ބޭންކިންގެ އުސޫލާ ހިލާފަށް ލޯނެއް ނުދޭނެ: ބީއެމްއެލް

ބޭންކިންގެ ގާނޫނާ ހިލާފަށް އެ ބޭންކުން ލޯނު ދޫކުރަން އުޅޭ ކަމަށް ބުނެ ފަތުރާ ވާހަކަތައް ގައުމީ ބޭންކް، ބީއެމްއެލް އިން މިއަދު ދޮގުކޮށްފި އެވެ.

ބީއެމްއެލްގެ ތަރުޖަމާން މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ބައެއް އަމިއްލަ ކުންފުނިތަކާ އެކު، ސަރުކާރުން ސޮއިކުރި މަޝްރޫއުތަކުގެ ކޮންޓްރެކްޓަރުންނަށް އެ ބޭންކުން ފައިނޭންސް ނުވަތަ ލޯނު ދޫކުރަނީ ބޭންކިން ގާނޫނާ ހިލާފަށް ކަމަށް ބުނެ ފަތުރަމުންދާ ވާހަކަތަކަކީ އެއްވެސް އަސާސެއް ނެތި ދައްކާ ވާހަކަތަކެއް ކަމަށެވެ.

އެއީ ސައްހަ މައުލޫމާތުގެ މައްޗަށް ބިނާކޮށް ދައްކަމުންދާ ވާހަކަތަކެއް ނޫން ކަމަށް ވެސް ސައީދު ވިދާޅުވި އެވެ.

ސައީދު ވިދާޅުވި ގޮތުގައި، ބީއެމްއެލް އިން ލޯނު ދޫކުރަމުން އަންނަނީ އަދި ކުރިޔަށް އޮތްތަނުގައި ލޯނު ދޫކުރާނީ ވެސް ރާއްޖޭގެ ބޭންކިންގެ ގާނޫނާއި ގަވާއިދުތަކާ އަދި ބައިނަލްއަގުވާމީ މިންގަޑުތަކާ އެއްގޮތްވާ ގޮތުގެ މަތިން އެކުލަވާލާފައިވާ ބޭންކުގެ ކްރެޑިޓް ޕޮލިސީތަކާ އެއްގޮތަށެވެ. އަދި ލޯނު ދޫކުރާނީ މިނިވަންކަމާ އެކު، އެ ބޭންކުގެ ބޯޑުން ނިންމާ ނިންމުންތަކުގެ ދަށުންނެވެ.

"އެހެންކަމުން ސިޔާސީ މަގުސަދެއް ހާސިލްކުރުމަށްޓަކައި މި ބޭންކުގެ ކަސްޓަމަރުންނަށާއި ހިއްސާދާރުންނަށް އޮޅޭ ގޮތަށް ހަގީގަތާ ހިލާފު މައުލޫމާތު ދިނުމަކީ ޒިންމާދާރުކަން ކުޑަ އަމަލެއް ކަމުގައި ދަންނަވަމެވެ. އަދި މިފަދަ ކަންކަން ތަކުރާރު ނުކުރުމަށް އިލްތިމާސްކުރަމެވެ،" ސައީދުގެ ޕޯސްޓުގައި ވިދާޅުވި އެވެ.

އުސޫލާ ހިލާފަށް ލޯނު ދޫކުރާ ކަމަށް ބުނެ ދެކެވޭ ވާހަކަތަކަށް ބީއެމްއެލް އިން ރައްދު ދިނީ، ޕްރޮޖެކްޓްތައް ބީލަމަށް ނުލައި، ހާމަކަމެއް އަދި ވާދަކުރުމުގެ ފުރުސަތެއް ނުދީ، ސަރުކާރުން ބޭނުންވާ ބަޔަކަށް ބޭނުން އަގެއްގައި ދެވޭ ގޮތަށް މާއްލިއްޔަތު ގަވާއިދު ބަދަލުކޮށް، 53 ކުންފުންޏަކަށް 206 ޕްރޮޖެކްޓް ހަވާލުކޮށް، އެ ޕްރޮޖެކްޓުތަކަށް ބީއެމްއެލް މެދުވެރިކޮށް ފައިނޭންސް ހަމަޖައްސާ ކަމަށް ބުނެ އިދިކޮޅު އެމްޑީޕީން ނޫސްބަޔާނެއް ނެރެ، ފާޑުކިޔާފައި ވަނިކޮށެވެ.

ސަރުކާރުން އަމިއްލަ ކުންފުނިތަކާ 206 ޕްރޮޖެކްޓް ހަވާލުކުރީ މި މަހުގެ ހަ ވަނަ ދުވަހު މާލޭގައި ބޭއްވި ރަސްމިއްޔާތެއްގަ އެވެ. އެ ހުރިހާ ޕްރޮޖެކްޓެއްގެ އަގު 2.7 ބިލިއަން ރުފިޔާ އަރަ އެވެ. އެއީ ބޯހިޔާވަހިކަމާއި ބިން ހިއްކުމާއި ތައުލީމީ ދާއިރާ އާއި ސިއްހީ ދާއިރާ އާއި ކުޅިވަރުގެ ދާއިރާ އަދި ވަގުފް އިމާރާތްތައް އެޅުން ހިމެނޭ ގޮތަށް 123 ރަށެއްގައި ހިންގާ އެކި ޕްރޮޖެކްޓުތަކަށެވެ.

206 project ge agakee 2.7 billion rf!

The most trusted news source in the Maldives

Mihaaru

ފިނޭންސް މިނިސްޓަރު ޒަމީރު އެ ދުވަހު ވިދާޅުވި ގޮތުގައި، ކޮންޓްރެކްޓާ ފައިނޭންސް އުސޫލުން މުޅި ރާއްޖޭގައި ހިންގާ އެ މަޝްރޫއުތައް ހަވާލުކުރި ކުންފުނިތަކަށް ރާއްޖޭގެ ބޭންކިން ނިޒާމުގެ ތެރެެއިން ފައިސާ ހަމަޖެހޭނެ އެވެ.

"ކޮންޓްރެކްޓާ ފައިނޭންސިންގެ އުސޫލުތަކާ އެއްގޮތަށް ބޭންކިން ފައިނޭންސް މެދުވެރިކޮށް މި މަޝްރޫއުތައް ހިންގުމާ ހަވާލުވާ ދިވެހި ވިޔަފާރިތަކަށް ބަރާބަރަށް ފައިސާ ލިބޭނެ،" ޒަމީރު ވިދާޅުވެފައިވެ އެވެ.