މި ހިސާބަށް ދިޔައިރު ވެސް ޓީޗަރުންނަށް ހިމާޔަތެއް ނެތް!

އައްޑޫ ހައި ސްކޫލްގެ ދަރިވަރަކާއި ޓީޗަރެއްގެ ދެމެދުގައި ހިނގި ތަޅާފޮޅުމެއްގެ ވީޑިއޯ އިއްޔެ އާންމުވުމާ އެކު ގައުމުގެ ބޮޑު ބަހުސަށް އެކަން ވެއްޖެ އެވެ. ދަރިވަރާއި ޓީޗަރު ވެސް އެކަކު ގަޔަށް އަނެކަކު އަތްލައި އަނިޔާވެރިކޮށް އަމަލުކުރަމުން ދިޔަ މަންޒަރާ އެކު އަލުން ފެށުނީ ކޮންމެ ކަމެއް ވިޔަސް އަބަދުވެސް ދަރިވަރުން ރަނގަޅުކޮށް، ޓީޗަރުން ކުށްވެރި ކުރުމުގެ ވިސްނުމާ އެކު ސްކޫލް މާހައުލުގައި އޮތް ބޮޑު ނުތަނަވަސްކަމުގެ ޒަމާންވީ ބަހުސެވެ. ދަރިވަރުން ރަނގަޅު ކުރުމުގެ ނިޔަތުގައި ދޭ "އަދަބު" ވެސް ކުށަކަށް ބަދަލުވާ ހޫނު ބަހުސެވެ.

ފުރަތަމަ އާންމުވި ވީޑިއޯ ކްލިޕްގައި، ދަރިވަރާއި ޓީޗަރު ތަޅާފޮޅަމުން ދިޔައިރު އެހެން ދަރިވަރުން ހީ މަޖާކޮށް ވީޑިއޯ ކުރަމުން ދިޔަ ގޮތުން އެއީ އެ ކުދިންނަށް އާންމު، އާދައިގެ ކަމަކަށް ވެފައިވާ މަންޒަރެއް ކަމަށް ދޭހަވެ އެވެ. މަންޒަރު ވީޑިއޯކުރި ކަމަށް ބެލެވޭ ދަރިވަރުގެ ލެޕްޓޮޕުން ވެސް ހުޅުވައިގެން އިނީ ގޭމެއް ކަމަށް ވާއިރު މުޅި އެ މާހައުލު ތަސައްވުރު ކޮށްލެވެ އެވެ. މުޅި އެ ކުލާސް ބޮއްސުންލާފައިވާތާ އެތައް ދުވަހެއް ވެފައިވާ ކަން ވީޑިއޯތަކުން ސާފެވެ. އެކަމަކު، އައްޑޫ ހައި ސްކޫލްގެ މެނޭޖުމަންޓު ވެސް އޮތީ ބަލަހައްޓައިގެންނެވެ.

މިކަމުގައި ހިމެނޭ ބިދޭސީ ޓީޗަރު ސަސްޕެންޑްކޮށް ފުލުހުންނަށް މައްސަލަ ހުށަހަޅައިފި އެވެ. އެ ހިސާބުން އަނެއްކާވެސް މި ފެށީ ދަރިވަރުންގެ އުޅުމާއި އަހުލާގު ކިތަންމެ ގޯސް ވިޔަސް އެޅޭނެ ފިޔަވަޅެއް ނެތް ވާހަކަ އާއި އެ ކުދިންނަށް ކިޔަވައިދޭން ދާ ޓީޗަރުންނަށް ހިމާޔަތެއް ހައްގެއް ނެތް ކަމުގެ ވާހަކަ އެވެ. އެއްބަޔަކަށް ޓީޗަރު ގޯސްވި އިރު އަނެއް ބަޔަކަށް ހުރިހާ ވެސް މައްސަލަ އަކީ ދަރިވަރުންގެ އަހުލާގެވެ. މިފަދަ ކަންކަމުގައި ގެންގުޅޭ ރަސްމީ ސިޔާސަތުގެ ދެކޮޅުނުޖެހޭ ކަމެވެ.

"ޓީޗަރަށް ބުލީކުރާތާ އެތައް ދުވަހެއް"

އެ ވީޑިއޯއަށް ފަހު ހަމަ އެ ދަރިވަރު ހަމަ އެ ޓީޗަރަށް އުދަގޫކޮށް ބުލީކުރާ މަންޒަރު ފެންނަ އެތައް ވީޑިއޯއެއް އާންމުވެއްޖެ އެވެ. ޓީޗަރުގެ ބޮލުގައި ގަލަމަކުން ތަޅާތީ އާއި ބޮލަށް އެއްޗެއް އަޅާތީ އާއި ކްލާސްތެރޭ ޓީޗަރަށް ބިރުދައްކާ މަންޒަރު ފެންނަ ވީޑިއޯތައް ވެސް އެބަހުއްޓެވެ.

