ދަރުބާރުގޭގައި މިރޭ ބޭއްވި ހައި އެޗީވާސް އެވޯޑު ދިނުމުގެ ހަފުލާގައި އެޑިއުކޭޝަން މިނިސްޓަރު ޑރ. އާއިޝަތު ޝިހާމް ވާހަކަދައްކަވަނީ.-- ފޮޓޯ: އެޑިއުކޭޝަން މިނިސްޓްރީ
09 ޖުލައި 2018 - 22:58
9 comments
އިމްތިހާނުތަކުން ދަރިވަރުން ހޯދަމުން އަންނަ ނަތީޖާތަކުން ރާއްޖޭގެ ތައުލީމީ ދާއިރާއަށް އަންނަ ކުރިއެރުންތައް ފެންނަމުންދާ ކަމަށް އެޑިއުކޭޝަން މިނިސްޓަރު ޑރ. އާއިޝަތު ޝިހާމް މިރޭ ވިދާޅުވެއްޖެ އެވެ.
މިދިޔަ އަހަރުގެ އޮކްޓޯބަރު/ނޮވެމްބަރުގައި ބޭއްވި އޭ ލެވެލް އިމްތިހާނުން ރަން ވަނަތައް ހޯދި ދަރިވަރުންނަށް އެވޯޑު ހަވާލުކުރަން މިރޭ ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، އޭ ލެވެލް ގަދަ 10ގައި ހިމެނޭ ދަރިވަރުންގެ އަދަދު އެއް އަހަރުން އަނެއް އަހަރަށް އިތުރުވަމުން އަންނަ ކަމަށެވެ. އެގޮތުން މިދިޔަ އަހަރަކީ، އޭ ލެވެލްގެ އެއް ވަނައިގައި އެންމެ ގިނަ ދަރިވަރުން ހިމެނުނު ފަހަރު ކަމަށް ވެސް ވިދާޅުވި އެވެ.
ފަސް މާއްދާއިން އޭ ހޯދައިގެން މިދިޔަ އަހަރުގެ އޮކްޓޯބަރު/ނޮވެމްބަރުގައި 47 ދަރިވަރަކު ވަނީ އެއް ވަނަ ހޯދައިފަ އެވެ. މިިދިޔަ އަހަރުގެ މެއި/ޖޫންގައި އިމްތިހާނު ހެދި ދަރިވަރުންގެ ތެރެއިން ފަސް މާއްދާއިން އޭ ހޯދައިގެން އެއް ވަނަ ލިބުނީ 44 ދަރިވަރުންނަށެވެ.
މިދިޔަ އަހަރު އިމްތިހާނު ހެދި ދަރިވަރުންގެ ތެރެއިން ގަދަ 10ގައި ހިމެނިފައިވަނީ 205 ދަރިވަރުންނެވެ. ދުނިޔޭގެ ގަދަ 10ގައި ރާއްޖޭގެ 45 ދަރިވަރުން ހިމެނުނުއިރު އޭގެ ތެރެއިން ހަ ދަރިވަރަކު ވަނީ ދުނިޔެއިން އެއް ވަނަ ހޯދައިފަ އެވެ.
ދަރުބާރުގޭގައި ބޭއްވި ރަސްމިއްޔާތުގައި މިނިސްޓަރު ވިދާޅުވީ ފާހަގަކޮށްލެވޭ މިންވަރަށް ރާއްޖޭގެ ތައުލީމީ ނިޒާމު ކުރިއަރަމުން އަންނަ ކަމަށެވެ. އެއީ ދަރިވަރުންގެ ނަތީޖާ ރަނގަޅުކުރަން ސަރުކާރުން ކުރަމުން އަންނަ މަސައްކަތުގެ ނަތީޖާކަން ވެސް އާއިޝަތު ޝިހާމް ފާހަގަކުރެއްވި އެވެ.
ތައުލީމީ ދާއިރާ ކުރިއަރުވަން ފާއިތުވި ފަސް އަހަރު ސަރުކާރުން ވަރަށް ގިނަ މަސައްކަތްތަކެއް ކޮށްފައިވާ ކަމަށާއި ތައުލީމީ އެޖެންޑާގައި ހިމަނާފައިވާ އެންމެ މުހިއްމު ކަމަކީ އެއްވެސް ކުއްޖަކު ބާކީ ނުކޮށް ގައުމަށް ބޭނުންވާ ހުނަރުތައް ދަސްކޮށްދިނުން ކަމަށް ވެސް އޭނާ ވިދާޅުވި އެވެ.
