމުން މިހާރު ވަނީ އޭނާ އިތުރު 30 ދުވަހަށް ބަންދުގައި ބަހައްޓަން އަމުރުކޮށްފަ އެވެ.

ރާއްޖެއަށް މަސްތުވާތަކެތި އެތެރެ ކުރުމުގެ ތުހުމަތުވާ އެ އަންހެން މީހާގެ ލަގެޖުން ފަސް ކިލޯގެ މަސްތުވާތަކެތި ފެނިފައިވާ ކަމަށް ފުލުހުން ކޯޓުގައި ބުންޏެވެ.

އޭނާގެ ބަންދުގެ މުއްދަތު އިތުރުކުރި ކޯޓު އަމުރުގައިވާ ގޮތުގައި، ކޮންޓްރޯލް ޑެލިވަރީއަށް އޭރު އެއްބާރުލުން ނުދެވުނީ އެއީ ކޮން ކޮންކަމެއްކަން އޭނާއަށް ނޭނގޭތީ ކަމަށާއި އޭނާގެ ލަގެޖު ފޮށި ބަދަލުކޮށްފައިވާ ކަމަށް ވަކީލުން ބުނެފައިވެ އެވެ.

އޭނާއަކީ މާބަނޑު މީހަކަށް ވާތީ އޭނާގެ ބަލި ހާލަތަށް ބަލައި، ތަހުގީގު އަވަސްކޮށްދިނުމަށް ވަކީލުން އެދުނު ކަމަށް ކޯޓު އަމުރުގައިވެ އެވެ.

މާބަނޑު މީހަކަށް ވާތީ އޭނާގެ ކަންކަން ގާތުން ބެލުމަށް ފުލުހުންނަށް ކޯޓުން ވަނީ އަންގައިފަ އެވެ.