ފިހާރައެއްގައި ބަޔަކު ހަރަކާތްތެރިވަނީ: މާލޭގައި 24 ގަޑިއިރު ވިޔަފާރި ކުރުމުގެ ހުއްދަ ދެވޭނެ ސަރަހައްދުތައް މިއަދު ވަނީ ކަނޑައަޅާފައި -- ފޮޓޯ/މިހާރު
22 ޖެނުއަރީ 2019 - 13:26
33 comments
މާލޭ އާއި ވިލިމާލޭގައި ކެފޭ ރެސްޓޯރެންޓްތަކާއި ފިހާރަތަކަށް 24 ގަޑިއިރު ވިޔަފާރި ކުރުމުގެ ހުއްދަ ދެވޭނެ ސަރަހައްދުތައް އިކޮނޮމިކް މިނިސްޓްރީން ކަނޑައަޅައި، މިއަދު އާންމުކޮށްފި އެވެ.
ވަކި ޝަރުތުތަކާ އެކު ކެފޭ އަދި ފިހާރަތަކުގައި 24 ގަޑިއިރު ވިޔަފާރި ކުރުމުގެ ހުއްދަ ދިނުމަށް އިކޮނޮމިކް މިނިސްޓްރީން ކުރިން އޮތީ ނިންމައިފަ އެވެ. އެކަމަކު އެ ހުއްދަ ދޭނީ ސިޓީ ކައުންސިލްތަކުގެ މަޝްވަރާގެ މަތިން އިކޮނޮމިކް މިނިސްޓްރީން ކަނޑައަޅާ ސަރަހައްދުތަކުގައި ހުންނަ ތަންތަނަށް އެކަންޏެވެ.
އިކޮނޮމިކް މިނިސްޓްރީގެ އިއުލާނުގައިވާ ގޮތުން 24 ގަޑިއިރު ވިޔަފާރިކުރުމުގެ ހުއްދަ މާލެ އަދި ވިލިމާލޭގައި ދޭނީ ބޮޑުތަކުރުފާނު މަގާއި މަޖީދީމަގާއި ސޯސަންމަގާއި ޖަނަވަރީ މަގާއި ކަނބާ އައިސަރަނި ހިނގުމާއި ފަރީދީމަގާއި މެދު ޒިޔާރަތް މަގުގެ އިތުރުން ބުރުޒުމަގާއި އޯކިޑްމަގާއި އަމީނީމަގާއި ލޮނު ޒިޔާރަތް މަގާއި ވިލިނގިލި ފެރީ ޓާމިނަލް ސަރަހައްދު އަދި ޗާންދަނީމަގުގައި ހުންނަ ތަންތަނަށެވެ.
އެ އިއުލާނުގައިވާ ގޮތުން ފިހާރަތަކުގެ ތެރެއިން 24 ގަޑިއިރު ވިޔަފާރިކުރުމުގެ ހުއްދަ ދޭ ތަންތަނުގައި ވިއްކޭނީ ޒަރޫރީ ކަންކަމަށް ބޭނުންވާ އެއްޗެހި އެކަންޏެވެ. އަދި އެ ހުއްދަ ދޭނީ އެއިން ކޮންމެ ތަނެއް ވަކިވަކިން ބަލައި، ޗެކްކުރުމަށް ފަހު ކަމަށް ވެސް އެ އިއުލާނުގައިވެ އެވެ. އެ ހުއްދަ ދޭ ތަންތަން ނަމާދު ވަގުތަށް ބަންދުކުރާ ކުރުން ފިޔަވައި، އެހެން ހުރިހާ ވަގުތުތަކެއް ވެސް ޚިދުމަތް ދޭން ޖެހޭނެ ކަމަށް އެ އިއުލާނުގައިވެ އެވެ.