އެ ސްކޫލްގެ ބައެއް ދަރިވަރުން ބުނި ގޮތުގައި އެ ދަރިވަރާއި ޓީޗަރާ ދެމެދު އެފަދަ މައްސަލަތައް ޖެހޭތާ ކިތަންމެ ދުވެހެކެވެ.

ގްރޭޑް 12 ގެ އެ ދަރިވަރު ޓީޗަރަށް އަނިޔާކޮށް ބުލީކުރާ ވާހަކަ ސްކޫލްތެރޭގައި ވެސް ދައްކާ ކަމަށާއި އެކަމަކު އެ މައްސަލަ ކަމަކަށްވީ ވީޑިއޯ ލީކްވުމުން ކަމަށް "މިހާރު" އާ ވާހަކަ ދެއްކި ބައެއް ދަރިވަރުން ބުންޏެވެ.

"ވަރަށް އެގޮތަށް އުޅޭ ކުއްޖެއް އެއީ. ބައެއް މީހުން އެބަ ކިޔާ އެ ކުއްޖާ އަސްލު ހުންނަން ޖެހޭ ކްލާހެއް ވެސް ނޫނޭ އެއީ. އަސްލު ދެ މީހުން ވެސް ގޯސް، ޓީޗަރު ވެސް، ކުއްޖާ ވެސް،" ދަރިވަރަކު ބުންޏެވެ.

"މިހާރު" އަށް އެނގިފައިވާ ގޮތުގައި، އިއްޔެ އާންމުވި ވީޑިއޯގައި ޓީޗަރު ރުޅި އައިސްގެން އުޅުނީ އެ ދަރިވަރުގެ ފޯނުން އަންހެނެއްގެ ބަރަހަނާ ފޮޓޯ އާއި ވީޑިއޯ ދައްކަން ފެށުމުން އެކަން ހުއްޓުމަށް ޓީޗަރު ތަކުރާރުކޮށް ބުނުމުން ވެސް އެކަން ނުހުއްޓުމުންނެވެ.

އެކަމަކު، އެހެން ދަރިވަރަކު ބުނީ ޓީޗަރު ވެސް މީގެ ކުރިން ކުދިންގެ ގަޔަށް އަތްލައިގެން މައްސަލަ ޕްރިންސިޕަލަށް ވެސް ހުށަހަޅާފައިވާ ކަމަށެވެ.

ސްކޫލް ޕްރިންސިޕަލަށް ގުޅުމުން ފޯނު ނުނަންގަވާތީ މިކަމުގައި އޭނާގެ ބަހެއް ނުލިބުނެވެ.

އެއާ އެކު، މިހާރު އާންމުވަމުންދާ އެކި ވީޑިއޯ ކްލިޕްތަކުން ފެންނަނީ ދެޖިންސު މަސްހުނި އެ ކްލާސްރޫމްތެރޭގައި ދަރިވަރުންގެ ފަރާތުން ނުޖެހޭ "ހުތުރު" މަންޒަރުތަކެވެ.

"ދަރިވަރުންގެ ހައްގު ނޫނީ ނެތް"

މި ހާދިސާއާ އެކު، ސުކޫލް މާހައުލުގައި ޓީޗަރުންނަށް ކުރިމަތިވަމުންދާ ފުރައްސާރަ އާއި މަލާމާތާއި އުނދަގުލުގެ ވާހަކަތަކުން ސޯޝަލް މީޑިއާ ފުރާލައިފި އެވެ. ދަރިވަރުންގެ ފަރާތުން ޓީޗަރުންނަށް ދޭން ޖެހޭ އަދަބު އިހުތިރާމު ނުލިބޭ ވާހަކަ އަނެއްކާވެސް ގިނަވެއްޖެ އެވެ.

އެއް ޓީޗަރަކު ބުނީ "ބިދޭސީ ޓީޗަރުން އެ މީހުންގެ ގައުމާއި އާއިލާ ދޫކޮށް ދިވެހި ދަރިންނަށް ތައުލީމުދޭން" އައިސް އުޅޭ އިރު ބައެއް ދަރިވަރުންގެ ފަރާތުން ކުރިމަތިވީ ޖެއްސުމާއި ފުރައްސާރަ ވަރަށް ބޮޑު ކަމަށެވެ. އެކަމަކު އެއީ ބިދޭސީ ޓީޗަރުންނަށް އެކަނި އޮތް މައްސަލައެއް ވެސް ނޫނެވެ.

"މިހާރު މުޅިން ވެސް ކުދިންގެ ހައްގުތައް. ކުދިންގެ ހައްގުތައް ގިނަވެގެން ގޮސް އެ ކުދިންނަށް އެނގޭ ބިދޭސީއެއް ވިޔަސް ދޭސީއެއް ވިޔަސް [އެޑިއުކޭޝަން] މިނިސްޓްރީން އިސްކުރާނީ ދަރިވަރުކަން. އަދަބު ލިބޭނީ ޓީޗަރަަށްކަން އިނގޭ މިހާރު ކުދިންނަށް،" ކިޔަވައި ދިނުމުގައި 18 އަހަރު ވެފައިވާ ޓީޗަރަކު ބުންޏެވެ.

