މުއައްޒިންގެ ވީޑިއޯ ލަވަ "ލޭކޮކާ" އައިޑޮލްގެ ފިނާލޭގައި ދައްކާލަނީ

މިދިޔަ އަހަރު މޯލްޑިވިއަން އައިޑޮލް އިން ރޮކްސްޓާގެ ގޮތުގައި މަޝްހޫރުވި މުހައްމަދު މުއައްޒިންގެ ފުރަތަމަ ވީޑިއޯ ލަވަ ހޮނިހިރު ދުވަހުގެ ރޭ މޯލްޑިވިއަން އައިޑޮލް ސީޒަން ދޭއްގެ ފިނާލޭ ޝޯގައި ރިލީޒް ކުރަން ނިންމައިފި އެވެ.

އަމިއްލަ ރާގަކަށް، މުއައްޒިން ކިޔާފައިވާ ލަވައިގެ ނަމަކީ "ލޭކޮކާ" އެވެ. ލަވައިގެ ވީޑިއޯ އިން ވެސް އޭނާ ފެނިގެންދާ އިރު، އަންހެން ބައިވެރިއެއްގެ ގޮތުގައި ބައިވެރިވަނީ އާ ބަތަލާއެއް ކަމަށްވާ އަފާ އެވެ.

ހަބޭސް ބޮޑުބެރު ބޭންޑްގެ ތައްގަނޑުގައި ހިންގާ ގްރެވިޓީ ބައި ހަބޭސް ބޭންޑްގެ ލީޑް ވޯކަލިސްޓް މުއައްޒިން ބުނީ "ލޭކޮކާ" އަކީ ވަރަށް ތަފާތު ލަވައަކަށް ވާނެ ކަމަށެވެ.

"މީގެ ކުރިން ރާއްޖޭގައި އިވިފައި ނުވާ ވައްތަރުގެ ލަވައަކަށް ލަވަވެގެން ދާނީ. އަދި މީގެ ވީޑިއޯ ވެސް ހަމަ އެހާ ތަފާތު ވާނެ،" ހަބޭސްގެ އަލީ މަމްދޫހު ޑައިރެކްޝަން ހަދާފައިވާ ލަވައާ ބެހޭ ގޮތުން އޭނާ ބުންޏެވެ.

މުއައްޒިން އަދި ބުނީ މިއީ ކުރީގެ ލަވަ ކިޔުންތެރިން ކަމަށްވާ ސަމީއު އާއި ފައްތޭގެ ލަވަތަކުގައި ހުންނަ ކަހަލަ ގޮތެއް އެކުލެވޭ ލަވައަކަށް ވާނެ ކަމަށެވެ.

މުއައްޒިން ޝޯއެއްގައި ލަވަ ކިޔަނީ: އޭނާގެ ސޯލޯ އަލްބަމް ވަރަށް އަވަހަށް ނެރޭނެ.

"އެކަމަކު ވެސް ރޮކްސްޓާ ސްޓައިލްގެ ގޮތްގަނޑު ވަރަށް ބޮޑު ވާނެ. އެހެން ގޮތަކަށް ބުނަންޏާ މިއީ ހަމަ އަހަރެންގެ ސްޓައިލްގެ ލަވައެއް،" އޭނާ ބުންޏެވެ.

"ލޭކޮކާ" އަކީ މުއައްޒިން މިހާރު ހަދަމުން އަންނަ އަމިއްލަ ރާގުގެ ސޯލޯ އަލްބަމްގެ ލަވައެކެވެ.

"އަލްބަމްގެ މަސައްކަތް ވަރަށް ބާރަށް ކުރިއަށް އެބަދޭ. މާ ލަސްތަކެއް ނުވެ އަލްބަމް ނެރޭނަން. އަދި މީގެ އިތުރު ދެ ލަވައެއްގެ ވީޑިއޯ ވެސް ގެނެސް ދޭން ވިސްނާފައި އެބަ އޮތް،" އޭނާ ބުންޏެވެ.

"ލޭކޮކާ" ޔަގީނުން ވެސް ވެގެން ދާނީ މުއައްޒިންގެ ފޭނުންނަށް ވަރަށް ކަމުދާނެ ހަދިޔާއަކަށެވެ.