ފިހާރަތައް ހުންނަންޖެހޭނީ އެތެރެ ފެންނަ ގޮތަށެވެ. އަދި 24 ގަޑިއިރު އޮޕަރޭޓްކުރާ ކެމެރާ ހަރުކޮށްފައި ހުންނަންޖެހޭނެ އެވެ. އަދި ރެސްޓޯރެންޓްތަކަށް އެ ހުއްދަ ދެނީ އެތެރެ ސާފުކޮށް ފެންނަ ގޮތަށް ބެހެއްޓުމާއި ކެމެރާ ހުރުމުގެ އިިތުރުން މެންދަމު 1:30 ގެ ފަހުން ދުންފަތުގެ އިސްތިއުމާލް ކުރުން މަނާކުރާ ގޮތަށެވެ. އެކަމަކު ބޭރުގެ ފްރެންޗައިޒްތަކަށް 24 ގަޑިއިރު ވިޔަފާރިކުރުމުގެ ހުއްދައެއް ނުދޭނެ އެވެ.
މި ހުއްދަ ދެނީ 2،000ރ. ގެ ފީއަކަށެވެ. މި ހުއްދަ ދެނީ ދެ އަހަރުގެ މުއްދަތަކަށެވެ. ޝަރުތުތަކާ ހިލާފުވާ ފުރަތަމަ ފަހަރު ހަ މަހަށް ހުއްދަ ހިފަހައްޓާނެ އެވެ. އަދި ތަކުރާރުކޮށް އެ ގަވާއިދާ ހިލާފުވާ ނަމަ، އެއްކޮށް ހުއްދަ ބާތިލްކުރާ ގޮތަށް ވެސް ވަނީ ހަމަޖައްސައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޢައިމިނަ
23 January 2019
ބޭކާރު ކަމެއް މުސްލިމުން ނަށް އޮތީ އވަހަށް ނިދާފަ ފަތިސް ނަމާދު ކުރަން ހޭލަން އަންގަވާފަ
ޒަރޫރީ
22 January 2019
ދެން ވިދާޅުވޭ ބިޑިސުއްޓާ ސިނގިރޭޓަ އަދި އެނަރޖީ ޑްރިންކަކީވެސް ޒަރޫރީ ތަކެއްޗޭ. ދެން ޒުވާނުން އިތުރަށް ހައިޕަރވެގެން މަގުމަތީ ރާން ރޫން ލާފަ ދުއްވާނީ
ވޯލް
22 January 2019
ދުންފަތުގެ އިސްތިއުމާލު ކުރުމުގެ ބައި ސަޅި. މައްސަލައަކީ ދިވެހިން ހަމަ ގޮތް ކުޑައީ، 1.30 މަނާކަން އިންގޭއިރު އަމިއްލައަށް އެކަން ނުކުރަނީ.
ޢަހުމަދު އިސްމާލު
22 January 2019
މިކަމުން ލިބޭ ފައިދާ: 1- ސަރުކާރަށް އާމްދަނީއެއް ލިބުން. ލިބޭ ގެއްލުން: 1- މުދަލުގެ އަގު އުފުލި ނިކަމެތިން ނިކަމެތިވުން 2- މަގުތަކުގައި ޕާޓޭއިން ގިނަވުން. 3- މަގުމަތި ނާމާން ވުން. 4- ވައްކަން އިތުރުވުން. 5- ސަރުކާރަށް ފާޑުކިއުން އިތުރުވުން. 6- ރިޝްވަތުގެ ދޮރު ހުޅުވިގެން ދިއުން. 7- ރައްޔިތުން ނާއިންސާފުން ތަފާތު ކުރުން. 8- މާލެ އާއި ރާއްޖެތެރެ ތަފާތުކުރުން. 9- ސަރުކާގެ ވަޢުދުތަކާ ޚިލާފުވުން. ޢަދިވެސް އެތައް ކަމެއް. ލާ ދީނީ ގޭގެ މީހުންވީމަ.