"ކޮންމެ ކުއްޖަކީ ވެސް ކާމިޔާބު ވާނެ، ކާމިޔާބު ކުރެވޭނެ ކުއްޖެއްކަން ގަބޫލުކޮށް އެ ކުދިންނަށް ކުރިއަށް ދެވޭނެ ތަފާތު ރޮނގުތަކާއި ދާއިރާތައް ސްކޫލު ނިޒާމުގެ ތެރެއަށް ތައާރަފުކޮށް، ކުރިން އަޅާނުލެވި ދޫކޮށްލެވިފައިވާ ކުދިންތަކަކަށް އެހީތެރިކަން ފޯރުކޮށްދެވި އުއްމީދު އާކޮށްދެވިއްޖެ،" މިނިސްޓަރު ވިދާޅުވި އެވެ.
އޭނާ ވިދާޅުވީ ކޮންމެ ސްކޫލަކީ ވެސް ނުކުޅެދުންތެރިކަން ހުންނަ ކުދިންނަށް މަރުހަބާ ކިޔާ ސްކޫލުތަކަށް ހެދުމުގެ މަސައްކަތް ފަށާފައިވާ ކަމަށެވެ. އެގޮތުން ހުރިހާ ސްކޫލެއްގައި ނުކުޅެދުންތެރިކަން ހުންނަ ކުދިންނަށް ހާއްސަ ޓީޗަރުން ތަމްރީނުކޮށްފައިވާ ކަމަށް ވިދާޅުވި އެވެ.
މަތީ ތައުލީމް ހާސިލްކުރަން ފާއިތުވި ފަސް އަހަރުގެ ތެރޭގައި 5000 އަށްވުރެ ގިނަ ފުރުސަތު ފަހިކޮށްދީފައިވާކަން ފާހަގަކުރެއްވި އެވެ. އޭގެ ތެރޭގައި ލޯނާއި ސްކޮލަޝިޕް ހިމެނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޓިނު
10 July 2018
15ކުދިން ކުލާހުގައި ކިޔަވާ ނަމަ 3 ކުދިން އިމްތިހާނުގައި ބައިވެރިކުރަނީ ؟
ސައްބޭ ބައި
10 July 2018
ސުވާލަކީ ދެން ކޮބާ ހޭ ޓިއުޝަންގެ ގޮތުގައި ބެލެނިވެރިން ޚަރަދު ކުރި ލައްކައެއް ހާ ރުފިޔާ. އެހެންޔާ، ކޮންމެ ޓީޗަރަކަށް 1500ރ ގެ ރޭޓުން 6 މާއްދާއިން ޓިއުޝަން. މަހަކަށް 9000ރ. އަހަރަކަށް އެއްލަކަށް ރުފިޔާ. ސަރުކާރުން ކުރިކަމެއް ބުނެބަލަ. މަގޭ ދައްތައެއްގެ ދަރިއަށް ދުނިޔޭގެ 1 ވަނަ ލިބުނު. އެއްވަަނަ ލިބުނީ މިވަރު ޚަރަދު ކޮއްގެ. ސްކޫލުން ކިޔެވުން ރަނގަޅޫވީމަކާ ނޫން. މޮޑާން ޓެކްނޮލޮޖީ އާއި ޓިއުޝަން.
ނާރެސް
10 July 2018
ނަތީޖާ ތަކުން ސެޓްފިކެޓް ރީތި ވިއަސް ކުދިންގެ ސިނކުޑީގެ ކުރިއެރުމެއް ނުފެނެއެވެ. ނިސްބަތުން ވަރަށް މަދު ކުއްޖަކު ނޫނީ ސިނކުޑި އެކަށީގެންވާ މިންވަރަކަށް ހުޅުވިފައެއް ނުވެއެވެ. ހޯދާ ބަލާ ތަހުލީލް ކުރުމުގެ ބައެއް ނެތެވެ. އެނަލައިޒް ކުރުމުގެ ހުނަރެއް ނުހުރެވެ. އިމްތިހާނަށް ސީދާ ފޯކަސްކޮށްގެނެް ކިޔަވައި ދިނުމުގެ ނަތީޖާއަކީ ކުދިންގެ ނޮލެޖް ފޯކަސް ލިމިޓް ވެފައި ހުރުމެވެ. މަސައްކަތުގެ މާހައުލަށް ކުދިން ތައްޔާރުވެފައެއް ނުތިބެއެވެ. އިމްތިހާނަށް ފޯކަސްކޮށް ނަތީޖާ ރީތި ކުރުމުގެ ޝަގާފަތް ބަދަލުކޮށް ހޭލުންތެރި ވިސްނުން ތޫނު ލޯ ހުޅުވި ސިނކުޑި ތަނަވަސް ކުދިން ތައްޔާރު ކުރަން ޖެހެއެވެ.
