ރޭ އެއްބަޔަކު ބުނަނީ މިހެންނެވެ؛ ތިމާ ފޭހުނު އިލޮށިގަނޑު ތިމާގެ ތޮލަށް ހެރުނީ އެވެ. މުޒާހަރާކުރުން ހުއްޓުވީ ޕީޕީއެމްގެ ސަރުކާރުންނެވެ. ގާނޫނުއަސާސީން ރައްޔިތުންނަށް ލިބިދޭ ހަޅުތާލުކުރުމާއި އަޑުއުފުލުގެ ހައްގު ހަނިކުރީ ވެސް އެ ޕާޓީގެ ވެރިކަމުގަ އެވެ. އެކަމަކު އެ ޕާޓީގެ ވެރިކަން ނުނިމެނީސް، ރޭ އެ ވަނީ އޭރު ހިފެހެއްޓި އެ ހައްގުތަކުގެ މުހިންމުކަން ގަބޫލުކޮށް އަޑުއުފުލައިފަ އެވެ.
މަދު ބަޔަކާ އެކު ޕީޕީއެމް އޮފީސް ކުރިމަތީ ރޭ ބޭއްވި އެއްވުމުގެ ބައިވެރިން ވަނީ އިލެކްޝަންސް ކޮމިޝަންގެ ރައީސް އަހުމަދު ޝަރީފް، ރިޔާސީ އިންތިހާބުގެ ވޯޓު އޮޅުވާލި ކަމަށް ތުހުމަތުކޮށް "ވޯޓު ވަގު" އަށް ގޮވައިފަ އެވެ. އަދި ރައީސް ޔާމީނާ ވާދަކުރައްވައި ބޮޑު ތަފާތަކުން ރިޔާސީ އިންތިހާބު ކާމިޔާބުކުރެއްވި އިބްރާހިމް މުހައްމަދު ސޯލިހް (އިބޫ) އަށް ވެސް އެފަދަ ތުހުމަތުކޮށް އަޑު އުފުލި އެވެ.
މުޒާހަރާ ކުރާ ނަމަ ޓްރެފިކް ތޮއްޖެހި އާއްމު ރައްޔިތުންނަށް އުނދަގޫތައް ކުރިމަތިވާނެ ކަމަށް ބުނެ އިދިކޮޅު ފަރާތްތަކަށް ފާޑުކިޔާ ޕީޕީއެމުން ރޭ މުޒާހަރާ ކުރީ ވެސް ބޮޑުތަކުރުފާނު މަގުގައި، ދުއްވާ އެއްޗިއްސަށް ދަތިވާ ގޮތަށެވެ. އަދި އާއްމުން ދިރިއުޅޭ އެ ސަރަހައްދުގައި އަޑުހަރުކޮށް ވަގަށް ގޮވައި ވެސް ހެދި އެވެ.
އެއްވުމުގެ ބައިވެރިން ވާރެއާ ތެމިގެން ތިބިއިރު ޕީޕީއެމް އޮފީހުގެ ހިޔަލުގައި ހުންނަވައި ވާހަކަ ދައްކަވަމުން ރައީސް ޔާމީން ވަނީ އެމަނިކުފާނު އިލެކްޝަންސް އަށް އައްޔަން ކުރެއްވި، އަދި ޒަމާންވީ އެކުވެރިޔާ ޝަރީފަށް ނުފޫޒު ފޯރުވާފައިވާ ކަމަށް ވިދާޅުވެފަ އެވެ. އަދި މުޅި ރާއްޖޭގައި މުޒާހަރާ ކުރަން އެމަނިކުފާނު ގޮވާލެއްވި އެވެ.
ރައީސް ޔާމީނަކީ މުޒާހަރާ ކުރުމާ ދެކޮޅަށް ވަރަށް ގިނައިން ވާހަކަފުޅު ދައްކަވާފައިވާ ބޭފުޅެކެވެ. ރިޔާސީ އިންތިހާބަށް ހަތަރު ދުވަހަށް ވެފައިވަނިކޮށް މާލޭގައި ޕީޕީއެމުން ބޭއްވި ޖަލްސާގައި ވެސް ރައީސް ޔާމީން ވަނީ "އެއްވަން ބޭނުން ނަމަ ހައްޖަށް ދާންވީ"ނޫންހޭ ވިދާޅުވެ މުޒާހަރާތަކަށް ފާޑުވިދާޅުވެފަ އެވެ.