ޓީޗިން ޑިގްރީ ނިންމުމަށް ފަހު ވެސް އެ ދާއިރާއިން ކުރިއަށްދާން ބޭނުން ނުވި އެއް ސަބަބަކީ ޓީޗަރުންނަށްވުރެ ދަރިވަރުންގެ ހައްގުތައް އިސްވެ ޓީޗަރުންނަށް ކުރާ އިހުތިރާމް ގެއްލިފައި އޮތުން ކަމަށް އެހެން މީހަކު ބުންޏެވެ.

"މިދިޔަ އަހަރު ކިޔަވައިދޭން ޖެހުނު ކްލާހެއްގެ ދަރިވަރަކު ވަރަށް ހުތުރު ބަހުން ވާހަކަ ދައްކައި، އިންޒާރުދީ، މޭޒެއް ކޮށްޕާލި ގަޔާ ދިމާލަށް. ދަރިވަރު ރުޅި އައިސްގެން. އެ ކްލާހުން ނުކުތީ ބިރުން ތުރުތުރު އަޅަމުން،" އެހެން ޓީޗަރަކު ސޯޝަލް މީޑިއާގައި ކޮށްފައިވާ ޕޯސްޓެއްގައިވެ އެވެ.

އޭނާ ބުނީ އެ ދުވަހު އެ ގަތް ބިރު އަދިވެސް އިއްޔެ ވީ ކަމެއްހެން ހަނދާން އެބަހުރި ކަމަށާއި އެކަމަކު ޖެހިގެން އައި ދުވަހު ހަމަ އެ ކްލާހަށް ކިޔަވައިދޭ ދާން ޖެހުނު ކަމަށެވެ. އޭނާ ވެސް ދެއްކީ ދަރިވަރުންގެ ހައްގުތައް ގިނަކަމުގެ ވާހަކަ އެވެ.

ނަމަވެސް ޓީޗަރުންގެ ދިފާއުގައި ބަހެއް ބުނެލަން ކެރޭ މީހުން މަދުވުމާއި ޓީޗަރުންގެ ނަފްސާނީ އަދި ޖިސްމާނީ ދުޅަހެޔޮކަމުގެ ވާހަކަ ދައްކާނެ ބަޔަކު ނެތް ކަމުގެ ކަންބޮޑުވުން އޭނާ ފާޅުކުރި އެވެ.

ބައެއް ޓީޗަރުން ގަބޫލުކުރާ ގޮތުގައި ދަރިވަރުންގެ ފަރާތުން ތަކުރާރުކޮށް އެފަދަ އަމަލުތައް ފެންނަމުން ދިއުމުގައި ބެލެނިވެރީންގެ އިހުމާލު ވެސް ބޮޑެވެ. އެފަދަ އަމަލުތައް ދަރިވަރެއްގެ ކިބައިން ފެނުނަސް ކުއްޖަކު އިސްލާހުކޮށް އެ ކަންކަން ހުއްޓުވަން ދަރިވަރަށް ނަސޭހަތްދީ ފިޔަވަޅެއް އެޅުމުގެ ބަދަލުގައި ޓީޗަރާ ދިމާކޮށްލުން ގިނައީ އެވެ؛ ހަގީގަތް ކޮންމެ ގޮތަކަށް އޮތަސް ތިމާގެ ދަރި އަބަދުވެސް ރަނގަޅީ އެވެ.

ޓީޗަރުންގެ ޝަކުވާ އަކީ، އެ މީހުންނަށް ދަރިވަރުން ކޮންޓްރޯލް ނުވުމެވެ. ދަރިވަރުންގެ ކުރިމަތީގައި އަދި އެހެން ތަނެއްގައި ވިޔަސް ދަރިވަރުން ބޭނުންހާ ގޮތަކަށް އުޅެނީ އެވެ. ޓީޗަރަށް އޮތީ އަތް އުރާލައިގެން ބަލަން ހުރުމެވެ.

މިހާރު އޮތް ސުވާލަކީ ވެސް އެއީ އެވެ. ޓީޗަރުގެ މައްސަލަ ބަލައި އަދަބު ދީ ވަޒީފާއިން ވަކިކޮށް ޑީޕޯޓްކޮށްލީމާ އެ ނިމުނީ ހެއްޔެވެ؟ ދަރިވަރުންގެ އުޅުމާއި އަހުލާގުގެ ވާހަކަ ދައްކައިގެން ނުވާނެ ހެއްޔެވެ؟ މުޅި ކުލާސް ހަމައިން ނެއްޓެމުން ދާތާ އެތައް ދުވަހެއް ވެފައިވާ ކަމަށް ބެލެވޭއިރު ސްކޫލްގެ މެނޭޖުމަންޓު ކޮބައި ހެއްޔެވެ؟