މަޝްހޫރު ޕްރެޒެންޓަރު މޫސާ ވަސީމް، އައިސް ޓީވީގެ ސީއީއޯ ކަމުން އިސްތިއުފާ ދެއްވައި ގައުމީ އެއާލައިން ހިންގާ އައިލެންޑް އޭވިއޭޝަންގެ އިސް މަގާމަގާ ހަވާލުވެވަޑައިގެންފި އެވެ.
މޫސަ އައްޔަން ކޮށްފައި ވަނީ އައިލެންޑް އޭވިއޭޝަންގެ ޕަބްލިކް ރިލޭޝަންސް އެންޑް ކޮމިއުނިކޭޝަން މެނޭޖަރަށެވެ.
އައިލެންޑް އޭވިއޭޝަނުގެ މައުލޫމާތުތައް ހިއްސާ ކުރާ ޑިޕާޓްމަންޓުގެ ވެރިއަކަށް އައްޔަންކޮށްފައިވާ މޫސަ ވަނީ 2015 ވަނަ އަހަރު ރާއްޖޭގެ ގައުމީ ޔުނިވާސިޓީން ނޫސްވެރިކަމުގެ ދާއިރާ އިން ޑިގްރީ ހާސިލް ކުރައްވައިފަ އެވެ.
މޫސަ ވިދާޅުވި ގޮތުގައި އައިލެންޑް އޭވިއޭޝަންއާ ގުޅިވަޑައިގަތަސް ޕްރެޒެންޓަރެއްގެ ގޮތުގައި އޭނާ ފެންނާނެ އެވެ.
ރާއްޖޭގެ އެންމެ ވަރުގަދަ ޝޯ، މޯލްޑިވިއަން އައިޑޮލްގެ ހުށަހެޅުންތެރިޔާ މޫސަ، ޓީވީއެމްގައި 13 އަހަރު މަސައްކަތް ކުރެއްވި އެވެ. މިދިޔަ އަހަރުގެ ޖެނުއަރީ މަހުގެ ތެރޭގައި އައިސްޓީވީއާ ގުޅިވަޑައިގަތީ ޓީވީއެމުން ވަކިވެވަޑައިގެންނެވެ.