އެމަނިކުފާނުގެ އެވާހަކަފުޅަށް، ކުރީގެ ނައިބު ރައީސް އަދި 2013 ގެ ރިޔާސީ އިންތިހާބުގައި ރައީސް ޔާމީނަށްޓަކައި އެންމެ ބޮޑު މަސައްކަތްޕުޅެއް ކުރެއްވި ޑރ. މުހައްމަދު ޖަމީލް އަހުމަދު ވަނީ މަލާމަތްކުރައްވައިފަ އެވެ.
ޓްވީޓެއްގައި ޖަމީލް ވިދާޅުވީ "މަނިކުފާނު ތިޔަ ގޮތަށް މުޒާހަރާކުރެއްވުމަކީ ވަރަށް ހުތުރު ކަމެއް" ކަމަށެވެ.
ކުރިއާލާ އެންގުމަކާ ނުލައި މުޒާހަރާ ކުރުމުގެ ހައްގު ގާނޫނުއަސާސީން ކަށަވަރުކޮށްދީފައި ވީނަމަވެސް މި ސަރުކާރުން ވަނީ އެކަން ހުއްޓުވައިފަ އެވެ. އެގޮތުން ހޯމް މިނިސްޓްރީގެ ހުއްދައެއް ނެތި އެއް ނުވެވޭނެ ކަމަށް 2016 ވަނަ އަހަރު ނިންމި އެވެ. އަދި މުޒާހަރާ ކުރުމުގެ ހައްގު އެއްކޮށްގެން ބަންދުކުރި އެވެ. މުޒާހަރާ ކުރި އެތައް ބަޔަކު ޖަލަށް ލި އެވެ.
އިދިކޮޅު ފަރާތްތަކުން މުޒާހަރާ ކުރަން އުޅޭ ނަމަ އެކަން ހުއްޓުވައި ޕީޕީއެމުން ބުނަމުން ގެންދިޔައީ އިދިކޮޅު މީހުންނަކީ އެއްވުންތައް ބާއްވައި ގައުމު ހަލަބޮލި ކުރަން އުޅޭ ބައެއް ކަމަށެވެ.
ހައްގު ހޯދަން ބާއްވާ އެއްވުންތަކާ ދެކޮޅު، ޕީޕީއެމުން ރޭ މުޒާހަރާ ކުރުމުން ސޯޝަލް މީޑިއާގައި ސިޔާސީ ބޭފުޅުންނާއި އާއްމުން އުފައްދާފައިވާ ސުވާލަކީ އޭރު ޕީޕީއެމުން ދެއްކި ވާހަކަތައް ކޮބައިތޯ އެވެ؟
"މުޒާހަރާ ކުރުން މަނާކޮށްފައި މުޒާހަރާ ކުރި މީހުން ޖަލަށް ލާފައި ބައެއް މީހުން ޖަލުގައި މަރުވެދިޔަ ފަހުން ޕީޕީއެމަށް މި ރޭކާލީ މުޒާހަރާ ކުރުމަކީ އޮންނަ ކަމެއްކަން،" ސޯޝަލް މީޑިއާ އެކްޓްވިސްޓް ލޫކަސް ޖަލީލް ރޭ ކުރި ޓްވީޓެއްގައި ބުނެފައިވެ އެވެ.
ހިޔާނާތާއި ނާއިންސާފުގެ ވާހަކަ އިދިކޮޅު ފަރާތްތަކުން ދެއްކުމުން އެއީ މީހުންގެ އަބުރު ކަތިލުން ކަމަށް ޕީޕީއެމުން ސިފަ ކުރި އެވެ. އަދި އަބުރު ގާނޫނުގެ ނަމުގައި ގާނޫނެއް ހަދައި ހިޔާނާތުގެ ތުހުމަތުތައް ކުރެވޭ މީހުންގެ ވާހަކަތައް ރިޕޯޓް ކުރުމަށް ހުރަސްތަކެއް އެޅި އެވެ. އެ ވާހަކަ ދެއްކި މީޑިއާތައް މިލިއަނުން ޖޫރިމަނާ ކޮށްފައިވެ އެވެ.
ޕީޕީއެމުން ކުރި މުޒާހަރާގައި ވަގަށް ގޮވައި އަޑު އުފުލުމާއި ޗެނަލް13 އިން އެ އަޑުތަކާއި މަންޒަރުތައް ވަގުތުން ގެނެސްދިނުމުން އަބުރު ރައްކާތެރި ކުރުމުގެ ނަމުގައި ޕީޕީއެމުން ދެއްކި ވާހަކަތަކުގައި ބުރަދަނެއް ނަތް ކަމަށް ވެސް ފާޑުކިޔާ ފަރާތްތަކުން އަންނަނީ ބުނަމުންނެވެ.