Haruge
22 January 2019
ސިގިރޭޓް ބުއިން މަނާކުރިއަސް ބޯނެ އެކަން ބަލާމީހަކު ނޫޅޭނެ. ޕޮލިހުންނަކަށް ނުފެންނާނެ.
އިދުރީސްބެ
22 January 2019
ޕޮލިހުން އެންމެ ގިނައިން ބޮނީ... އެހެންވީމަ އެމީހުންނަށް ނުފެންނާނެ އެންނު...
ައަސްލުވެސް
22 January 2019
ބޭރަށް ނުކުތުމުން ދިމާވާ ޙާލަތު. ސައިކަލުގަދާނަމަ: ހަމަނެއްޓިފައިވާ ޒުވާނެއް ދުއްވާސައިކަލަކުން ޖެހުން. ޓްރެފިކް މަޑުޖެހޭއިރަށް ބަރުގޮނުއަޅާވަރުން ކަންފަތްފަޅައިގެންދޭ. ހިނގާފަދާނަމަ: ކޮންމެ ދެފިޔަވަޅަކަށް ސިގިރޭޓްގެ ވިހަދުންބޮޅެއް. ހޮޓަލަކަށް ނުވަތަ ކެފޭއަކަށް ވަދެފިނަމަ: ސިގިރޭޓް ދުމުން ކޮށިއަރާވަރުވޭ ހިތްފަސޭހަ ވެރިރައް. މޮޔަވެދާނެ
މަޑުގެ
23 January 2019
ޑޮކްޓަރުންވެސް ސިގިރޭޓް ބޯއިރު ދެން މަނާކުރަން ދައްކާނެ ވާހަކައެއް އެބައޮތްތަ؟
ކޮރަލް
22 January 2019
ވަކި ސަރަހައްދު ތަކަކުން ކުއްޔަށް ދޭ ތަންތަނުގެ ކުލި ބޮޑުވަނީއެވެ. ކުއްލި އަކަށް ވާކަމެކެވެ.
ކޮންސާރން
22 January 2019
ޕާޓޭންނާ ވަގުންނަށް ސެއްލަ ހަދާލަދިނީދޯ އަނެއްފަހަރު! އުޅޭއުޅުމުން ޝައްކުވެގެން ޕޮލިހަކަށްވެސް އެއްޗެއް އެހެން ހެދުމުން އަހައެއް ނުލެވޭނެ ވިއްޔާ!
މުވައްޒަފުންގެ ހައްގުތަކުގެވަަހަކައެއްނާދޭ
22 January 2019
24 ގަޑިއިރު ފިހާރަ ހުޚުވުން ރޭގަނޑު 11 ޖަހަންދެން ފިހާރަ ހުޅުވުން މީމީހުންގެ ވިޔާފާރިވެރިއަކު ހުންނަނީބާ؟
ކަނބިލި
22 January 2019
ވަރަށް ވިސްނުމެއްނެތި ކުރާ ކަމެއް
ޢަބުދުﷲ ޢިބްރާހިމް
22 January 2019
" ސާފުކޮށް ފެންނަ ގޮތަށް ބެހެއްޓުމާއި ކެމެރާ ހުރުމުގެ އިިތުރުން މެންދަމު 1:30 ގެ ފަހުން ދުންފަތުގެ އިސްތިއުމާލް ކުރުން މަނާކުރާ ގޮތަށެވެ." މިއީކީ ކުރާނެ ކަމެއް ނޫން! އަދި ވާނެ މިވިހާ ތަނަށް ވީ ކަމެއް ވެސް ނޫން! މަނާކުރުން އޮންނާނީ ނަމެއްގައި! މަނާއިރު ކުރާތަން ފެނުމުން ޕޮލިހަށް ގުޅިޔަސް އެޓެންޑެއް ނުވާނެ! އަޅުގަނޑުގެ ތަޖުރިބާއަކީ މީ!