އަންނަ އަހަރުގެ ރިޔާސީ އިންތިޚާބުގައި ރައީސް އަބްދުﷲ ޔާމީން ބަލިކުރަން، އިދިކޮޅު ފަރާތްތަކުން ވަކިވަކިން ކެންޑިޑޭޓުން ނެރުމުގެ ބަދަލުގައި އެއް ކެންޑިޑޭޓަކު ނެރެން ހުރިހާ ޕާޓީތަކުން ވެސް ތާއީދުކޮށްފި އެވެ. އެކަމަކު އެއް ކެންޑިޑޭޓަކު ކަނޑައަޅާނެ ގޮތާ މެދު އަދި ގޮތެއް ނުނިންމަ އެވެ.
"މިހާރު" އާ ވާހަކަ ދެއްކެވި އިދިކޮޅު މެމްބަރަކު ވިދާޅުވީ ހުރިހާ ޕާޓީތަކުން ވެސް ކުރިއަށް ނެރެފައި ވަނީ އިންތިޚާބަށް އެއް ކެންޑިޑޭޓަކު ނެރުމުގެ ވިސްނުން ކަމަށެވެ. އެކަމަކު އެ ކެންޑިޑޭޓު ނެރޭނީ ޕާޓީތަކުން ކަނޑައަޅާ ބޭފުޅުންތަކެއްގެ ތެރެއިން އެންމެ ތާއީދު ބޮޑު ބޭފުޅެއްތޯ ނުވަތަ އެ ނޫން ގޮތަކަށްތޯ އަދި ނުނިންމަ އެވެ.
ޕާޓީތަކުން މިހާރު ކުރަން އޮތް ކަމަކީ އިންތިހާބުގައި ވާދަކުރާ ކެންޑިޑޭޓު ނެރުމުގެ ފޯމިއުލާއެއް ހޯދުމެވެ.
"ދެން އޮތީ އެ މަޝްވަރާ. ޕާޓީތަކުން ވަކިވަކިން ގޮތެއް ނިންމާނެ،" އޭނާ ވިދާޅުވި އެވެ.
އިދިކޮޅު ހަރަކާތުގެ އިސް ބައެެއް ލީޑަރުން ވިދާޅުވާ ގޮތުގައި އަންނަ އަހަރުގެ ރިޔާސީ އިންތިޚާބުގައި ޕާޓީތަކުން އެއްބަސްވާ ކެންޑިޑޭޓަކު ކަނޑައެޅުމުގައި އެ ޕާޓީއެއްގެ ވިސްނުން މިއަދުގެ ނިޔަލަށް ނިންމަންޖެހެ އެވެ. އެކަމަކު އެހެން ބައެއް ލީޑަރުން ވިދާޅުވަނީ އެކަން ނިންމަން ވަކި ތާރީޚަކަށް އެއްބަސްވެފައި ނުވާނެ ކަމަށެވެ.
ގުޅިފައިވާ އިދިކޮޅު ޕާޓީތަކުގެ ތެރެއިން އިންތިޚާބުގައި ކުރިއަށް ގެންދާނެ ގޮތަކާ ގުޅޭ ގޮތުން މިހާތަނަށް ވަކި ގޮތެއް ނިންމާފައި ވަނީ އަދާލަތުން އެކަންޏެވެ. އިންތިހާބުގައި ގައުމީ އެއްބައިވަންތަ ސަރުކާރަކަށް ތާއީދުކުރަން އެއްބަސްވެ، މަޝްވަރާ މަޖިލީހުން ވަނީ ގަރާރެއް ފާސްކޮށްފަ އެވެ. މާނައަކީ، އަދާލަތުން ތާއީދު ކުރާނީ ޕާޓީތައް ގުޅިގެން ނެރޭ ކެންޑިޑޭޓަށެވެ.
އެނގިފައިވާ ގޮތުގައި، އިންތިޚާބާ ގުޅޭގޮތުން އެމްޑީޕީން ވެސް ވަރަށް އަވަހަށް ގޮތެއް ނިންމާނެ އެވެ. އެ ޕާޓީގެ ރިޔާސީ ކެންޑިޑޭޓު ހޮވާ ޕްރައިމަރީ ވަރަށް އަވަހަށް އޮންނާނެ ކަމަށް ބުނެފައިވާއިރު، ޕްރައިމަރީގައި ވާދަކުރައްވާނެ ކަން ކުރީގެ ރައީސް މުހައްމަދު ނަޝީދު ވަނީ ގައުމީ މަޖިލީހުގެ މެމްބަރުންނަށް އަންގަވައިފަ އެވެ.
އެހެންވެ، 13 އަހަރުގެ ޖަލު ހުކުމާ އެކު އިންތިޚާބުގައި ވާދަކުރެއްވުމުގެ ގާނޫނީ ހުރިހާ ފުރުސަތެއް ބަންދުވެފައި އޮތް ނަމަވެސް އެމްޑީޕީގެ ކެންޑިޑޭޓަކީ ނަޝީދެވެ.
ޖުމްހޫރީ ޕާޓީގެ ރިޔާސީ ކެންޑިޑޭޓަކީ އެ ޕާޓީގެ ކައުންސިލް މެމްބަރުން ދެކެވަޑައިގަންނަވާ ގޮތުގައި ގާސިމް އިބްރާހީމެވެ. އުމުރުން 65 އަހަރުވެފައިވާ މީހުންނަށް އިންތިހާބުގައި ވާދަ ނުކުރެވޭނެ ކަމަށް ގާނޫނުއަސާސީ އަށް ގެނެސްފައިވާ އިސްލާހާ ހެދި ގާސިމަށް ވާދައެއް ނުކުރެވޭނެ އެވެ. އެހެންވެ އެ ޕާޓީން އިންތިޚާބަށް ނެރޭނީ ގާސިމްތޯ ނުވަތަ އެހެން ކެންޑިޑެއްތޯ ކަނޑައަޅަން ކައުންސިލްގައި މަޝްވަރާ ކުރާގޮތަށް ވަނީ ހަމަޖައްސައިފަ އެވެ.
ގައުމު ހަމައަކަށް އެޅުވޭނެ ހަމައެކަނި ގޮތަކީ، ނަޝީދު ދެކެވަޑައިގަންނަވާ ގޮތުގައި، އިންތިގާލީ ސަރުކާރެކެވެ. އެ ސަރުކާރު ހިންގާނީ، ޕާޓީތައް ތަމްސީލްކުރާ އިންތިގާލީ ވެރިއެކެވެ. އެ ރައީސްގެ ޒިންމާއަކީ، މިހާރު މަސްހުނިކޮށްފައިވާ ބާރުތައް ވަކިކޮށް، ރައްޔިތުންގެ މަޖިލީހާއި މިނިވަން މުއައްސަސާތަކާއި ޖުޑިޝަރީ އިސްލާހުކުރެއްވުމެވެ. އަދި މިނިވަން އިންސާފުވެރި އިންތިހާބެއް ބާއްވާނެ ޖާގަ ހޯދައި ދެއްވުމެވެ. އެކަމަކު އިންތިގާލީ ސަރުކާރެއް ގާއިމްކުރުމުގެ މި ވިސްނުމާ މެދު ޕާޓީތަކުން ހިޔާލު ތަފާތެވެ.