ޝަރީއަތްތަކުގައި ސިއްރުން ހެކި ބަސް ނެގުން ގާނޫނުން މަނާ ކުރާނެ ކަމަށް ކުރީގެ އެޓާނީ ޖެނެރަލް އަދި މަޝްހޫރު ގާނޫނީ ވަކީލު ހުސްނުއް ސުއޫދު މިއަދު ވިދާޅުވެއްޖެ އެވެ.
ސުއޫދު ކުރެއްވި ޓުވީޓެއްގައި ވިދާޅުވީ "އަހަރުމެން އެދޭ ވެރިކަމެއްގައި" ސިއްރު ހެކިން ބޭނުންކުރުމުގެ އިތުރުން ޝަރީއަތް ސިއްރު ކުރުން ވެސް ގާނޫނުގައި މަނާ ކުރާނެ ކަމަށެވެ.
މީގެ އިތުރުން ރައީސް އަބްދުﷲ ޔާމީންގެ ސަރުކާރާއި ޖުޑިޝަލް ސާވިސް ކޮމިޝަން (ޖޭއެސްސީ) ގައި ތިއްބެވި ސިޔާސީ ބޭފުޅުން، ކޯޓުތަކުގެ އެކިއެކި ފަނޑިޔާރުންނަށް ނުފޫޒު ފޯރުވުމަށް ހިންގާ ޖަރީމާތަކަށް ހައްގު އަދަބު ދެއްވާނެ ކަމަށް ވެސް ސުއޫދު ވިދާޅުވި އެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހިމް ކުރެއްވި ޓުވީޓެއްގައި ވިދާޅުވީ ސިއްރު ހެކި ދިނުމަކީ އިސްލާމް ދީނާއި ގާނޫނުއަސާސީގައި އޮތް ކަމެއް ނޫން ކަމަށެވެ. އެހެންވެ، މިއާ ހިލާފަށް ގާނޫނެއް ވެސް އަދި ގަވައިދެއް ވެސް ނުހެދޭނެ ކަމަށް ގާސިމް ވިދާޅުވި އެވެ.
ގާސިމް ސިފަ ކުރެއްވި ގޮތުގައި ސިއްރު ހެއްކަކީ ބާތިލު، އަނިޔާވެރިވުމަށް ކުރާ ކަމެކެވެ. ޝަރީއަތް ހިންގަންވާނީ ފާޅުކަން ބޮޑުކޮށް ހާމަކަމާ އެކު ކަމަށް ގާނޫނުއަސާސީގައި ބުނެފައިވާ އިރު، ޝަރީއަތްކޮށް، ހުކުމް ކުރަންވާނީ ގާނޫނުއަސާސީއާ ހިލާފު ނުވެ ހަދާފައިވާ އިޖުރާއަތްތަކާ އެއްގޮތަށް ކަމަށް އޭނާ ވިދާޅުވި އެވެ. އެކަމަކު، މިހާރު އަމަލުތައް ހުރީ މިއާ ހިލާފަށް ކަމަށް ވެސް އޭނާ ވިދާޅުވި އެވެ.
ދައުވާ ސާބިތު ކުރުމުގައި، ސިއްރު ހެއްކާއި ސިއްރު ރިޕޯޓް ބޭނުން ކުރުމުގެ މިންގަނޑުތަކެއް ކުރިން ސުޕްރީމް ކޯޓުން ކަނޑައަޅާފައި އޮތް ނަމަ ސިއްރު ހެކި ބޭނުން ކުރުމަކީ އާންމު އުސޫލަކަށް ވެގެން ނުދިޔައީސް ކަމަށް ކުރީގެ އުއްތަމަ ފަނޑިޔާރު އަހުމަދު ފާއިޒް ހުސައިން ވެސް ރޭ ވަނީ ވިދާޅުވެފަ އެވެ.
ފާއިޒް އެ މަނިކުފާނުގެ ފޭސްބުކްގައި ލިޔުއްވާފައި ވަނީ ސިއްރު ހެއްކާއި ސިއްރު ރިޕޯޓްތަކަކީ ނުރައްކާތެރި ދެ ވަސީލަތް ކަމަށެވެ. އެކަމަކު، ހިތާމައަކީ ޖިނާއީ އިޖުރާއާތުގެ ގާނޫނުގެ ދަށުން ސިއްރު ހެއްކާއި ރިޕޯޓްތަކުގެ މައްޗަށް ބިނާކޮށް ދައުވާތައް ސާބިތު ކުރަމުން ދިއުން ކަމަށް ފާއިޒް ވިދާޅުވި އެވެ.