ރައީސް ޔާމީންގެ ތަރައްގީ އަށް ރައްޔިތުން ތާއީދު: ނަޝީދު

ރައީސް އަބްދުﷲ ޔާމީން ހިންގަވާ ތަރައްގީގެ މަޝްރޫއުތަކަށް ހދ. ކުޅުދުއްފުށްޓާއި ރާއްޖޭގެ ހުރިހާ ރައްޔިތުން ވެސް ތާއީދު ކުރާ ކަމަށާއި ތަރައްގީގެ ކަންކަން ކުރިއަށް ގެންދިއުމުގެ އާދަ މި ސަރުކާރުގެ ދައުރުގައި އަށަގެންފައިވާ ކަމަށް ކުޅުދުއްފުށީ ދެކުނު ދާއިރާގެ ރައްޔިތުންގެ މަޖިލީހުގެ މެމްބަރު މުހައްމަދު ނަޝީދު މިރޭ ވިދާޅުވެއްޖެ އެވެ.

އެ ރަށުގެ 16 މަގެއްގައި ތާރު އަޅައިގެން ހެދުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ނިމުން ފާހަގަ ކުރުމަށް މިރޭ ބޭއްވި ޖަލްސާގައި ނަޝީދު ވިދާޅުވީ ތަރައްގީއާ ދެކޮޅު އެއްވެސް ރައްޔިތަކު ކުޅުދުއްފުށީގައި ދިރިނޫޅޭ ކަމަށެވެެ.

އެގޮތުން މަގުތަކާއި ގޮނޑުދޮށް ހިޔާމަތް ކުރުމުގެ މަޝްރޫއު ނިމިގެން ދިޔަ ގޮތަށް، އެ ރަށުގެ އެއާޕޯޓާއި އާ ބަނދަރު ވެސް މާ ލަސްތަކެއް ނުވެ ނިމިގެން ދާ ތަން ފެންނާނެ ކަމަށް ނަޝީދު ވިދާޅުވި އެވެ.

އޭނާ ވިދާޅުވި ގޮތުގައި ރައީސްގެ ޔާމީންގެ ތަރައްގީގެ މަޝްރޫއުތަކަކީ ހުއްޓުމެއް ނެތި، ކުރިއަށްދާ މަސައްކަތްތަކެއް ކަމަށެވެ. އެގޮތުން ކުދި ބޮޑު އާބާދީތަކުގައި ތަރައްގީގެ އެކި ކަހަލަ މަޝްރޫއުތައް ކުރިއަށްދާ ކަމަށް ވިދާޅުވި އެވެ.

މިރޭގެ ހަފުލާގައި، ރައީސް ޔާމީނާއި މެމްބަރު ނަޝީދު ވާހަކަ ދައްކަވަނީ.---ފޮޓޯ: ރައީސް އޮފީސް

"އަޅުގަނޑުމެން މި ދެކޭ ތަރައްގީ އާއި ކުރިއެރުން އެއް މަންޒަރަކުން ސިފަވާ ނަމަ އަޅުގަނޑުމެންނަކީ އެއްފަސްވެފައިވާ ބަޔަކަށްވެފައި ދުއްވާލާފައި އެއްގަމުން އެއް ރަށުން އަނެއް ރަށަށް ގޮސް މި ހުރިހާ ތަރައްގީގެ މަޝްރޫއުތަކެއްގެ މަންޒަރުތަކެއް ފެންނަ ނަމަ އިހުސާސް ކުރެވޭނެ ކިހާ ވަރެއްގެ ގިނަ މަޝްރޫތަކެއްކަން ރަށްރަށުގައި އެއްފަހަރާ ހިނގާ ކަމާއި އޭގެ ސަބަބުން ރާއްޖެ އަށް އަންނަ ކުއެރުމާއި ތަރައްގީއަކީ ކޮބައިކަން،" ނަޝީދު ވިދާޅުވި އެވެ.

އޭނާ ވިދާޅުވީ ރައީސް ޔާމީންގެ ވެރިކަމުގައި "ދިގު ފުންމުމުގައި ފުންމާހެން ތަރައްގީގައި މިހާރު ނަގަނީ ލީޕް ފޯވާޑެއް" ކަމަށެވެ.

"މިއީ ހަގީގަތުގައި އިގުތިސާދީ ގޮތުން އަންނަ ހަމައެކަނި އިސްލާހީ ބަދަލެއް ނޫން. މިއީ ޓްރާންފޮމޭޝަނަލް ބަދަލެއް. އެހެންވީމާ އަޅުގަނޑު ދެކޭ ގޮތުގައި ރައީސްގެ ސިޔާސަތަކީ ރާއްޖޭގައި މިހާތަނަށް ހިނގައި ދިޔަ އެންމެ ވަރުގަދަ އެންމެ ބާރު ގަދަ އެންމެ ބޮޑަށް ދުރަށް ފެތުރިގެންދާ ސިޔާސަތު،" ނަޝީދު ވިދާޅުވި އެވެ. "...ރައީސްގެ ސިޔާސަތަކީ ކޮންމެ ރަށަކީ ވެސް މުހިއްމު ރަށެއްކަން. އޭގައި އާބާދީ ބޮޑެއް ކުޑައެއް ތަފާތެއް ނެތް."

އޭނާ ވިދާޅުވީ ކޮންމެ ރަށެއްގައި ވެސް ތަރައްގީގެ ކަންކަން ކުރިއަށް ދަނީ ކުރަން ޖެހޭ ކަންކަމުގެ މުހިއްމު ކަމުގެ ތަރުތީބުންނެވެ. އެގޮތުން ލަހުން ވިޔަސް، ކަންކަން ވާނެ ކަމުގެ އުންމީދު މިހާރު އެބަ އޮތް ކަމަށް ވިދާޅުވި އެވެ.