މިނިސްޓަރޫ
10 July 2018
އިނގިރޭސިންވަނީ މިގައުމުގެ ތައުލީމް ކޮލޮނައިޒްކޮށް އުނގުވިޔަފާރިޔަކަށް ހަދާފަ. ގައުމުގައި ދުނިޔެ ބަލައިގަންނާނެ އަމިއްލަ އެގްޒާމެއްނެތްބަޔަކު އަނގައަރުވަން އުޅޭނެ ކަމެއްނެތް. ދުނިޔޭގައި ތިކިޔާ އެގްޒާމްހަދަނީ މަދު ގައުމަކުން. އެއެގްޒާމްދޭމީހުން ބޭނުންވަނީ ލޭބަލްކޮށްގެން ދުނިޔޭގެ އެގްޒާމެއްކަން ވިޔަފާރި ބްރޭންޑެއްގެ ގޮތުގައި ދައްކަން.
ސަޓާ
10 July 2018
ތަޢުލީމީ ކުދިން މިހާރު ބައިވަރު އެބަތިބި. މަދީ އިޚްލާސްތެރި ތެދުވެރި ކަމަށް ކަމޭހިތާ ކުދިން. އެޤައުމެއްގަ އެންމެ ގިނަބާވަތަކުން އަބަދުވެސް އަގުވެއްޓޭނެ.މިރާއްޖޭގަ ތިޔަ ސެޓްފިކެޓު ތަކަކީ މިހާރު ގިނަ އެއްޗެއް. އަދި ގަންނަންވެސް ލިބޭ އެއްޗެއް. ތެދުވެރި ކަމާއި އަމާނާތް ތެރިކަން އެއީ މަދު އެއްޗެއް. ގަންނަވެސް ނުލިބޭ އަގުބޮޑު ޖައުހަރެއް. ވަޒީފާ ދޭ ފަރާތްތަކުންވެސް މިކަމަށް ވިސްނަން ވެއްޖެ.
ޕީސީ
10 July 2018
5 އަހަރުގެ ޕާސްޓް ޕޭޕާރ ހިތުދަސްކޮއް. ޓެސްޓަށް ކުއްޖާ ރެޑިކުރުން ނޫންކަމެއް ސެކަންޑްރީ ގްރޭދްތަކުގަނޯވެ، މީ ތަޢުލީމީފެންވަރު ރަގަޅުވުމެއްނޫން. ދައްކުދިން ތަޢުލީމީ ނިޒާމުން ބޭރުކޮއް މޮޅެތިކުދިން އެގްޒާމްގަ ބައިވެރިކުރުމަކީ ކުރިއެރުމެއެއްނޫން. ކޮލެގް ލެވެލްގަ މިފަދަކުދިންގެ ނަތީއްޖާ ވަރަށްދައް. ކިޔަވާއެއްޗެއް އެޕްލައި ކުރަންނޭގުމަކީ ތަޢުލީމީނިޒާމުގެ ބަލިކަށިކަން
ތުއްތުނާ
10 July 2018
އިސްތިހާރު ކުޅޭނެ ކަމެއްނެތް...... މިކަން ނިމެން މާގިނަ ދުވަހެއް ނެތް.......
ާއާތިފާ
10 July 2018
ތީ މިސަރުކާރުގެ މަސައްކަތެއްނޫން. މިސަރުކާރު އައިއިރު ގްރޭޑް 9 ގަ ތިބިކުދިންތީ. މިސަރުކާރުގެ ސިޔާސަތުތަކުން އައި ބަދަލު ފެންނާނީ އަދި 3 އަހަރު ފަހުން.
ނާފިޒާ
10 July 2018
ގްރޭޑް 9 ގަތިބި ކުދިން މިދިޔަ 5 އަހަރު ނުކިޔަވާ ތިބިގޮތަށް ތިބޭތެ...ކޮސް އަނގަ ނުތަޅަ