ގުޅިފަޅުން ގޯތި ލިބުނު މީހުންނަށް ބިންތައް ހަވާލުކުރަން ފަށައިފި

ބިންވެރިޔާ ސްކީމްގެ ދަށުން ގުޅިފަޅުން ގޯތި ލިބުނު މީހުންނަށް ބިންތައް ހަވާލުކުރުމުގެ މަސައްކަތް ފަށާފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވީ، އެ ސްކީމުގެ ދަށުން ގޯތި ލިބުނު މީހުންނަށް އެ ތަންތަން ހަވާލުކުރަން މިއަދު ފަށާފައިވާ ކަމަށެވެ. އަދި ވަގުތީ ކޮންސްޓްރަކްޝަން ސައިޓުތަކުގެ ގޮތުގައި މިހާރު ބޭނުންކުރަމުން އަންނަ ތަންތަނުން ގޯތި ލިބުނު މީހުންނަށް، ކޮންޓްރެކްޓަރުން ބިން ދޫކޮށްލުމުން އެތަން ހަވާލު ކުރާނެ ކަމަށް ވެސް މުއްތަލިބު ވިދާޅުވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހެދި ގުޅިފަޅުގެ ލޭންޑް ޔޫސް ޕްލޭނަށް މި ސަރުކާރުން ބަދަލު ގެނައުމާއި ގިރާވަރުފަޅުން ކުރިން ދޭން ނިންމި ބައެއް ގޯތިތައް ގުޅިފަޅުން ދޭގޮތަށް ހަމަޖެއްސުމުން އައި ބަދަލުތަކާ އެކު، ކުރީގެ ރަޖިސްޓްރީތައް ބާތިލްކުރި އެވެ. އެހެންވެ، މިދިޔަ މެއި މަހު ވަނީ އަލުން ގުރު ނަގައި ގޯތި ލިބޭ ތަންތަން އަލުން ކަނޑައަޅައިފަ އެވެ.

މި މަހުގެ ކުރީކޮޅު ހައުސިން މިނިސްޓްރީން ބުނި ގޮތުގައި އޭގެ ފަހުން 1،260 މީހަކަށް ގޯތީގެ ރަޖިސްޓަރީ ހަދައިދީ މިހާރު ވަނީ ހަވާލުކޮށްފަ އެވެ. ޖުލައި މަހުން ފެށިގެން ގޯތީގެ ރަޖިސްޓަރީ ދޫކުރަމުން އަންނައިރު، އިން ވަކިކޮށް ނިމޭ ބިންތައް އޭގެ ވެރިފަރާތްތަކާ މި ހަފުތާގައި ހަވާލުކުރާނެ ކަމަށް އެ މިނިސްޓްރީން ކުރިން ވެސް ބުނެފައިވެ އެވެ.

Gulhifalhu goathi thakuge inn vakikuran fashaifi, Anna hafthaagai havaalukuran fashanee

The most trusted news source in the Maldives

Mihaaru

އާ ރަޖިސްޓްރީއަށް މިދިޔަ އޮގަސްޓް މަހު ހުޅުވާލިޔަސް ގޯތި ލިބުނު ބައެއް މީހުން ދަނީ ގޯތިތަކުގެ ރަޖިސްޓަރީ ދިނުމަށް ހަދާ އާ އެއްބަސްވުމުގައި ސޮއިކުރަން ދެކޮޅު ހަދަމުންނެވެ. އެ މީހުން ބުނާ ގޮތުގައި އަލަށް ހަދާ އެއްބަސްވުމާއި ގޯތި ދިނުމުގެ އުސޫލާ ފުށުއަރަ އެވެ.

އެ މައްސަލަ ބޮޑުވެ މިނިސްޓްރީން އޭރު ނެރުނު ބަޔާނުގައި ވަނީ ކުރީގެ ސަރުކާރުން އެ މީހުންނާ އެކު، ހަދާފައިވާ އެއްބަސްވުންތަކުގައި ބިމާ ބެހޭ ގާނޫނާ ފުށުއަރާ ކަންތައްތަކެއް އެބަ ހުރި ކަމަށާއި އާ އެއްބަސްވުމެއް ހަދަން ނިންމީ އެ ކަހަލަ ސަބަބުތަކަށްޓަކާ ކަމަށެވެ.

ސަރުކާރުން ނިންމާފައި ވަނީ ގުޅިފަޅުން 2,438 ގޯތި ދޭށެވެ. އޭގެ ތެރޭގައި، ގިރާވަރު ފަޅުން ގުޅިފަޅަށް ބަދަލުކުރި 1,347 ގޯތި ވެސް ހިމެނެ އެވެ. އެ ސްކީމްގެ ދަށުން ހުޅުމާލެ އާއި ގުޅިފަޅު އަދި ގިރާވަރު ފަޅުން 9،031 ގޯތި މާލޭ މީހުންނަށް ދޭން ނިންމާފައިވެ އެވެ.